بھدرواہ/ آواز دی وائس
جموں و کشمیر کے ضلع ڈوڈہ کے بھدرواہ کے بلند و بالا علاقوں میں تازہ برف باری نے سیاحوں کو خوشی سے سرشار کر دیا۔ خوبصورت وادی میں برف باری کی توقع لیے پہنچنے والے سیاحوں کی دیرینہ خواہش پوری ہو گئی۔ ملک کے مختلف حصوں، خصوصاً مہاراشٹر سے آئے سیاحوں نے بتایا کہ انہوں نے پہلی بار برف باری دیکھی ہے اور اسے ایک خوشگوار حیرت قرار دیا۔
بھدرواہ–پٹھانکوٹ شاہراہ کے ساتھ واقع گلدنڈہ (9,555 فٹ)، پنج نالہ (10,200 فٹ) اور چترگلہ (10,500 فٹ) میں بڑی تعداد میں سیاح جمع ہوئے تاکہ برف سے ڈھکے خوبصورت پہاڑی مناظر سے لطف اندوز ہو سکیں۔
نئے سال کے دن ہونے والی برف باری نے دو ماہ سے زائد کے خشک موسم کا سلسلہ توڑ دیا اور بھدرواہ وادی میں سیاحت کی بحالی کی امیدیں جگا دی ہیں، جہاں روزانہ سینکڑوں سیاحتی گاڑیاں اہم مقامات تک پہنچ رہی ہیں۔ کئی سیاحوں نے برف باری کو جادوئی اور دل موہ لینے والا تجربہ قرار دیا، جس نے خاص طور پر پہلی بار آنے والوں کے لیے یادگار لمحات رقم کر دیے۔
مہاراشٹر کے شہر ناسک سے تعلق رکھنے والی 18 سالہ آرتی گالپے نے کہا کہ شدید برف باری کی وجہ سے بہت سردی ہے، لیکن ہم اس کے ہر لمحے سے لطف اندوز ہو رہے ہیں۔ برف سے ڈھکا ہوا منظر بے حد خوبصورت ہے اور پہلی بار یہ تجربہ کرنا ایسی یاد ہے جسے ہم ہمیشہ یاد رکھیں گے۔مہاراشٹر سے تعلق رکھنے والے ایک اور سیاح دتاتریہ فاؤڈے نے کہا کہ پہلی بار برف باری دیکھنا کسی پریوں کی کہانی جیسا لگتا ہے۔ انہوں نے کہا کہ یہ سب میں نے صرف فلموں میں دیکھا تھا، یہ جگہ دیکھنے کے قابل ہے اور ہر کسی کو زندگی میں کم از کم ایک بار ضرور آنا چاہیے۔
ناسک سے آئے ویاؤ داترو نے بتایا کہ وہ گزشتہ سات برسوں سے ویشنو دیوی کے درشن کے لیے آ رہے ہیں اور یہ ان کا بھدرواہ کا پہلا دورہ ہے۔ انہوں نے کہا کہ اس بار ہم نے بھدرواہ آنے کا بھی فیصلہ کیا اور یہ فیصلہ ہمارے لیے یادگار ثابت ہو رہا ہے۔ میرا مشورہ ہے کہ جو بھی کشمیر کی سیر کے لیے آئے، وہ یہاں بھی ضرور آئے تاکہ اس کا سفر مزید یادگار بن جائے۔"
