نئی دہلی

راہل گاندھی کی جانب سے ہندوستان-امریکہ عبوری تجارتی معاہدے پر سوال اٹھانے والی حالیہ ویڈیو کے جواب میں مرکزی وزیر گری راج سنگھ نے کانگریس کے رکن پارلیمنٹ پر ’’غلط معلومات پھیلانے‘‘ اور حقائق کو نہ سمجھنے کا الزام عائد کیا ہے۔

راہل گاندھی کو جواب دیتے ہوئے ’ایکس‘ پر ایک پوسٹ میں گری راج سنگھ نے وضاحت کی کہ ہندوستان اس سے زیادہ متوازن اور بہتر تجارتی معاہدہ حاصل نہیں کر سکتا تھا۔ انہوں نے کہا کہ یہ تجارتی معاہدہ مجموعی طور پر صنعت کی ترقی کو فروغ دینے کے ساتھ ساتھ ہندوستانی کسانوں کے مفادات کے تحفظ کے لیے ترتیب دیا گیا ہے۔

انہوں نے لکھا كہ راہل گاندھی حسبِ معمول حقائق کو سمجھے بغیر غلط معلومات پھیلا رہے ہیں۔ حقیقت یہ ہے کہ ہندوستان نے امریکہ کے ساتھ اپنے کئی مسابقتی ممالک کے مقابلے میں کہیں زیادہ بہتر اور متوازن تجارتی معاہدہ حاصل کیا ہے۔ یہ معاہدہ صنعت کی ترقی کو سہارا دینے اور ہمارے کسانوں کے مفادات کے تحفظ کے لیے جامع انداز میں تیار کیا گیا ہے۔ ہندوستان کی کپاس کی برآمدات کی کہانی پہلے سے زیادہ مضبوط اور متنوع ہے۔‘

مرکزی وزیر نے کہا کہ اس وقت ہندوستان کی ٹیکسٹائل برآمدات کسی ایک ملک تک محدود نہیں ہیں بلکہ 100 سے زائد ممالک میں ان میں اضافہ ہوا ہے۔ انہوں نے یہ بھی کہا کہ یورپی یونین، برطانیہ، نیوزی لینڈ، عمان اور دیگر اسٹریٹجک شراکت داروں کے ساتھ مسلسل آزاد تجارتی معاہدوں کے ذریعے ہندوستانی برآمد کنندگان کے لیے مختلف خطوں میں نئے مواقع پیدا ہو رہے ہیں۔

سنگھ نے مزید کہا كہ ہم صرف ایک ہی منڈی پر منحصر نہیں ہیں۔ آج ہندوستان کی ٹیکسٹائل برآمدات 100 سے زائد ممالک میں بڑھ رہی ہیں، جو ہماری ٹیکسٹائل ویلیو چین پر عالمی اعتماد، مسابقت اور مضبوطی کی عکاسی کرتی ہیں۔ یورپی یونین، برطانیہ، نیوزی لینڈ، عمان اور دیگر شراکت داروں کے ساتھ ایف ٹی ایز پر مسلسل پیش رفت کے باعث ہمارے برآمد کنندگان کے لیے متعدد جغرافیائی خطوں میں نئے مواقع کھل رہے ہیں۔

انہوں نے وضاحت کی کہ منڈی تک رسائی میں توسیع سے خطرات میں تنوع آئے گا، قیمتوں کی بہتر وصولی ممکن ہوگی اور کسانوں، جنرز، اسپنرز اور ٹیکسٹائل صنعت سے وابستہ اداروں کے لیے طویل مدتی مضبوط ترقی کو فروغ ملے گا۔ مرکزی وزیر نے کہا کہ وزیر اعظم نریندر مودی کی قیادت میں ہندوستان نے 58 سے زائد نئی منڈیوں تک ٹیکسٹائل کی آزاد تجارتی رسائی حاصل کی ہے، جس سے برآمد کنندگان کے لیے 470 ارب امریکی ڈالر کی برآمدی صلاحیت پیدا ہوئی ہے، جبکہ 120 ارب امریکی ڈالر کی امریکی ٹیکسٹائل منڈی تک مضبوط رسائی بھی حاصل ہے، جس سے عالمی تجارت میں ہندوستان کی موجودگی مزید مضبوط ہوئی ہے۔