نئی دہلی: بالی ووڈ اداکار سلمان خان کے گھر فائرنگ اور بابا صدیقی قتل کیس کے ملزم، گینگسٹر انمول بشنوی کو آج امریکہ سے بھارت لایا گیا ہے۔ لورنس بشنوی کے بھائی انمول کو امریکہ سے ڈی پورٹ کیا گیا اور وہ آج دہلی ائرپورٹ پر پہنچا، جہاں این آئی اے نے اسے گرفتار کر لیا۔ اس کے ساتھ دیگر ڈی پورٹ کیے گئے لوگ بھی اسی پرواز سے بھارت لائے گئے۔

امریکہ میں مقیم انمول بشنوی 2022 سے فرار تھا۔ وہ اپنے جیل میں قید بھائی لورنس بشنوی کے زیرِ انتظام دہشت گردی کے نیٹ ورک کا 19واں ملزم ہے۔ این آئی اے نے مارچ 2023 میں اس کے خلاف چارج شیٹ دائر کی تھی۔ این آئی اے کی تحقیقات کے مطابق، انمول نے 2020 سے 2023 کے درمیان گولڈی برار اور لورنس بشنوی کو کئی دہشت گردانہ کارروائیوں میں براہِ راست مدد فراہم کی۔

وہ منصوبہ بندی میں شامل رہا اور بھارت میں مختلف جرائم کی سازش میں اہم کردار ادا کرتا رہا۔ انمول بشنوی امریکہ سے ہی بشنوی گینگ کا نیٹ ورک سنبھال رہا تھا۔ وہ گینگ کے شوٹرز اور گراؤنڈ آپریٹو کو ہدایات دیتا اور انہیں ٹھکانے و لاجسٹک سپورٹ فراہم کرتا تھا۔ تحقیقات میں یہ بھی سامنے آیا کہ انمول بیرون ملک سے ہی بھارت میں بھتہ وصول کرتا تھا۔ اس کے لیے وہ دیگر گینگسٹرز کی مدد لیتا اور گینگ کی سرگرمیاں چلاتا رہا۔

انمول بشنوی پر کئی ہائی پروفائل کیسز میں تحقیقات زیرِ التوا ہیں۔ مرکزی حکومت یہ فیصلہ کرے گی کہ آگے اس کی تحویل کس ایجنسی کو دی جائے۔ مہاراشٹرا پولیس کے ایک افسر نے بتایا کہ انمول سلمان خان کے گلیکسی اپارٹمنٹ پر اپریل 2024 میں ہوئی فائرنگ کیس میں بھی مطلوب ہے۔ ممبئی پولیس بھی اسے اپنی تحویل میں لینے کے لیے عدالت میں درخواست دائر کرے گی۔

ممبئی پولیس نے انمول کے استرداد کے لیے دو پروپوزل بھیجے تھے اور پورے ملک میں اس کے خلاف کئی کیسز درج ہیں۔ اس ماہ کے شروع میں ایجنسیوں کو اطلاع ملی تھی کہ انمول، جو امریکہ اور کینیڈا کے درمیان اپنی لوکیشن بدلتا رہتا تھا، اسے کینیڈا میں حراست میں لیا گیا۔ اس کے پاس سے جعلی دستاویزات پر بنایا گیا روسی پاسپورٹ بھی ملا۔

پچھلے سال نومبر میں اسے امریکہ میں بھی حراست میں لیا گیا تھا۔ این آئی اے نے اس کے سر پر 10 لاکھ روپے کا انعام رکھا ہوا تھا۔ انمول بشنوی کا نام 2022 میں پنجابی گلوکار سدھو موسے والا کے قتل کیس میں بھی سامنے آیا تھا۔ جبکہ این سی پی رہنما اور مرحوم بابا صدیقی کے بیٹے ذیشان صدیقی نے کہا کہ انہیں ایک ای میل کے ذریعے بتایا گیا کہ انمول بھارت بھیجا جا رہا ہے۔

ذیشان نے کہا کہ انمول کو بھارت لا کر اس کے جرائم کی سزا دی جانی چاہیے۔ سابق وزیر بابا صدیقی کو 12 اکتوبر 2024 کو بندرہ میں ان کے بیٹے کے دفتر کے باہر فائرنگ کرکے قتل کر دیا گیا تھا۔ لورنس بشنوی گینگ سے تعلق رکھنے والے کئی افراد اس کیس میں گرفتار کیے گئے۔ ممبئی پولیس نے اس معاملے میں MCOCA کے سخت اقدامات بھی کیے۔

اس کیس میں کل 26 ملزمان کو گرفتار کیا جا چکا ہے، جبکہ انمول بشنوی، شبھم لونکر اور ذیشان محمد اختر اب تک مطلوب تھے۔ اب امریکہ سے انمول کی واپسی کے بعد ان تمام کیسز میں تحقیقات میں تیزی آنے کی توقع ہے۔