بیرات نگرہندوستان اور نیپال کے درمیان تجارت اور رابطہ کاری کے میدان میں ایک اہم پیش رفت سامنے آئی ہے۔ کینولا کے دانوں کی کھیپ لے کر ہندوستان سے روانہ ہونے والی پہلی براہ راست تجارتی مال بردار ٹرین 20 جولائی کو نیپال کسٹمز یارڈ بیرات نگر پہنچ گئی۔ اس کے ساتھ ہی ہندوستان۔نیپال ریلوے ٹرانزٹ نظام میں کی گئی ترمیم پر عملی طور پر عمل درآمد شروع ہو گیا۔
40 ویگنوں پر مشتمل یہ مال بردار ٹرین کولکتہ بندرگاہ سے روانہ ہوئی اور جوگ بنی میں واقع ہندوستانی کسٹمز یارڈ کے راستے بیرات نگر پہنچی۔ نومبر 2025 میں ہندوستان۔نیپال ٹرانزٹ معاہدے کے پروٹوکول میں ترمیم کے لیے لیٹر آف ایکسچینج پر دستخط کے بعد یہ سرحد پار ریلوے راہداری استعمال کرنے والی پہلی تجارتی مال بردار ٹرین ہے۔
اس پیش رفت کو دونوں ہمسایہ ممالک کے درمیان معاشی روابط مضبوط بنانے اور سرحد پار ریلوے نقل و حمل کو فروغ دینے کی جانب ایک اہم قدم قرار دیا جا رہا ہے۔جوگ بنی اور بیرات نگر کے درمیان براڈ گیج سرحد پار ریلوے لائن کا مشترکہ افتتاح یکم جون 2023 کو وزیر اعظم نریندر مودی اور اس وقت کے نیپالی وزیر اعظم پشپ کمل دہال پراچنڈ نے کیا تھا۔ یہ منصوبہ حکومت ہند کی مالی معاونت سے تعمیر کیا گیا تھا تاکہ دونوں ممالک کے درمیان مال برداری کو آسان بنایا جا سکے۔
اگرچہ ریلوے لائن تیار تھی لیکن تجارتی آپریشن شروع کرنے کے لیے ہندوستان۔نیپال ٹرانزٹ معاہدے کے پروٹوکول میں ترمیم ضروری تھی۔ مسلسل سفارتی مذاکرات کے بعد دونوں ممالک نے 13 نومبر 2025 کو لیٹر آف ایکسچینج پر دستخط کیے۔ اس موقع پر مرکزی وزیر تجارت و صنعت پیوش گوئل اور نیپال کے اس وقت کے وزیر صنعت۔ تجارت و رسد انیل کمار سنہا بھی موجود تھے۔
ترمیم شدہ پروٹوکول کے تحت اب کولکتہ اور وشاکھا پٹنم کی بندرگاہوں سے کنٹینر اور بڑی مقدار میں مال براہ راست ریل کے ذریعے نیپال کے مقررہ ریلوے مراکز تک پہنچایا جا سکے گا۔ ان مراکز میں بیرات نگر کا نیپال کسٹمز یارڈ بھی شامل ہے۔حکام کے مطابق پہلی تجارتی مال بردار ٹرین کی آمد اس نئے ٹرانزٹ نظام پر عملی عمل درآمد کی علامت ہے اور اس سے سرحد پار ریلوے رابطے کی مکمل صلاحیت بروئے کار آئے گی۔
توقع ہے کہ براہ راست ریلوے سروس سے مال برداری کی لاگت میں کمی آئے گی۔ سامان کی ترسیل زیادہ تیز اور مؤثر ہوگی۔ نیپال کی ہندوستانی بندرگاہوں تک رسائی مزید مضبوط ہوگی اور دونوں ممالک کے درمیان تجارت میں نمایاں اضافہ ہوگا۔ ساتھ ہی نیپال کے اہم ٹرانزٹ شراکت دار کے طور پر ہندوستان کا کردار مزید مستحکم ہوگا۔
