نئی دہلی/ آواز دی وائس

لوک سبھا میں قائدِ حزبِ اختلاف راہل گاندھی نے حکمراں بی جے پی حکومت پر الزام عائد کیا ہے کہ اس نے وکست بھارت-گارنٹی فار روزگار اینڈ آجیویکا مشن (گرامین) بل 2025 ( وی بی - جی  رام -جی  بل) پر پارلیمنٹ میں کوئی بحث نہیں ہونے دی۔راہل گاندھی نے کہا کہ یہ بل ترقی کے لیے نہیں بلکہ تباہی کے لیے ہے، جس کی قیمت عوام کو اپنی روزی روٹی کھو کر چکانی پڑے گی۔

انہوں نے لکھا کہ نہ عوامی مباحثہ، نہ پارلیمنٹ میں بحث، نہ ریاستوں کی رضامندی — مودی حکومت نے منریگا اور جمہوریت دونوں پر بلڈوزر چلا دیا ہے۔ یہ ترقی نہیں بلکہ تباہی ہے، جس کی قیمت لاکھوں محنت کش ہندوستانیوں کو اپنی روزی روٹی گنوا کر ادا کرنی پڑے گی۔ کانگریس پارلیمانی پارٹی کی چیئرپرسن محترمہ سونیا گاندھی جی کا یہ مضمون ضرور پڑھیں، جو اس سنگین مسئلے کے ہر پہلو کو بے نقاب کرتا ہے۔

پارلیمنٹ نے یہ بل 18 دسمبر کو منظور کیا تھا اور 21 دسمبر کو صدرِ جمہوریہ کی منظوری بھی مل گئی۔ اس بل کے تحت ہر دیہی گھرانے کو اجرتی روزگار کی ضمانت 100 دن سے بڑھا کر 125 دن کر دی گئی ہے، بشرطیکہ بالغ افراد غیر ہنر مند دستی کام کرنے کے لیے تیار ہوں۔ بل کی دفعہ 22 کے مطابق مرکز اور ریاستوں کے درمیان فنڈ کی شراکت کا تناسب 60:40 ہوگا، جبکہ شمال مشرقی ریاستوں، ہمالیائی ریاستوں اور مرکز کے زیر انتظام علاقوں بشمول اتراکھنڈ، ہماچل پردیش اور جموں و کشمیر کے لیے یہ تناسب 90:10 رکھا گیا ہے۔

بل کی دفعہ 6 ریاستی حکومتوں کو اجازت دیتی ہے کہ وہ مالی سال میں مجموعی طور پر 60 دن تک کا ایسا دورانیہ پہلے سے طے کر سکیں، جس میں بوائی اور کٹائی جیسے زرعی مصروف موسم شامل ہوں۔ دریں اثنا، کانگریس پارلیمانی پارٹی کی چیئرپرسن سونیا گاندھی نے ایک معروف انگریزی اخبار میں شائع اپنے حالیہ مضمون میں مرکزی حکومت پر سخت حملہ کرتے ہوئے الزام لگایا کہ وہ مہاتما گاندھی نیشنل رورل ایمپلائمنٹ گارنٹی ایکٹ (منریگا) اور دیگر اہم قوانین میں مجوزہ تبدیلیوں کے ذریعے حقوق پر مبنی قانون سازی کے ڈھانچے کو کمزور کر رہی ہے۔

‘منریگا  کی بلڈوزڈ ڈیمولیشن ’ کے عنوان سے شائع مضمون میں سونیا گاندھی نے کہا کہ دیہی روزگار اسکیم کو کمزور کرنا ایک اجتماعی اخلاقی ناکامی ہے، جس کے طویل مدتی مالی اور انسانی اثرات ملک بھر کے کروڑوں محنت کشوں پر پڑیں گے۔ انہوں نے لکھا کہ منریگا محض ایک فلاحی اسکیم نہیں بلکہ حقوق پر مبنی پروگرام تھا، جو دیہی گھرانوں کو روزگار کا تحفظ اور وقار فراہم کرتا تھا۔ ان کے مطابق اس اسکیم کا کمزور ہونا “اجتماعی اخلاقی ناکامی” ہے۔

سونیا گاندھی نے لکھا کہ منریگا نے مہاتما گاندھی کے سروودیہ (سب کی بھلائی) کے تصور کو عملی شکل دی اور کام کے آئینی حق کو نافذ کیا۔ اس کا خاتمہ ہماری اجتماعی اخلاقی ناکامی ہے، جس کے مالی اور انسانی نتائج برسوں تک ہندوستان کے کروڑوں محنت کش لوگوں کو بھگتنے پڑیں گے۔ آج پہلے سے کہیں زیادہ ضروری ہے کہ ہم متحد ہوں اور ان حقوق کا تحفظ کریں جو ہم سب کی حفاظت کرتے ہیں۔