رشیکیش: اتراکھنڈ کے گڑھوال علاقے میں مسلسل بارش کے باعث گنگا ندی میں پانی کی سطح تیزی سے بڑھ گئی ہے اور دریائے گنگا خطرے کے نشان سے تقریباً 50 سینٹی میٹر نیچے بہہ رہی ہے۔ تروینی گھاٹ سمیت مختلف گھاٹوں پر پانی کا بہاؤ انتہائی تیز ہو گیا ہے۔

انتظامیہ نے ایس ڈی آر ایف، جل پولیس اور ڈیزاسٹر ریلیف ٹیم کے ذریعے لاؤڈ اسپیکر سے اعلان کر کے عقیدت مندوں، مقامی باشندوں اور سیاحوں سے فوری طور پر ندی کے کناروں سے محفوظ مقامات پر منتقل ہونے کی اپیل کی ہے۔ افسران کے مطابق مسلسل بارش اور ڈیموں سے پانی چھوڑے جانے کے باعث گنگا کی سطح مزید بڑھنے کا خدشہ ہے۔

دیہرادون پولیس کو ہائی الرٹ پر رکھا گیا ہے اور حساس علاقوں میں مسلسل گشت کیا جا رہا ہے۔ ایس ڈی آر ایف کے حکام نے لوگوں سے کہا ہے کہ وہ گنگا میں نہانے یا کنارے جانے سے گریز کریں، انتظامیہ کی ہدایات پر عمل کریں اور کسی بھی ہنگامی صورتحال میں فوری طور پر کنٹرول روم یا ریسکیو ٹیموں سے رابطہ کریں۔