گوہاٹی

گوہاٹی پولیس نے دو الگ الگ کارروائیوں کے دوران 13.5 لاکھ روپے مالیت کے جعلی ہندوستانی کرنسی نوٹ ضبط کیے ہیں۔ مشرقی گوہاٹی کے ڈپٹی کمشنر آف پولیس (ڈی سی پی) تبو رام پیگو نے ہفتہ کے روز بتایا کہ جعلی نوٹوں کے ماخذ کا پتہ لگانے اور اس ریکیٹ کے پیچھے موجود نیٹ ورک کو بے نقاب کرنے کے لیے تحقیقات جاری ہیں۔

صحافیوں سے بات کرتے ہوئے ڈی سی پی تبو رام پیگو نے کہا کہ یہ کارروائیاں 30 جون اور یکم جولائی کو خفیہ معلومات کی بنیاد پر ڈسپور پولیس اسٹیشن کی جانب سے انجام دی گئیں۔انہوں نے کہا کہ گوہاٹی کے ڈسپور پولیس اسٹیشن نے 30 جون اور یکم جولائی کو دو کامیاب کارروائیاں کیں، جن کے نتیجے میں پانچ افراد کو گرفتار کیا گیا اور 13.5 لاکھ روپے مالیت کی جعلی کرنسی سمیت دیگر قابل اعتراض اشیا برآمد کی گئیں۔ اس سلسلے میں دو مقدمات درج کیے گئے ہیں، اور دونوں معاملات میں مقصد معصوم لوگوں کو دھوکہ دینا تھا۔

ڈی سی پی کے مطابق، پہلے معاملے میں ملزمان اتر پردیش کے کانپور کے رہائشی ہیں، جو سونا خریدنے کے بہانے گوہاٹی آئے تھے، جبکہ دوسرے معاملے میں ملزمان آسام کے ضلع درنگ سے اسی مقصد کے تحت پہنچے تھے۔

انہوں نے مزید کہا کہ جعلی کرنسی کا معیار انتہائی ناقص ہے اور اس کے عام گردش میں آنے کا امکان کم ہے۔ تحقیقات جاری ہیں تاکہ جعلی نوٹوں کے اصل ماخذ اور اس نیٹ ورک سے وابستہ تمام افراد کی شناخت کی جا سکے۔ ہمیں یقین ہے کہ جلد ہی پورے گروہ کا پردہ فاش کر دیا جائے گا۔

دریں اثنا، آسام رائفلز نے محکمہ محصولات انٹیلی جنس (ڈی آر آئی)، اگرتلہ کے ساتھ مشترکہ کارروائی کرتے ہوئے خفیہ اطلاعات کی بنیاد پر اگرتلہ ریلوے اسٹیشن سے تقریباً 1.27 کروڑ روپے مالیت کی 55,626 بوتلیں کوڈین برآمد کی ہیں۔ ضبط شدہ سامان کو مزید تحقیقات اور قانونی کارروائی کے لیے ڈی آر آئی کے حوالے کر دیا گیا ہے۔

ایک اور انسدادِ اسمگلنگ کارروائی میں، آسام رائفلز اور ڈی آر آئی نے آسام کے ضلع کچھر میں تقریباً 1.31 کروڑ روپے مالیت کے 8,764 کلوگرام پوست کے بیج ضبط کیے۔ اس کارروائی کے دوران سلچر کے دو رہائشیوں کو گرفتار کیا گیا، جبکہ ایک ٹرک اور دو موبائل فون بھی ضبط کیے گئے۔ برآمد شدہ سامان کو مزید تحقیقات کے لیے ڈی آر آئی کے حوالے کر دیا گیا ہے۔