ترواننتھاپورم

کانگریس کے رکن پارلیمنٹ ششی تھرور نے پیر کو کیرلم اسمبلی انتخابات 2026 کے نتائج کو کانگریس قیادت والے یونائیٹڈ ڈیموکریٹک فرنٹ (یو ڈی ایف) کے لیے ایک "تاریخی" اور "شاندار" مینڈیٹ قرار دیا، کیونکہ رجحانات میں زبردست جیت اور ایک دہائی بعد اقتدار میں واپسی کا اشارہ ملا ہے۔

صحافیوں سے بات کرتے ہوئے تھرور نے کہا کہ جیت کا پیمانہ توقعات سے کہیں زیادہ ہے اور یہ ووٹروں کی جانب سے سیاسی تبدیلی کی مضبوط خواہش کو ظاہر کرتا ہے۔

انہوں نے کہا، "یہ ہمارے لیے ایک تاریخی دن ہے۔ یہ ایک شاندار کامیابی ہے... ہماری توقعات سے بھی بڑھ کر۔ ہمیں کیرلم میں غیر معمولی نتائج ملتے دکھائی دے رہے ہیں، ممکن ہے کہ 100 سے زائد نشستیں حاصل ہوں۔" انہوں نے مزید کہا کہ یہ نتیجہ ہندوستان کی سیاسی تاریخ میں ایک بڑا موڑ ثابت ہو سکتا ہے اور کیرلم میں بائیں بازو کی کمزوری اس کے آخری مضبوط گڑھ کے خاتمے کی علامت ہوگی۔ "کسی حد تک یہ ہندوستان کی جمہوری سیاسی تاریخ کے ایک بڑے باب کے اختتام کی نشاندہی ہے۔"

کانگریس کی قیادت والے یو ڈی ایف نے 140 رکنی اسمبلی میں اکثریت کا ہندسہ عبور کر لیا ہے، جبکہ ابتدائی رجحانات میں یہ وزیر اعلیٰ پینارائی وجین کی قیادت والے لیفٹ ڈیموکریٹک فرنٹ (ایل ڈی ایف) سے واضح طور پر آگے ہے۔ اس نتیجے کو ایل ڈی ایف کی 10 سالہ حکومت کے خلاف واضح عوامی ردعمل کے طور پر دیکھا جا رہا ہے، جس میں اینٹی انکمبنسی اور حکمرانی سے متعلق خدشات شامل ہیں۔

تھرور نے کہا کہ یہ مینڈیٹ ریاست میں تبدیلی اور بہتر طرز حکمرانی کا مطالبہ ہے۔ ہماری توجہ اچھی حکمرانی، تبدیلی اور گزشتہ 10 سال کے مایوس کن بیانیے کو بدلنے پر ہونی چاہیے۔ انہوں نے بے روزگاری اور ہجرت کے مسائل پر زور دیتے ہوئے کہا کہ نئی حکومت کو روزگار کے مواقع پیدا کرنے اور معاشی ترقی کو ترجیح دینی ہوگی۔ "ہم ایسا کیرلم چاہتے ہیں جہاں سرمایہ کار آئیں، کاروبار بڑھے اور ہمارے نوجوانوں کو مواقع ملیں، نہ کہ وہ ریاست چھوڑنے پر مجبور ہوں۔

وزیر اعلیٰ کے عہدے کے حوالے سے قیاس آرائیوں پر تھرور نے خود کو اس دوڑ سے باہر قرار دیتے ہوئے کہا کہ میں دہلی میں رکن پارلیمنٹ ہوں اور وہی رہوں گا... پارٹی قیادت کے پاس قابل رہنماؤں کی کوئی کمی نہیں۔ انہوں نے کہا کہ قیادت کا فیصلہ وقت آنے پر پارٹی کی مرکزی قیادت کرے گی۔

انہوں نے یہ بھی تسلیم کیا کہ اگرچہ اینٹی انکمبنسی نے کردار ادا کیا، لیکن عوام نے یو ڈی ایف کے تبدیلی اور ترقی کے پیغام کو مثبت انداز میں قبول کیا ہے۔ "لوگوں نے واضح طور پر تبدیلی کی خواہش ظاہر کی ہے۔

اس دوران کیرلم، تمل ناڈو، مغربی بنگال، آسام اور پڈوچیری سمیت اہم ریاستوں میں ووٹوں کی گنتی جاری ہے، جہاں سخت سکیورٹی انتظامات کے درمیان نتائج مسلسل سامنے آ رہے ہیں۔