نئی دہلی

کانگریس کے جنرل سکریٹری جے رام رمیش نے بدھ کے روز مرکزی وزیر برائے قبائلی امور جویل اورام کو خط لکھ کر مطالبہ کیا کہ گریٹ نکوبار پروجیکٹ کے تناظر میں فاریسٹ رائٹس ایکٹ پر حرف بہ حرف عمل درآمد یقینی بنایا جائے۔سابق وزیرِ ماحولیات نے یہ دعویٰ بھی کیا کہ مرکزی حکومت کا یہ کہنا سراسر غلط ہے کہ قبائلی برادریوں کے تحفظ کے لیے تمام قانونی طریقۂ کار اور پالیسی تحفظاتی اقدامات پر مکمل طور پر عمل کیا گیا ہے۔

انہوں نے کہا کہ قبائلی امور کی وزارت کو قبائلی برادریوں کے حقوق اور فاریسٹ رائٹس ایکٹ کے تحت مقررہ طریقۂ کار کی سنگین خلاف ورزیوں کو سنجیدگی سے لینا چاہیے اور ضروری کارروائی کرنی چاہیے۔جے رام رمیش نے اپنے خط میں کہا، "یکم مئی 2026 کو مرکزی حکومت کی جانب سے جاری کردہ ’دی گریٹ نکوبار پروجیکٹ: ایف اے کیو‘ میں کہا گیا ہے کہ گریٹ نکوبار جزیرہ منصوبے میں قبائلی برادریوں کے تحفظ کے لیے تمام قانونی طریقۂ کار اور پالیسی تحفظاتی اقدامات پر مناسب طریقے سے عمل کیا گیا ہے۔ جاراوا پالیسی 2004 اور شومپین پالیسی کے مطابق، انتھروپولوجیکل سروے آف انڈیا، قبائلی امور کی وزارت اور دیگر متعلقہ فریقوں سمیت ماہرین سے ضروری مشاورت کی گئی تھی۔

انہوں نے دعویٰ کیا کہ یہ تمام باتیں مکمل طور پر جھوٹ ہیں۔انہوں نے کہا کہ فاریسٹ رائٹس ایکٹ 2006 کے نفاذ کے لیے نوڈل ایجنسی ہونے کے ناطے قبائلی امور کی وزارت کو گریٹ نکوبار جزیرہ منصوبے کے معاملے میں قبائلی برادریوں کے حقوق اور اس تاریخی قانون کے تحت مقررہ طریقۂ کار کی سنگین خلاف ورزیوں کو سنجیدگی سے لینا چاہیے اور فوری طور پر قابلِ اعتماد اصلاحی اقدامات کرنے چاہئیں۔

جے رام رمیش کے مطابق، فاریسٹ رائٹس قانون کے تحت قبائلی برادریوں کی رہائش والی گرام سبھا کے لیے ضروری ہے کہ وہ جنگلاتی زمین کے کسی دوسرے استعمال کی منظوری سے متعلق ہر تجویز پر غور کرے اور یہ تصدیق بھی کرے کہ اس قانون کے تحت ان کے تمام دعوؤں کا تصفیہ کر دیا گیا ہے، اس کے بعد ہی ایسی جنگلاتی زمین کو کسی اور مقصد کے لیے استعمال کرنے کی اجازت دی جا سکتی ہے۔

انہوں نے کہا کہ سپریم کورٹ نے 18 اپریل 2023 کو نیام گیری معاملے میں اپنے فیصلے میں واضح کیا تھا کہ فاریسٹ رائٹس ایکٹ 2006 کے تحت ایسی منظوری لازمی ہے۔