نئی دہلی: سپریم کورٹ نے پیر کو بمبئی ہائی کورٹ کے اس فیصلے میں مداخلت کرنے سے انکار کر دیا، جس کے تحت گووا کے اس نائٹ کلب کے مالکان کو دی گئی ضمانت منسوخ کر دی گئی تھی جہاں 2025 میں آتشزدگی کے واقعے میں 25 افراد ہلاک ہوئے تھے۔ جسٹس دیپانکر دتا اور جسٹس شیل ناگو کی بینچ نے ہائی کورٹ کے 18 اگست کے حکم کو برقرار رکھتے ہوئے نارتھ گووا کے ارپورا علاقے میں واقع ’برچ بائی رومیو لین‘ نائٹ کلب کے شریک مالکان سوربھ لتھرا، گورو لتھرا اور اجے گپتا کی جانب سے دائر متعدد درخواستیں خارج کر دیں۔ 6 دسمبر 2025 کو نائٹ کلب میں زبردست آگ لگنے سے 25 افراد ہلاک اور 50 سے زیادہ زخمی ہوئے تھے۔

سپریم کورٹ نے تینوں کو دو ہفتوں کے اندر خودسپردگی کرنے کی ہدایت دی اور ماتحت عدالت کو بھی مقدمے کی سماعت تیز کرنے اور الزامات طے کرنے کے عمل میں تیزی لانے کو کہا۔ لتھرا برادران کی جانب سے پیش ہونے والے سینئر وکیل ابھیشیک ایم سنگھوی اور سدھارتھ ڈیو نے دلیل دی کہ یہ معاملہ جان بوجھ کر کیے گئے جرم کا نہیں بلکہ مبینہ غفلت کا ہے۔ ڈیو نے کہا کہ لتھرا برادران کی جانب سے ایسا کوئی عمل نہیں کیا گیا جس کے نتیجے میں لوگوں کی موت ہوئی ہو۔ انہوں نے کہا، ’’آئی پی سی کی دفعہ 304، حصہ دوم، اس معاملے میں قطعی طور پر لاگو نہیں ہو سکتی۔ میری جانب سے ایسا کوئی عمل نہیں ہوا جس سے موت واقع ہوئی ہو۔ زیادہ سے زیادہ، اگر استغاثہ اس معاملے میں کامیاب ہونا چاہتا ہے تو یہ دفعہ 304A کے تحت ہو سکتا ہے، جو غفلت سے موت واقع ہونے سے متعلق ہے۔‘

‘ جسٹس دتا نے سنگھوی سے پوچھا کہ ریسٹورنٹ میں کتنے افراد ہلاک ہوئے تھے۔ سینئر وکیل نے بتایا کہ ہلاکتوں کی تعداد 25 تھی، تاہم ہائی کورٹ کے فیصلے میں دو بنیادی غلطیاں ہیں۔ انہوں نے یہ بھی کہا کہ مقدمے میں کئی دیگر شریک ملزمان کو ضمانت دی جا چکی ہے۔ اجے گپتا کی جانب سے پیش ہونے والے سینئر وکیل شیام دیوان نے کہا کہ کاروبار میں ان کا صرف 10 فیصد حصہ ہے اور اس واقعے سے ان کا کوئی تعلق نہیں ہے۔ گوا حکومت کی جانب سے ایڈیشنل سالیسٹر جنرل ایس وی راجو اور اسٹینڈنگ کونسل سرجیندو شنکر داس نے تینوں کی درخواستوں کی مخالفت کی۔

انہوں نے عدالت کو بتایا کہ ہائی کورٹ پہلے ہی انہیں دو ہفتوں کے اندر خودسپردگی کرنے کی ہدایت دے چکی ہے۔ درخواستیں خارج کرتے ہوئے سپریم کورٹ نے کہا کہ تینوں کو آج سے دو ہفتوں کے اندر خودسپردگی کرنی ہوگی۔ آتشزدگی کے فوراً بعد لتھرا برادران تھائی لینڈ کے شہر فوکٹ چلے گئے تھے، جس کے بعد ان کے خلاف انٹرپول کا بلیو کارنر نوٹس جاری کیا گیا تھا۔ 11 دسمبر کو ہندوستانی سفارتی مشن کی مداخلت کے بعد تھائی حکام نے فوکٹ میں دونوں کو حراست میں لے لیا تھا۔ ہندوستانی مشن اس معاملے میں تھائی حکومت کے ساتھ مسلسل رابطے میں تھا۔ 16 دسمبر 2025 کو انہیں ہندوستان واپس لائے جانے کے بعد دہلی کی ایک عدالت نے گوا پولیس کو دو روزہ ٹرانزٹ ریمانڈ دے دیا تھا۔ بمبئی ہائی کورٹ نے 18 اگست کو تینوں کی ضمانت منسوخ کرتے ہوئے کہا تھا کہ ٹرائل کورٹ نے تفتیش کے دوران جمع کیے گئے شواہد پر مناسب غور نہیں کیا اور یہ مشاہدہ کرنے میں غلطی کی کہ جرم قتل یا ڈکیتی جتنا سنگین نہیں تھا۔

ہائی کورٹ نے یہ بھی کہا تھا کہ ریکارڈ پر موجود شواہد سے ظاہر ہوتا ہے کہ ریسٹورنٹ بغیر ضروری لائسنس کے چلایا جا رہا تھا اور اس کی عمارت غیر مجاز تھی۔ عدالت کے مطابق ملزمان اور ان کے شراکت دار مبینہ طور پر عمارت میں مناسب حفاظتی انتظامات کے بغیر فائر شو منعقد کرنے کے خطرات سے واقف تھے۔ لتھرا برادران اور اجے گپتا ’مَیسز بینگ جی ایس ہاسپیٹیلٹی ارپورا ایل ایل پی‘ میں شراکت دار تھے، جو مذکورہ نائٹ کلب چلاتی تھی۔ ٹرائل کورٹ نے رواں سال اپریل میں تینوں کو ضمانت دی تھی۔

ہائی کورٹ نے اپنے حکم میں تینوں ملزمان کو دو ہفتوں کے اندر سیشن کورٹ کے سامنے خودسپردگی کرنے کی ہدایت دی تھی۔ گوا حکومت نے ملزمان کو ضمانت دینے کے سیشن کورٹ کے فیصلے کو ہائی کورٹ میں چیلنج کیا تھا۔ حکومت کا کہنا تھا کہ ماتحت عدالت نے اس جرم کی سنگینی کو مناسب طور پر نہیں سمجھا، جس میں مبینہ مجرمانہ غفلت، لاپرواہی اور قانونی حفاظتی ضوابط کی خلاف ورزی کے باعث 25 افراد ہلاک ہوئے۔ ہائی کورٹ نے کہا تھا کہ ریسٹورنٹ میں فائر سیفٹی کے مناسب انتظامات اور ہنگامی اقدامات موجود نہیں تھے، جس کے نتیجے میں 25 افراد کی موت ہوئی اور ان میں سے کئی لوگ باہر نکلنے میں کامیاب نہیں ہو سکے۔

عدالت نے لائسنس حاصل کرنے کے لیے مبینہ طور پر جعلی دستاویزات استعمال کیے جانے کے الزامات کا بھی حوالہ دیا اور کہا کہ عمارت غیر مجاز تھی، جس کے بارے میں ملزمان اور ان کے شراکت دار مبینہ طور پر جانتے تھے۔ ہائی کورٹ نے کہا تھا کہ سیشن کورٹ نے یہ مشاہدہ کرکے غلطی کی کہ جرم قتل یا ڈکیتی جتنا سنگین نہیں تھا۔ عدالت نے زور دیا کہ مبینہ جرم کی سنگینی کو کم نہیں کیا جا سکتا۔ تاہم ہائی کورٹ نے ملزمان کو یہ آزادی دی تھی کہ خودسپردگی کے بعد وہ دوبارہ ضمانت کی درخواست دائر کر سکتے ہیں، جس پر ٹرائل کورٹ قانون کے مطابق اپنے میرٹ کی بنیاد پر فیصلہ کرے گی۔