ایویان 

امریکی صدر  ٹرمپ نے بدھ کے روز 2015 کے ایران جوہری معاہدے  پر سخت تنقید کرتے ہوئے سابق امریکی صدر  اوباما پر الزام لگایا کہ انہوں نے اس معاہدے کے تحت تہران کو نقد رقم دے کر مؤثر طور پر "رشوت" دینے کی کوشش کی تھی۔جی 7 سربراہی اجلاس کے موقع پر مصر کے صدر کے ساتھ دوطرفہ ملاقات کے دوران گفتگو کرتے ہوئے ٹرمپ نے کہا کہ اوباما انتظامیہ کے دور میں طے پانے والے جوائنٹ کمپری ہینسو پلان آف ایکشن کے تحت ایران کو بڑی مقدار میں مالی وسائل منتقل کیے گئے تھے، جن میں 1.7 ارب امریکی ڈالر نقد رقم بھی شامل تھی۔

ٹرمپ نے کہا کہ اوباما کے دور میں ہونے والے  جے پی سی او اے معاہدے میں انہیں 1.7 ارب ڈالر نقد دیے گئے، سیکڑوں ملین ڈالر اور پھر اربوں ڈالر مزید دیے گئے۔ لیکن 1.7 ارب ڈالر نقد رقم بینکوں سے نکال کر ایک بوئنگ 757 طیارے میں ایران بھیجی گئی۔انہوں نے دعویٰ کیا کہ ایران نے اس رقم کو امریکہ کی جانب سے معاہدہ حاصل کرنے کی کوشش کے طور پر دیکھا۔

ٹرمپ نے کہا کہ وہ طیارے کے پاس کھڑے تھے اور کہہ رہے تھے، 'یہ دیکھو، ہمیں کتنی رقم دی جا رہی ہے۔' اوباما نے اس معاہدے کو حاصل کرنے کے لیے رشوت دینے کی کوشش کی، لیکن میں نے ایسا نہیں کیا۔اپنی تنقید جاری رکھتے ہوئے ٹرمپ نے کہا کہ اس ادائیگی کے باوجود امریکہ ایران کی خیرسگالی حاصل کرنے میں ناکام رہا اور ایرانی قیادت نے اوباما کا مذاق اڑایا۔

انہوں نے کہا کہ کوئی اس بات کا ذکر نہیں کرتا۔ 1.7 ارب ڈالر نقد اور اس کے علاوہ اربوں ڈالر دیے گئے۔ انہوں نے اس معاہدے کے لیے راستہ خریدنے کی کوشش کی، لیکن ایرانیوں نے اوباما پر ہنسی اڑائی۔یاد رہے کہ 2015 میں ایران اور چھ عالمی طاقتوں کے درمیان طے پانے والے  جے پی سی او اے کے تحت تہران کے جوہری پروگرام پر پابندیاں عائد کی گئی تھیں جبکہ اس کے بدلے میں اقتصادی پابندیوں میں نرمی دی گئی تھی۔ ٹرمپ نے اپنے پہلے صدارتی دور میں 2018 میں امریکہ کو اس معاہدے سے الگ کر لیا تھا اور اسے تاریخ کے "بدترین" معاہدوں میں سے ایک قرار دیا تھا۔

دریں اثنا، ایران کے ساتھ مجوزہ امن معاہدے پر دستخط سے صرف 48 گھنٹے قبل ٹرمپ نے خبردار کیا کہ مفاہمتی یادداشت  ابھی حتمی نہیں ہے اور اگر ایران طے شدہ شرائط پر عمل نہ کرے تو جنگ دوبارہ شروع ہو سکتی ہے۔صحافیوں کے ایک سوال کے جواب میں ٹرمپ نے کہا کہ یہ حتمی معاہدہ نہیں ہے۔ یہ ایک مفاہمتی یادداشت ہے، اور اگر مجھے یہ پسند نہ آئی تو ہم دوبارہ فائرنگ اور بمباری کی طرف واپس جا سکتے ہیں۔ اگر وہ مناسب رویہ اختیار نہ کریں تو ہم دوبارہ ان کے خلاف بمباری کریں گے۔

اس سے قبل امریکی نائب صدر  وینس نے پیر کو کہا تھا کہ دونوں فریقین معاہدے پر "ڈیجیٹل طور پر دستخط" کر چکے ہیں، تاہم ایران کو کسی بھی قسم کی پابندیوں میں نرمی یا مالی فوائد اسی صورت میں حاصل ہوں گے جب وہ معاہدے کی تمام شرائط پر عمل کرے گا۔اے بی سی کے پروگرام گڈ مارننگ امریکہ میں گفتگو کرتے ہوئے وینس نے کہا کہ ہم نے کل ہی معاہدے پر ڈیجیٹل دستخط کر دیے تھے، لیکن ایران کو کوئی رقم جاری نہیں کی گئی اور نہ ہی ایسا ہونے والا ہے۔

یہ پیش رفت ایسے وقت میں سامنے آئی ہے جب ٹرمپ نے پیر کے روز ان خبروں کو "جعلی خبر" قرار دیا تھا جن میں دعویٰ کیا گیا تھا کہ امریکہ نئے امن معاہدے کے تحت ایران کو 300 ملین ڈالر فراہم کرے گا۔

اپنے سوشل میڈیا پلیٹ فارم ٹروتھ سوشل پر ٹرمپ نے لکھا کہ ایران اس بات پر متفق ہو گیا ہے کہ وہ کبھی جوہری ہتھیار حاصل نہیں کرے گا۔ اور یہ خبر کہ امریکہ ایران کو 300 ملین ڈالر ادا کر رہا ہے، مکمل طور پر جھوٹی خبر ہے۔