کولکتہ

ترنمول کانگریس کے جنرل سکریٹری ابھیشیک بنرجی نے مغربی بنگال میں انتخابی نتائج کے بعد ہونے والے تشدد پر مرکز کو نشانہ بنایا ہے اور حال ہی میں منعقدہ اسمبلی انتخابات میں ووٹوں کی گنتی کے دوران مبینہ دھاندلی اور اختیارات کے غلط استعمال کا الزام لگایا ہے۔ایکس پر ایک پوسٹ میں ابھیشیک بنرجی نے انتخاب کے بعد ہونے والے تشدد سے متاثرہ خاندانوں سے تعزیت کا اظہار کرتے ہوئے مرکزی فورسز پر ’’خاموش تماشائی‘‘ بنے رہنے کا الزام لگایا۔

پولنگ میں مبینہ بے ضابطگیوں کی طرف اشارہ کرتے ہوئے انہوں نے کہا کہ پارٹی اس معاملے کو قانونی طور پر چیلنج کرے گی۔انہوں نے لکھا  کہ ترنمول کانگریس خاندان کے ہر سپاہی کا میں دل کی گہرائیوں سے شکریہ ادا کرتا ہوں کہ آپ نے ہمت، ثابت قدمی اور انصاف کے لیے انتھک جدوجہد کا مظاہرہ کیا۔ انتہائی مشکل اور مشکوک انتخابات کے باوجود آپ نے امید نہیں چھوڑی۔ کئی مقامات پر ہمارے امیدواروں اور کاؤنٹنگ ایجنٹس کو زبردستی باہر نکال دیا گیا، جبکہ ووٹوں کی گنتی کا عمل عملاً مرکزی حکومت کے ملازمین کے کنٹرول میں تھا۔ نتائج کے بعد، مرکز کی جانب سے تحفظ کے بار بار وعدوں کے باوجود بنگال میں چونکا دینے والا انتخابی تشدد دیکھنے کو ملا۔ مرکزی فورسز خاموش تماشائی بنی رہیں جبکہ ہمارے کارکنوں، دفاتر اور گھروں پر حملے کیے گئے اور انہیں آگ لگا دی گئی۔

انہوں نے مزید کہا کہ اس جدوجہد میں جن لوگوں کو ہم نے کھویا، ان کے خاندانوں سے میری دلی تعزیت ہے۔ گزشتہ چند دنوں میں بنگال نے بہت کچھ برداشت کیا ہے اور اس طرح کے مناظر ہماری سرزمین کی روح کے خلاف ہیں۔ابھیشیک بنرجی نے الزام لگایا کہ کئی اسمبلی حلقوں میں ترنمول کانگریس کے امیدواروں اور کاؤنٹنگ ایجنٹس کو زبردستی گنتی مراکز سے باہر نکال دیا گیا۔

ترنمول کانگریس کے جنرل سکریٹری نے کہا کہ لیکن یہ لڑائی ابھی ختم نہیں ہوئی۔ ہم ہر غیر قانونی عمل، دھاندلی اور اختیارات کے غلط استعمال کو آئینی اور قانونی راستوں کے ذریعے چیلنج کریں گے۔ ہمیں معزز سپریم کورٹ اور اس ملک کے جمہوری اداروں پر مکمل بھروسہ ہے۔ 100 سے زائد نشستوں پر ہمارے امیدواروں اور کاؤنٹنگ ایجنٹس کو زبردستی باہر نکالا گیا، سنگین بے ضابطگیوں کی اطلاعات موصول ہوئیں اور عوامی مینڈیٹ کو کمزور کیا گیا۔ سچ کو ہمیشہ دفن نہیں کیا جا سکتا اور بنگال کے عوام کے ساتھ ہونے والی ہر ناانصافی کو پوری قوت اور عزم کے ساتھ اٹھایا جائے گا۔

انہوں نے مزید کہا کہ بنگال کے عوام جانتے ہیں کہ ہر مشکل وقت میں کون ان کے ساتھ کھڑا رہا، اور ہمیں صبر، اتحاد اور عزم کے ساتھ یہی کردار جاری رکھنا ہوگا۔ سچ کو ہمیشہ دبایا نہیں جا سکتا۔ ہم زیادہ مضبوطی کے ساتھ واپس آئیں گے۔ متحد رہیں، میدان میں رہیں اور ہمت، نظم و ضبط اور مثبت سوچ کے ساتھ عوام کی خدمت جاری رکھیں۔ ہماری جدوجہد جمہوریت پر غیر متزلزل یقین کے ساتھ جاری رہے گی۔

اس سے قبل جمعرات کو ممتا بنرجی 2026 کے ریاستی اسمبلی انتخابات کے نتائج کے بعد مغربی بنگال میں مبینہ انتخابی تشدد سے متعلق ایک مفادِ عامہ کی عرضی (پی آئی ایل) کے سلسلے میں چیف جسٹس ایچ سی سجوئے پال کے سامنے پیش ہوئیں۔یہ عرضی وکیل سرسانیا بنرجی نے دائر کی تھی، جو ترنمول کانگریس رہنما اور وکیل کلیان بنرجی کے بیٹے ہیں۔ درخواست گزار نے پارٹی دفاتر پر حملوں اور کارکنوں کی بے دخلی سمیت کئی علاقوں میں انتخابی تشدد کے واقعات کا الزام لگایا۔

ممتا بنرجی نے ’’عوام کو فوری تحفظ‘‘ فراہم کرنے کا مطالبہ کرتے ہوئے الزام لگایا کہ ’’پولیس کے سامنے غنڈہ گردی کی جا رہی ہے، آگ زنی ہو رہی ہے۔انہوں نے مزید کہا کہ بچوں کو نہیں بخشا جا رہا، اقلیتوں کو نہیں بخشا جا رہا، خواتین کو نہیں بخشا جا رہا۔ ہمارے 10 کارکنوں کو قتل کر دیا گیا ہے۔

انتخابی نتائج کے بعد ترنمول کانگریس کی 15 سالہ حکومت کا خاتمہ ہو گیا، کیونکہ بی جے پی نے پارٹی کو 80 نشستوں تک محدود کر دیا۔ بی جے پی نے 207 نشستوں کی بڑی کامیابی کے ساتھ بنگال میں پہلی بار حکومت قائم کی، جبکہ سویندو ادھیکاری ریاست کے وزیرِ اعلیٰ بنے۔