نئی دہلی

گری راج سنگھ نے جمعہ کے روز لوک سبھا میں قائدِ حزبِ اختلاف راہل گاندھی پر الزام عائد کیا کہ انہیں ملک میں کنفیوژن پھیلانے اور عالمی سطح پر ہندوستان کی ساکھ کو کمزور کرنے کی “عادت” پڑ گئی ہے۔

پارلیمنٹ کے باہر میڈیا سے بات کرتے ہوئے گری راج سنگھ نے کہا کہ لوک سبھا میں قائدِ حزبِ اختلاف اور کانگریس کے رکنِ پارلیمنٹ راہل گاندھی کی یہ عادت بن گئی ہے کہ وہ ملک میں الجھن پیدا کریں اور خارجہ پالیسی پر سوالات اٹھائیں۔ انہوں نے کہا کہ مکر دوار پر چائے پینے کے ساتھ ساتھ ملک کے خلاف بیانات دینا اور عوام کے ذہنوں میں شکوک پیدا کرنا ان کا معمول بن گیا ہے۔ سنگھ نے دعویٰ کیا کہ کووڈ کے دوران بھی انہوں نے اسی طرح ملک میں کنفیوژن پھیلانے کی کوشش کی تھی۔

ان کے یہ بیانات ایسے وقت سامنے آئے ہیں جب مغربی ایشیا میں بڑھتی ہوئی کشیدگی اور اس کے عالمی توانائی سپلائی پر اثرات کے باعث مرکزی حکومت اور اپوزیشن کے درمیان قومی توانائی سلامتی کے مسئلے پر تیز بحث جاری ہے۔

ایک دن پہلے کانگریس کے رکن پارلیمنٹ راہل گاندھی نے کہا تھا کہ مغربی ایشیا میں جاری تنازع اور آبنائے ہرمز کی بندش سے ہندوستان کی توانائی سلامتی پر سنگین اثرات پڑ سکتے ہیں۔ انہوں نے کہا کہ اس بحران کا اثر اب محسوس ہونا شروع ہو گیا ہے اور “تکلیف ابھی شروع ہوئی ہے۔

لوک سبھا میں خطاب کرتے ہوئے راہل گاندھی نے کہا کہ امریکہ، اسرائیل اور ایران کے درمیان جاری جنگ کے عالمی اور ملکی سطح پر دور رس نتائج سامنے آئیں گے۔انہوں نے دعویٰ کیا کہ اس تنازع کے اثرات ملک میں ظاہر ہونا شروع ہو گئے ہیں، ریسٹورنٹس بند ہو رہے ہیں اور ایل پی جی کی دستیابی کو لے کر لوگوں میں خوف اور بے چینی بڑھ رہی ہے۔

راہل گاندھی نے کہا كہ مشرقِ وسطیٰ میں جنگ شروع ہو چکی ہے۔ امریکہ، اسرائیل اور ایران ایک دوسرے کے خلاف جنگ میں شامل ہیں۔ اس جنگ کے بہت دور رس اثرات ہوں گے۔ دنیا کے تقریباً 20 فیصد تیل کی ترسیل جس مرکزی راستے سے ہوتی ہے، یعنی آبنائے ہرمز، وہ بند ہو چکی ہے۔ اس کا ہمارے لیے خاص طور پر بڑا اثر ہوگا کیونکہ ہمارے تیل اور قدرتی گیس کا بڑا حصہ اسی راستے سے آتا ہے۔ تکلیف ابھی شروع ہوئی ہے۔ ریسٹورنٹس بند ہو رہے ہیں اور ایل پی جی کے بارے میں لوگوں میں گھبراہٹ پھیل رہی ہے۔ یہ تو صرف شروعات ہے۔

راہل گاندھی نے مزید کہا کہ کسی بھی ملک کی مضبوطی کی بنیاد اس کی توانائی سلامتی ہوتی ہے۔ انہوں نے اس خیال پر بھی تنقید کی کہ بیرونی طاقتوں کو ہندوستان کی توانائی شراکت داری سے متعلق فیصلوں پر اثر انداز ہونے دیا جائے۔

دوسری جانب، پیٹرولیم اور قدرتی گیس کے مرکزی وزیر ہردیپ سنگھ پوری نے جمعرات کو لوک سبھا میں بتایا کہ مغربی ایشیا کے تنازع کے باوجود عالمی توانائی سپلائی میں آنے والی بڑی رکاوٹوں سے نمٹنے میں ملک کامیابی کے ساتھ آگے بڑھ رہا ہے۔

انہوں نے کہا کہ ہندوستان کے پاس گیس کی پیداوار اور سپلائی کے ایسے انتظامات موجود ہیں کہ اگر تنازع طویل بھی ہو جائے تو بھی صورتحال کو سنبھالا جا سکتا ہے۔ انہوں نے یقین دہانی کرائی کہ ہر گھر اور صنعت کے لیے بجلی کی پیداوار پوری طرح محفوظ ہے۔ہردیپ سنگھ پوری نے کہا کہ اس تنازع کے باعث آبنائے ہرمز عملی طور پر تجارتی جہاز رانی کے لیے بند ہو چکی ہے۔ یہ راستہ عام طور پر دنیا کے تقریباً 20 فیصد خام تیل، قدرتی گیس اور ایل پی جی کی ترسیل کے لیے استعمال ہوتا ہے۔

انہوں نے ایوان کو بتایا کہ اس حقیقت کے باوجود کہ پہلے تقریباً 45 فیصد خام تیل کی درآمدات اسی راستے سے آتی تھیں، ہندوستان کی سپلائی محفوظ ہے۔ ان کے مطابق اب آبنائے ہرمز کے علاوہ دیگر ذرائع سے خام تیل کی خریداری تقریباً 70 فیصد تک پہنچ گئی ہے، جبکہ تنازع سے پہلے یہ تقریباً 55 فیصد تھی۔

انہوں نے یہ بھی یقین دہانی کرائی کہ پیٹرول، ڈیزل، مٹی کے تیل، ایوی ایشن ٹربائن فیول اور فیول آئل کی کوئی کمی نہیں ہے۔ انہوں نے کہا کہ ان تمام ایندھنوں کی دستیابی پوری طرح یقینی بنائی گئی ہے اور ریفائنریاں پوری صلاحیت کے ساتھ کام کر رہی ہیں، بعض اوقات ان کی پیداوار 100 فیصد سے بھی زیادہ ہو رہی ہے۔

وزیر نے مزید کہا کہ گھروں تک پہنچنے والی پائپ گیس اور گاڑیوں کے لیے سی این جی کی سپلائی سو فیصد برقرار ہے اور اس میں کوئی کٹوتی نہیں کی گئی۔ صنعتی اور مینوفیکچرنگ شعبوں کو گزشتہ چھ ماہ کی اوسط کے مقابلے میں تقریباً 80 فیصد گیس فراہم کی جائے گی جبکہ کھاد کے کارخانوں کو تقریباً 70 فیصد سپلائی دی جائے گی تاکہ بوائی کے موسم سے پہلے زرعی شعبے کو نقصان نہ پہنچے۔

انہوں نے کہا کہ ریفائنریوں اور پیٹرو کیمیکل یونٹس میں گیس کی سپلائی میں منظم کمی کی گئی ہے تاکہ اس گیس کو زیادہ ترجیحی شعبوں کی طرف منتقل کیا جا سکے۔ ہردیپ سنگھ پوری کے مطابق متبادل ذرائع سے خریداری کے ذریعے اس کمی کو بڑی حد تک پورا کر لیا گیا ہے۔