نئی دہلی: اداکار سلمان خان پر مبینہ طور پر مبنی فلم ’کالا ہرن: دی بیٹل فار لیگل‘ کے فلم سازوں نے جمعرات کو دہلی ہائی کورٹ کو بتایا کہ فلم ابھی ریلیز کے لیے تیار نہیں ہے، کیونکہ اسے سنسر بورڈ سے سرٹیفکیٹ ملنا باقی ہے۔ یہ بیان جسٹس جیوتی سنگھ کے سامنے دیا گیا، جو فلم کی ریلیز پر پابندی لگانے کی درخواست سے متعلق سلمان خان کی عرضی پر سماعت کر رہی تھیں۔

عدالت نے فلم ساز سے سلمان خان کی عرضی پر دو ہفتوں کے اندر جواب داخل کرنے کو کہا۔ عدالت نے کہا کہ فلم ساز کے وکیل نے بتایا ہے کہ فی الحال زیرِ غور فلم ریلیز کی حالت میں نہیں ہے، کیونکہ اس کے مواد کو ابھی سنسر بورڈ سے تصدیق شدہ سرٹیفکیٹ ملنا باقی ہے۔ عدالت نے اس بیان کو ریکارڈ پر لیتے ہوئے دو ہفتوں میں جواب داخل کرنے اور اگلی تاریخ سے پہلے اس پر جواب الجواب داخل کرنے کی ہدایت دی۔

عدالت نے معاملے کی اگلی سماعت کے لیے 30 ستمبر کی تاریخ مقرر کی۔ عدالت نے فلم ساز امیت جانی کے وکیل سے 14 ستمبر کو فلم کی مجوزہ ریلیز کے بارے میں معلومات دینے کو بھی کہا۔ عدالت نے واضح کیا، ’’تب تک آپ اسے (فلم کو) ریلیز نہیں کریں گے۔‘‘ سلمان خان کے وکیل نے کہا، ’’فلم ساز خود کہہ رہے ہیں کہ فلم ستمبر میں ریلیز ہونے والی ہے اور اگر فرض کریں کہ اسے ریلیز کر دیا گیا تو اس سے مجھے (سلمان خان کو) بہت بڑا نقصان ہوگا۔‘

‘ فلم ساز کے وکیل نے عدالت کو بتایا کہ فلم ابھی ریلیز کے قابل نہیں ہے اور اسے سرٹیفکیٹ کے لیے ابھی سنسر بورڈ کے پاس بھیجا جانا باقی ہے۔ یہاں تک کہ فلم کا ٹریلر بھی جاری نہیں کیا گیا ہے۔ سلمان خان کی یہ عرضی ان کے شخصی حقوق (پرسنلٹی رائٹس) کے تحفظ سے متعلق مقدمے کا حصہ ہے۔ اس سے قبل جولائی میں دہلی ہائی کورٹ نے سلمان خان کی جانب سے اعتراض کیے جانے کے بعد فلم کے ٹیزر اور اس سے متعلق دیگر پوسٹس کو آن لائن پلیٹ فارم سے ہٹانے کا عبوری حکم دیا تھا۔