نئی دہلی/ آواز دی وائس

دہلی کے وزیر مجندر سنگھ سرسا نے پیر کے روز کہا کہ گریپ مرحلہ 4 کے تحت سختی سے نافذ کیے گئے اقدامات کے مثبت نتائج سامنے آئے ہیں، حالانکہ مغربی خلل (ویسٹرن ڈسٹربنس) کے باعث قومی دارالحکومت کو اب بھی ناموافق موسمی حالات کا سامنا ہے۔ پریس کانفرنس سے خطاب کرتے ہوئے سرسا نے کہا کہ گزشتہ چند دنوں کے دوران دہلی میں موسم “انتہائی خراب” رہا، جس کے پیش نظر حکومت کو سخت پابندیاں عائد کرنا پڑیں۔ انہوں نے کہا کہ گزشتہ چار دنوں سے گریپ-4 کے تحت پابندیاں نافذ ہیں اور ہمیں اس کے اچھے نتائج نظر آ رہے ہیں۔

آلودگی پھیلانے والی صنعتوں کو خبردار کرتے ہوئے سرسا نے کہا کہ شناخت شدہ خلاف ورزی کرنے والوں کے خلاف سیل کرنے کی کارروائی شروع کر دی گئی ہے۔انہوں نے کہا کہ جن آلودگی پھیلانے والی فیکٹریوں کی نشاندہی کی گئی ہے، انہیں بغیر کسی مزید نوٹس کے سیل کر دیا جائے گا۔ انہیں پہلے ہی کئی مواقع دیے جا چکے ہیں۔ انہوں نے مزید بتایا کہ وہ صنعتیں جنہوں نے 31 اکتوبر کی آخری تاریخ تک او سی ای ایم کے لیے درخواست نہیں دی، ان کے خلاف بھی فوری سیلنگ کی کارروائی کی جائے گی۔ وزیر نے بتایا کہ گاڑیوں سے ہونے والی آلودگی کی جانچ کے لیے بڑے پیمانے پر مہم جاری ہے۔

انہوں نے کہا کہ اب تک گزشتہ چار دنوں میں 2,12,332 پولوشن انڈر کنٹرول سرٹیفکیٹس  کی جانچ کی جا چکی ہے، جن میں سے تقریباً 10 ہزار گاڑیاں ٹیسٹ میں ناکام رہی ہیں۔ سرسا نے یہ بھی کہا کہ شکایات موصول ہوئی ہیں کہ کچھ نجی کمپنیاں گریپ-4 کے تحت ورک فرام ہوم کی ہدایت پر مکمل عمل نہیں کر رہیں۔ انہوں نے خبردار کیا کہ اگر ایسی کسی کمپنی کے خلاف شکایت موصول ہوئی تو سخت کارروائی کی جائے گی۔ انہوں نے بتایا کہ دہلی میونسپل کارپوریشن (ایم سی ڈی) کے ڈپٹی کمشنرز، دہلی پولوشن کنٹرول کمیٹی (ڈی پی سی سی) کے ساتھ مل کر شہر بھر میں غیر مجاز صنعتوں کو سیل کرنے کی کارروائی شروع کر چکے ہیں۔

وزیر کے مطابق، سڑکوں کی صفائی رات کے وقت کی جا رہی ہے اور آلودگی کی سطح کم کرنے کے لیے دہلی کے کوڑے کے ڈھیروں سے روزانہ تقریباً 35 ہزار میٹرک ٹن کچرا ہٹایا جا رہا ہے۔

ماحولیاتی بحالی سے متعلق بات کرتے ہوئے سرسا نے کہا کہ حکومت ڈی ڈی اے اور دہلی ریونیو ڈیپارٹمنٹ کی مدد سے پرانے آبی ذخائر کو بحال کرنے کی کوششیں تیز کر رہی ہے۔ انہوں نے کہا کہ ہماری کوشش ہے کہ کم از کم 50 فیصد ایسے آبی ذخائر کو بحال کیا جائے جو کئی برسوں سے مکمل طور پر ختم ہو چکے ہیں، حالانکہ تجاوزات جیسے چیلنجز موجود ہیں۔