نئی دہلی

مرکزی حکومت نے بدھ کے روز سارتھک-پی ڈی ایس اسکیم کا اعلان کیا، جس کے لیے 25,530 کروڑ روپے مختص کیے گئے ہیں۔ اس اسکیم کا مقصد عوامی تقسیم نظام  کو جدید بنانا، لاجسٹکس کو بہتر کرنا اور مستحقین کے انتظام اور شکایات کے ازالے کے لیے مصنوعی ذہانت پر مبنی نظام متعارف کرانا ہے۔

مرکزی وزیر اطلاعات و نشریات اشونی ویشنو نے کابینہ کی بریفنگ کے دوران اس اسکیم کا اعلان کیا۔بریفنگ میں دی گئی تفصیلات کے مطابق، سارتھک-پی ڈی ایس اسکیم یکم اپریل 2026 سے 31 مارچ 2031 تک پانچ برسوں کے لیے نافذ رہے گی۔

اس اسکیم کے تحت ریاستی ایجنسیوں کو ریاست کے اندر غذائی اجناس کی نقل و حرکت، مناسب قیمت کی دکانوں (راشن کی دکانوں) کی معاونت اور عوامی تقسیم نظام کی جدید کاری کے لیے مدد فراہم کی جائے گی۔اسمارٹ پی ڈی ایس کے اگلے مرحلے کے تحت حکومت نے مصنوعی ذہانت سے لیس تین بڑے ماڈیولز نرمل، آشا اور سکشم  متعارف کرانے کا بھی اعلان کیا ہے۔

نرمل پلیٹ فارم ایک اے آئی پر مبنی حقیقی وقت کے مستحقین کے رجسٹر کے طور پر کام کرے گا اور مختلف وزارتوں کے درمیان براہِ راست انضمام (انٹیگریشن) اور مختلف اسکیموں کے درمیان ہم آہنگی فراہم کرے گا۔آشا ماڈیول ایک کثیر لسانی اے آئی شکایات اور شہری رابطہ پلیٹ فارم ہوگا، جو فون کالز، واٹس ایپ، آئی وی آر ایس  اور چیٹ بوٹس کے ذریعے کام کرے گا۔ حکومت کے مطابق یہ نظام روزانہ تین لاکھ تک رابطوں کو سنبھالنے کی صلاحیت رکھے گا۔سکشم پلیٹ فارم ایک اے آئی سے لیس سپلائی چین نظام کے طور پر کام کرے گا، جس میں گاڑیوں کی نگرانی، کیو آر کوڈ کے ذریعے ٹریکنگ، طلب کی پیش گوئی اور راستوں کی بہتر منصوبہ بندی جیسی سہولیات شامل ہوں گی۔

حکومت کا کہنا ہے کہ اس نئی ٹیکنالوجی پر مبنی نظام سے مستحق افراد کی درست شناخت ممکن ہوگی اور شہریوں کے اطمینان میں اضافہ ہوگا۔کابینہ بریفنگ میں پیش کی گئی معلومات کے مطابق، آشا اے آئی فوڈ سیکیورٹی اسسٹنٹ شہریوں کی پسندیدہ زبانوں میں شکایات کے تیز تر ازالے میں مدد فراہم کرے گا۔حکومت نے یہ بھی کہا کہ اس اسکیم سے غذائی اجناس کی نقل و حمل کا فاصلہ 15 سے 50 فیصد تک کم ہونے کی توقع ہے، جس سے اناج کی بچت ہوگی اور مقامی خریداری کو فروغ ملے گا۔

پروگرام کے تحت لاجسٹکس میں بہتری سے سالانہ تقریباً 280 کروڑ روپے کی بچت اور کاربن اخراج میں 35 فیصد کمی متوقع ہے۔اس اسکیم کے تحت غذائی اجناس کے تھیلوں پر کیو آر کوڈ والے ٹیگز اور گاڑیوں کے مقام کی نگرانی کے نظام بھی متعارف کرائے جائیں گے، تاکہ سپلائی چین میں شفافیت اور نگرانی کو مزید بہتر بنایا جا سکے۔

مرکزی حکومت کے مطابق، اس اقدام کا مقصد عوامی تقسیم نظام کو زیادہ مؤثر، ٹیکنالوجی پر مبنی اور عوام دوست بنانا ہے، جبکہ ترسیل کے نظام کو بہتر بناتے ہوئے انتظامی خامیوں اور نقصانات کو کم کرنا بھی اس کا اہم ہدف ہے۔