نئی دہلی

وزیرِ اعظم نریندر مودی ہفتے کے روز فرانس کے سرکاری دورے اور سلوواکیہ کے ریاستی دورے پر روانہ ہو گئے، جس کا مقصد یورپی ممالک کے ساتھ تعلقات کو مزید گہرا کرنا اور شراکت داری کو مضبوط بنانا ہے۔وزیرِ اعظم مودی فرانس کے صدر ایمانوئل میکرون کی دعوت پر فرانس اور جمہوریہ سلوواکیہ کے وزیرِ اعظم رابرٹ فیکو کی دعوت پر سلوواکیہ کا دورہ کر رہے ہیں۔

روانگی سے قبل جاری اپنے بیان میں وزیرِ اعظم نے کہا کہ فرانس، ہندوستان کے تزویراتی وژن میں ایک خاص مقام رکھتا ہے۔انہوں نے کہا کہ اس سال کے آغاز میں صدر میکرون نے ہندوستان کا دورہ کیا تھا اور ہم نے اپنے تعلقات کو ایک خصوصی عالمی تزویراتی شراکت داری کی سطح تک پہنچایا تھا۔ جب میں نیس میں صدر میکرون سے ملاقات کروں گا تو فروری کے بعد ہونے والی پیش رفت کا جائزہ لیں گے اور باہمی تعاون کے اگلے مراحل طے کریں گے۔ میں باہمی دلچسپی کے اہم عالمی مسائل پر بھی ان سے تبادلۂ خیال کا منتظر ہوں۔

وزیرِ اعظم مودی نے بتایا کہ وہ 14 جون 2026 کو نیس میں صدر میکرون کے ساتھ مل کر ’’بھارت اِنووویٹس‘‘ پروگرام کا افتتاح کریں گے۔انہوں نے کہا کہ ہندوستان-فرانس سالِ اختراع کے پس منظر میں منعقد ہونے والا یہ تاریخی پروگرام، ہندوستان کے سب سے امید افزا اسٹارٹ اپس کو عالمی سرمایہ کاری سے جوڑے گا اور ہندوستان کے اعلیٰ تعلیمی نظام سے ابھرنے والی اختراعات کو نئی رفتار فراہم کرے گا۔

نیس سے وزیرِ اعظم مودی 14 سے 15 جون 2026 تک ریاستی دورے پر سلوواکیہ جائیں گے۔ یہ 1993 میں سلوواکیہ کی آزادی کے بعد کسی ہندوستانی وزیرِ اعظم کا پہلا دورہ ہوگا۔انہوں نے کہا کہ یہ تاریخی دورہ ہمارے دوطرفہ تعلقات میں پیدا ہونے والی مضبوط رفتار کو مزید آگے بڑھائے گا۔ میں براٹیسلاوا میں صدر پیٹر پیلیگرینی اور وزیرِ اعظم فیکو سے ملاقاتوں کا منتظر ہوں۔ مجھے سلوواکیہ کے کاروباری رہنماؤں سے بھی ملاقات کا موقع ملے گا۔ ہندوستان-یورپی یونین آزاد تجارتی معاہدے کی پیش رفت کی بنیاد پر یہ دورہ یورپی یونین کے ساتھ ہماری تزویراتی شراکت داری کو مزید تقویت دے گا، جس کا سلوواکیہ ایک اہم اور قابلِ قدر رکن ہے۔

وزیرِ اعظم نے کہا کہ سلوواکیہ سے وہ ایویان جائیں گے، جہاں 16 اور 17 جون 2026 کو منعقد ہونے والی جی-7 سربراہی کانفرنس میں شرکت کریں گے۔انہوں نے کہا کہ جی-7 میں ہندوستان کی موجودگی ہمارے شراکت داروں کے اعتماد اور عالمی سطح پر ہمارے بڑھتے ہوئے کردار کی عکاسی کرتی ہے۔ یہ مسلسل آٹھویں جی-7 سربراہی کانفرنس ہے جس میں ہندوستان کو مدعو کیا گیا ہے۔ جی-7 میں ہندوستان صرف اپنی نمائندگی نہیں کرے گا بلکہ عالمی جنوب کی امنگوں کی بھی آواز بنے گا۔

وزیرِ اعظم مودی نے بتایا کہ وہ 18 جون 2026 کو پیرس میں اپنے فرانس کے دورے کا اختتام کریں گے، جہاں صدر میکرون کے ساتھ ویوا ٹیک 2026 میں شرکت کریں گے۔انہوں نے کہا کہ ویوا ٹیک یورپ کا سب سے بڑا ٹیکنالوجی اور اختراع کا اجتماع ہے اور اس بار ہندوستان کا قومی پویلین سب سے بڑا ہوگا، جو ہندوستانی اور یورپی اختراعی نظاموں کے درمیان شراکت داری کے بے پناہ امکانات کی علامت ہے۔ میں پیرس میں مقیم متحرک ہندوستانی برادری سے ملاقات کا بھی منتظر ہوں، جو ہمارے دونوں ممالک کے درمیان ایک زندہ پل کا کردار ادا کر رہی ہے۔

وزیرِ اعظم نے کہا کہ مجھے یقین ہے کہ فرانس اور سلوواکیہ کے میرے دورے یورپ اور جی-7 کے ساتھ ہندوستان کے بڑھتے ہوئے روابط کو مزید مضبوط کریں گے اور براعظمِ یورپ اور اس سے آگے اپنے شراکتی دائرہ کار کو وسعت دینے کے ہمارے پختہ عزم کو اجاگر کریں گے۔

انہوں نے سوشل میڈیا پلیٹ فارم ایکس پر بھی لکھا کہ آئندہ چند روز کے دوران میں فرانس اور سلوواکیہ میں مختلف پروگراموں میں شرکت کروں گا، جن میں دوطرفہ مذاکرات، کثیرالجہتی سرگرمیاں اور بیرونِ ملک مقیم ہندوستانی برادری سے ملاقات شامل ہیں۔ اس دورے کی توجہ اقتصادی اور ثقافتی روابط کو فروغ دینے پر مرکوز رہے گی۔وزیرِ اعظم کی جی-7 سربراہی کانفرنس میں شرکت عالمی جنوب کی ایک مؤثر آواز اور عالمی چیلنجوں سے نمٹنے میں ایک اہم شراکت دار کے طور پر ہندوستان کے مقام کی عکاسی کرتی ہے۔

اسی طرح ’’بھارت اِنووویٹس‘‘ اور ’’ویوا ٹیک 2026‘‘ میں ان کی شرکت، ہندوستان کو اختراع، ڈیجیٹل تبدیلی اور کاروباری سرگرمیوں کے عالمی مرکز کے طور پر نمایاں کرے گی اور توقع کی جا رہی ہے کہ اس سے ہندوستانی، فرانسیسی اور یورپی ٹیکنالوجی ماحولیاتی نظاموں کے درمیان نئی شراکت داریاں وجود میں آئیں گی۔

یہ دورہ یورپی یونین کے ساتھ وسیع تر تزویراتی شراکت داری کو آگے بڑھانے کے لیے ہندوستان کے عزم کی بھی توثیق کرے گا۔