نئی دہلی: کاکروچ جنتا پارٹی  کے کارکنوں نے ہفتے کے روز زور دے کر کہا کہ اگر حکومت تعلیم کے وزیر دھرمیندر پردھان کے استعفے کے معاملے پر اپنا موقف واضح کرنے میں ناکام رہتی ہے تو تنظیم کو ’’سخت موقف‘‘ اختیار کرنے پر مجبور ہونا پڑے گا۔

صحافیوں سے گفتگو کرتے ہوئے CJP کے کارکن آشوتوش رنکا نے بتایا کہ مرکزی وزراء جے پی نڈا اور جتیندر سنگھ کے ساتھ ان کی ملاقات نتیجہ خیز رہی۔انہوں نے مزید کہا کہ حکومت کی جانب سے دھرمیندر پردھان کے استعفے کے معاملے پر اپنا موقف واضح کیے جانے کے بعد CJP اپنی آئندہ حکمت عملی طے کرے گی۔

رنکا نے کہا کہ کل کی ملاقات میں معاوضے اور قانونی معاملات کے حوالے سے مثبت پیش رفت ہوئی اور اصولی طور پر ایک معاہدہ طے پایا۔ ہمیں امید ہے کہ آج اس معاہدے کی تحریری شکل مل جائے گی۔ تاہم، ہمارے بنیادی مطالبے یعنی دھرمیندر پردھان کے استعفے کے حوالے سے کوئی ٹھوس فیصلہ نہیں کیا گیا۔ مین اسٹریم میڈیا کی رپورٹس میں ذرائع کے حوالے سے کہا جا رہا ہے کہ پردھان استعفیٰ نہیں دیں گے۔ اگر وہ استعفیٰ نہیں دے رہے ہیں تو حکومت کو یہ بات واضح طور پر کہنی چاہیے، کیونکہ ایسی صورت میں ان ملاقاتوں کو جاری رکھنے کا کوئی فائدہ نہیں۔ اس کے بعد ہم اپنے اگلے اقدامات کا فیصلہ کریں گے۔ اگر حکومت اسی انداز میں اپنا رویہ جاری رکھتی ہے تو ہمیں سخت موقف اختیار کرنے پر مجبور ہونا پڑے گا۔‘‘

تعلیم کی وزارت کی جانب سے نیشنل ٹیسٹنگ ایجنسی (NTA) کے 47 عہدیداروں کے خلاف حالیہ کارروائی پر ردعمل ظاہر کرتے ہوئے رنکا نے کہا کہ حتمی جواب دہی اب بھی وزیر تعلیم کی ہی بنتی ہے۔

انہوں نے مزید کہا، ’’ہم تفصیلات کا جائزہ لیں گے، لیکن حتمی جواب دہی وزیر تعلیم کی ہے، جو پیپر لیک اور اس کے نتیجے میں ہونے والی طلبہ کی خودکشیوں کے براہِ راست ذمہ دار ہیں۔ انہیں استعفیٰ دینا چاہیے۔ اگرچہ ہم وسیع تر اصلاحات پر بات چیت جاری رکھے ہوئے ہیں اور کل حکومت کو اپنے مطالبات کا چارٹر بھی پیش کیا ہے، لیکن ان کا استعفیٰ اب بھی ہماری بنیادی مانگ ہے۔‘‘

جمعہ کے روز وزارت تعلیم کے تحت کام کرنے والے خودمختار ادارے نیشنل ٹیسٹنگ ایجنسی (NTA) نے اس ہفتے جنرل مینیجر کی سطح پر سینئر پیشہ ور افراد کی تقرری کے لیے اشتہارات جاری کیے۔ اس کے علاوہ یونین پبلک سروس کمیشن کے پرتِبھَا سیٹو پورٹل کے ذریعے 16 نوجوان پیشہ ور افراد کی خدمات حاصل کرنے کا عمل بھی شروع کیا گیا ہے۔

ایک پریس ریلیز کے مطابق، یہ اقدامات NTA کی ادارہ جاتی ازسرنو تعمیر کی جانب پہلا ٹھوس قدم ہیں، جنہیں پروفیسر کے. رادھا کرشنن کی سربراہی میں قائم اعلیٰ سطحی ماہرین کی کمیٹی کی سفارشات کے مطابق نافذ کیا جا رہا ہے۔

مرکزی کابینہ نے بھی پبلک ایگزامینیشنز (پریوینشن آف اَن فیئر مینز) ایکٹ، 2024 میں ترامیم کی منظوری دے دی ہے، جس کا مقصد ملک بھر میں NEET-UG تنازع پر جاری احتجاج کے درمیان پیپر لیک کے خلاف قانون کو مزید مضبوط بنانا ہے۔ ادھر پارلیمنٹ میں تعطل پانچویں روز بھی جاری رہا۔ ذرائع کے مطابق مجوزہ ترمیمی بل پیر، 27 جولائی کو پارلیمنٹ میں پیش کیے جانے کا امکان ہے۔

یہ پیش رفت وزیر اعظم نریندر مودی کی جانب سے ایکس پر رات گئے جاری کیے گئے ویڈیو پیغام کے بعد سامنے آئی ہے، جس میں انہوں نے وعدہ کیا تھا کہ پیپر لیک کے خلاف ’’مزید سخت‘‘ کارروائی کی جائے گی۔ کاکروچ جنتا پارٹی کی جانب سے NEET-UG پیپر لیک کے خلاف احتجاج جاری ہے۔ ویڈیو میں وزیر اعظم نے اعلان کیا تھا کہ مرکزی کابینہ ایک مجوزہ بل پر غور کرے گی۔

سماجی کارکن سونم وانگچک نے بھی میڈیٹا اسپتال میں 26 روزہ بھوک ہڑتال ختم کر دی ہے۔ انہوں نے مرکزی وزراء جے پی نڈا اور جتیندر سنگھ کی موجودگی میں بھوک ہڑتال ختم کی۔ یہ فیصلہ NEET امتحان کے معاملے اور ملک کے مسابقتی امتحانی نظام میں اصلاحات کے حوالے سے مرکزی حکومت کی جانب سے تحریری یقین دہانی ملنے کے بعد کیا گیا۔