نئی دہلی/ آواز دی وائس

دہلی میں ارکانِ پارلیمان کے فلیٹ میں آگ لگ گئی ہے۔ فائر بریگیڈ کی چھ گاڑیاں موقع پر موجود ہیں اور آگ پر قابو پانے کی کوشش میں مصروف ہیں۔ ارکانِ پارلیمان اور ان کے عملے کے فلیٹ بی ڈی شرما مارگ پر واقع ہیں۔ آگ نچلی منزل سے شروع ہو کر پہلی اور دوسری منزل تک پہنچ گئی۔ فائر بریگیڈ کی گاڑیوں کے ساتھ تمام ذمہ دار افسران بھی موقع پر موجود ہیں۔

یہ آگ برہم پتر اپارٹمنٹ میں لگی ہے، جہاں کئی ارکانِ پارلیمان کے رہائشی فلیٹ واقع ہیں۔ دیوالی کے موقع پر فائر بریگیڈ محکمے کو الرٹ پر رکھا گیا ہے کیونکہ پٹاخوں کی وجہ سے دہلی-این سی آر میں اکثر آگ لگنے کے واقعات پیش آتے ہیں۔ دہلی فائر سروسز کے افسران کے مطابق دوپہر تقریباً 1 بج کر 22 منٹ پر آگ لگنے کی اطلاع ملی تھی، جس کے بعد فوراً فائر بریگیڈ کی گاڑیاں موقع پر روانہ کی گئیں۔ موقع سے سامنے آنے والی تصاویر اور ویڈیوز میں واضح طور پر دیکھا جا سکتا ہے کہ نچلی منزل پر زبردست آگ بھڑک رہی ہے۔ آگ کس وجہ سے لگی، اس کی تحقیقات افسران کر رہے ہیں۔

برہم پتر اپارٹمنٹ کے ایک رہائشی وینود نے بتایا کہ  میرا کتا اندر پھنس گیا تھا۔ میری بیٹی کی شادی کچھ ہی مہینوں میں ہونے والی ہے اور جو بھی زیورات، سونا اور کپڑے ہم نے خریدے تھے، وہ سب اندر ہیں۔ میری بیوی اور میرا ایک بچہ بھی جھلس گیا ہے۔ وہ اسپتال میں ہیں۔ ہمیں کچھ پتہ نہیں کہ آگ کیسے لگی۔  میرا گھر تیسری منزل پر ہے۔

ممبئی کے ملاڈ میں دکانوں میں آگ

ممبئی کے ملاڈ علاقے میں ہفتے کی دوپہر کچھ دکانوں میں خوفناک آگ بھڑک اٹھی۔ حکام کے مطابق پٹھانواڑی میں دوپہر تقریباً ایک بجے لگی یہ آگ 15 سے 20 دکانوں تک پھیل گئی۔ خوش قسمتی سے کسی کے زخمی ہونے کی اطلاع نہیں ملی۔ فائر بریگیڈ کی کم از کم آٹھ گاڑیوں نے آگ بجھانے میں حصہ لیا۔ حکام نے بتایا کہ آگ لگنے کی وجہ کا ابھی پتہ نہیں چل سکا ہے۔

غریب رتھ ایکسپریس میں آگ

پنجاب کے فتح گڑھ صاحب میں سرہند ریلوے اسٹیشن کے قریب ہفتے کی صبح امرتسر-سہرسہ غریب رتھ ایکسپریس کے ایک ڈبے میں آگ لگ گئی۔ ریلوے بورڈ کے مطابق، اس واقعے میں ایک خاتون کو معمولی چوٹیں آئیں۔ آگ صبح تقریباً ساڑھے سات بجے اس وقت لگی جب ٹرین (نمبر 12204) امرتسر سے آ رہی تھی۔

ریاستی ریلوے پولیس (جی آر پی) کے ایک افسر نے بتایا کہ ٹرین کے ایک اے سی کوچ میں دھواں دیکھا گیا، جس کے بعد ایک مسافر نے ٹرین روکنے کے لیے چین کھینچی اور تمام مسافروں کو محفوظ طریقے سے باہر نکال لیا گیا۔ آگ سے G-19 ڈبہ بری طرح جل گیا جبکہ دو دیگر ڈبوں کو بھی معمولی نقصان پہنچا۔ آگ سے متاثرہ تینوں ڈبوں کو ٹرین کے باقی حصوں سے الگ کر دیا گیا۔