گوہاٹی: آسام کے وزیراعلیٰ ہیمنت بسوا سرما نے پیر کو بتایا کہ گزشتہ ماہ آنے والے سیلاب سے ریاست میں تقریباً 480 کروڑ روپے کا نقصان ہوا اور 26,681 مکانات متاثر ہوئے۔ انہوں نے کہا کہ حالیہ سیلاب سے متاثر ہونے والے 96,842 خاندانوں کو فی خاندان 15 ہزار روپے کی مالی امداد فراہم کی جا چکی ہے۔ حکومت سیلاب سے متاثرہ اضلاع میں پردھان منتری آواس یوجنا (PMAY) کے تحت مکانات کی تعمیر کا کام بھی تیز کرے گی۔

گوہاٹی میں ایک پریس کانفرنس سے خطاب کرتے ہوئے سرما نے کہا کہ چرائی دیو، سیوا ساگر، جورہاٹ اور گولا گھاٹ اضلاع میں نقصانات کا تیزی سے جائزہ لینے کا کام جاری ہے۔ انہوں نے کہا، ’’نقصانات کے جائزے کے دوسرے مرحلے کا سروے 10 یا 11 ستمبر تک مکمل ہوجائے گا۔ اگر کسی کو شکایت ہے تو ہماری ٹیم تیسرے مرحلے میں بھی نقصانات کا جائزہ لینے کے لیے تیار رہے گی۔ ہمارا ہدف ہے کہ درگا پوجا سے قبل سیلاب سے متاثرہ خاندانوں کو نقصانات کی رقم جاری کردی جائے۔‘‘

وزیراعلیٰ نے کہا کہ وزیراعظم نریندر مودی سے مشاورت کے بعد ریاستی حکومت چرائی دیو اور سیوا ساگر میں پردھان منتری آواس یوجنا کے اہل مستحقین کے لیے مکانات کی تعمیر کا عمل تیز کرنے کی کوشش کرے گی۔ مالی امداد کے بارے میں سرما نے بتایا، ’’اب تک 96,842 سیلاب متاثرہ خاندانوں کو فی خاندان 15 ہزار روپے کی مالی امداد دی جا چکی ہے۔ ریاستی حکومت اس پر 146.26 کروڑ روپے خرچ کر چکی ہے۔ ممکن ہے کہ مزید 3,000 سے 4,000 خاندانوں کو بھی یہ مالی امداد فراہم کرنا پڑے۔‘‘ اتوار کو وزیراعلیٰ سرما نے سیلاب سے متاثرہ سیوا ساگر، چرائی دیو، جورہاٹ اور گولا گھاٹ اضلاع میں جاری امدادی، بحالی اور تعمیرِ نو کی سرگرمیوں کا جائزہ لیا۔

جائزہ اجلاس کے دوران انہوں نے افسران کو بحالی کا کام تیز کرنے اور ہر متاثرہ خاندان تک بروقت امداد اور ضروری سہولیات پہنچانے کی ہدایت دی۔ اجلاس میں نقصانات کا جائزہ، عبوری امداد، اسکولوں اور آنگن واڑی مراکز کی بحالی، بینک قرضوں کی ادائیگی میں مہلت، انشورنس دعووں اور طبی و ویٹرنری کیمپوں سمیت مختلف امور کا جائزہ لیا گیا۔ وزیراعلیٰ نے ایکس پر لکھا، ’’تقریباً 150 کروڑ روپے عبوری امداد کے طور پر جاری کیے جا چکے ہیں۔ باقی دعوے کل تک نمٹا دیے جائیں گے۔‘

‘ انہوں نے مزید بتایا کہ سیلاب سے ہونے والے نقصانات کا 75 فیصد جائزہ مکمل کرلیا گیا ہے اور باقی کام فوری طور پر مکمل کرنے کے لیے ایک ہزار سے زائد سروے کرنے والے اہلکار میدان میں موجود ہیں۔ سرما نے کہا کہ 793 اسکولوں کی مرمت جاری ہے اور انہیں دوبارہ کلاسیں شروع ہونے تک تیار کرلیا جائے گا۔ سڑکوں اور دیگر عوامی بنیادی ڈھانچے کی تعمیرِ نو ترجیحی بنیادوں پر کی جا رہی ہے۔ سیوا ساگر کے نشیبی علاقوں سے پانی نکالنے کے لیے زیادہ گنجائش والے پمپ چوبیس گھنٹے چلائے جا رہے ہیں۔ صحت کے کیمپوں میں بھی اضافہ کیا جا رہا ہے اور کسی بھی بیماری کے پھیلنے کی صورت حال پر قریبی نظر رکھی جا رہی ہے۔

انہوں نے بتایا کہ قرضوں میں راحت اور انشورنس دعووں کا بھی جائزہ لیا گیا ہے اور تمام اہل افراد سے کہا گیا ہے کہ وہ 30 اگست تک اپنے دعوے جمع کرائیں۔ آسام کے وزیراعلیٰ نے کہا، ’’ہم معاوضے اور دیگر فوائد کو ہر گھر تک پہنچانے کے لیے نقشہ تیار کر رہے ہیں۔ افسران کے لیے میری ہدایات واضح ہیں: کوئی بھی پیچھے نہ رہ جائے، رفتار پر کوئی سمجھوتہ نہیں ہوگا اور غفلت برتنے کے لیے صفر برداشت کی پالیسی ہوگی۔‘

‘ آسام حکومت کے مطابق 12 اگست کو ریاست تقریباً 1,000 کروڑ روپے ان لوگوں کی امداد، معاونت اور بحالی پر خرچ کرے گی جو 19 جولائی سے بالائی آسام کے سیوا ساگر، چرائی دیو اور جورہاٹ اضلاع میں آنے والے غیر متوقع اور غیر معمولی سیلاب سے متاثر ہوئے ہیں۔