نئی دہلی: شیو سینا (یو بی ٹی) کے اندر جاری سیاسی بحران جمعرات کو مزید شدت اختیار کر گیا جب کئی لوک سبھا ارکان نے پارٹی کی لازمی پارلیمانی میٹنگ میں شرکت نہیں کی۔ راجیہ سبھا رکن سنجے راوت نے تصدیق کی کہ غیر حاضر ارکان کو شوکاز نوٹس جاری کر دیے گئے ہیں اور ان کی لوک سبھا رکنیت ختم کرانے کے لیے باضابطہ کارروائی شروع کر دی گئی ہے۔

سنجے راوت نے کہا کہ غیر حاضر ارکان کو سات دن کے اندر جواب دینے کے لیے نوٹس بھیجا گیا ہے۔ انہوں نے کہا:

"آج ہماری پارلیمانی پارٹی کی میٹنگ تھی۔ ہمارے تین لوک سبھا ارکان راجابھاؤ واجے، انیل دیسائی اور اروند ساونت شریک ہوئے۔ باقی ارکان نہیں آئے۔ ہم نے انہیں شوکاز نوٹس بھیج دیا ہے اور جواب کے لیے سات دن کا وقت دیا ہے۔ اس کے بعد اگلا قدم اٹھایا جائے گا۔"

انہوں نے مزید کہا کہ اب کارروائی کا آغاز ہو چکا ہے اور ہم انہیں نااہل قرار دلوانے کے لیے ہر ممکن کوشش کریں گے۔ اگر لوک سبھا اسپیکر قواعد، قانون اور سپریم کورٹ کی ہدایات کے مطابق کام کرتے ہیں تو یہ لوگ نااہل قرار دیے جائیں گے۔"

سنجے راوت نے کہا کہ یہ لڑائی ہر محاذ پر لڑی جائے گی۔"یہ جنگ پارلیمنٹ میں بھی ہوگی، عدالت میں بھی ہوگی اور سڑکوں پر بھی ہوگی۔ سڑکوں پر ہماری جدوجہد پہلے ہی شروع ہو چکی ہے۔"پارٹی چھوڑنے والے ارکان کے مذہبی دوروں پر تنقید کرتے ہوئے راوت نے کہا:

کیا غدار اب خدا کی پناہ ڈھونڈ رہے ہیں؟ یہ کیسی نئی روایت ہے کہ پہلے غداری کرو اور پھر دعائیں مانگو؟ وہ جہاں چاہیں جائیں، خوف میں بھاگتے رہیں گے۔انہوں نے الزام لگایا کہ ان ارکان کو حال ہی میں بھاری مالی فائدہ پہنچا ہے اور اسی وجہ سے انہیں اضافی سکیورٹی فراہم کی جا رہی ہے۔

سنجے راوت نے منحرف ارکان کو چیلنج دیتے ہوئے کہا کہ اگر ان میں ہمت اور اخلاقی جرات ہے تو استعفیٰ دیں کیونکہ وہ شیو سینا کے 'مشعل' نشان پر منتخب ہوئے تھے۔ استعفیٰ دے کر دوبارہ الیکشن لڑیں۔ پھر ہم انہیں غدار نہیں کہیں گے بلکہ سیاست کے نئے سنت قرار دیں گے۔"

انہوں نے مہاراشٹر میں ان ارکان کو فراہم کی گئی سکیورٹی پر بھی سخت تنقید کی اور کہا کہ حکومت ان کی حفاظت کے لیے غیر معمولی اقدامات کر رہی ہے۔دوسری جانب مرکزی وزیر برائے پارلیمانی امور کرن جیجیو نے سنجے راوت کے بیانات پر تبصرہ کرنے سے انکار کر دیا۔

صحافیوں سے گفتگو کرتے ہوئے انہوں نے کہا کہ پارلیمنٹ میں جو کچھ ہوتا ہے وہ سب کے سامنے ہے۔ سنجے راوت جو زبان استعمال کرتے ہیں یا جو الزامات لگاتے ہیں ان کا جواب دینا مناسب نہیں ہوگا۔ ہر رکن پارلیمنٹ اپنے حلقے اور اپنی پارٹی کے طریقہ کار کے مطابق کام کرتا ہے۔"انہوں نے مزید کہا کہ حکومت پارلیمنٹ میں پیش کیے جانے والے بلوں پر تمام ارکان کے تعاون کی خواہاں ہے لیکن کسی فرد کے ذاتی بیانات پر ردعمل دینا مناسب نہیں سمجھتی۔