لکھنؤ

کمرشل ایل پی جی سلنڈر کی قیمتوں میں اضافے کے بعد بہوجن سماج پارٹی کی سربراہ مایاوتی نے ہفتہ کے روز کہا کہ عوام میں اس بات کو لے کر بے چینی پائی جا رہی ہے کہ گھریلو گیس، پیٹرول، ڈیزل اور دیگر پیٹرولیم مصنوعات کی قیمتیں بھی بڑھ سکتی ہیں۔ایکس پر ہندی میں کی گئی اپنی پوسٹ میں مایاوتی نے کہاکہ ملک میں کمرشل گیس سلنڈروں کی شدید کمی کے درمیان ایک ہی بار میں 993 روپے کا اضافہ اور اس کا عام لوگوں کی روزمرہ زندگی پر اثر، الیکٹرانک میڈیا سمیت تمام ذرائع ابلاغ میں سرخیوں میں ہے۔ عوام میں اس خدشے کے باعث بے چینی پائی جا رہی ہے کہ کھانا پکانے والی گیس، پیٹرول، ڈیزل اور دیگر پیٹرولیم مصنوعات کی قیمتیں بھی بڑھ سکتی ہیں۔

انہوں نے مزید کہا کہ چاہے اس کی اصل وجہ امریکہ-اسرائیل اور ایران کے درمیان تنازع ہو یا کچھ اور، حکومت نے مختلف ریاستوں کے اسمبلی انتخابات سے پہلے پیٹرولیم مصنوعات اور دیگر اشیاء کی قیمتوں کو کافی حد تک قابو میں رکھا تھا، اور اسے یہ پالیسی جاری رکھنی چاہیے۔ عوامی مفاد اور فلاح و بہبود کے پیش نظر یہی مناسب ہوگا۔مایاوتی نے کہا کہ دہلی میں بھی نئی قیمتوں کے بعد کمرشل سلنڈر کی قیمت 3000 روپے سے تجاوز کر گئی ہے۔انہوں نے حکومت کو مشورہ دیا کہ وہ پیٹرولیم مصنوعات کی قیمتوں میں اضافے کے اثرات کا جائزہ لینے کے بعد ہی پالیسی بنائے، کیونکہ ملک کے غریب اور متوسط طبقے کے لوگ پہلے ہی مہنگائی کے بوجھ تلے دبے ہوئے ہیں۔

جمعہ کے روز 19 کلوگرام کے کمرشل ایل پی جی سلنڈر کی قیمت میں اب تک کا سب سے بڑا اضافہ، یعنی 993 روپے کیا گیا۔ یہ اضافہ عالمی سطح پر توانائی کی قیمتوں میں تیزی اور مغربی ایشیا میں امریکہ-اسرائیل-ایران تنازع کے بعد لگاتار تیسری بار کیا گیا ہے۔اب 19 کلوگرام کا کمرشل ایل پی جی سلنڈر، جو ہوٹلوں اور ریستورانوں میں استعمال ہوتا ہے، دہلی میں 3071.50 روپے کا ہو گیا ہے، جبکہ پہلے اس کی قیمت 2078.50 روپے تھی۔

اس سے قبل یکم اپریل کو سلنڈر کی قیمت میں 195.50 روپے کا اضافہ کیا گیا تھا، جبکہ یکم مارچ کو یہ 114.50 روپے بڑھائی گئی تھی۔گھریلو ایل پی جی سلنڈر، جو گھروں میں استعمال ہوتا ہے، اس کی قیمت میں جمعہ کے روز کوئی تبدیلی نہیں کی گئی۔ آخری بار 7 مارچ کو 14.2 کلوگرام کے گھریلو سلنڈر کی قیمت میں 60 روپے کا اضافہ کیا گیا تھا، جس کے بعد دہلی میں اس کی قیمت 913 روپے ہے۔سرکاری تیل کمپنیاں انڈین آئل کارپوریشن، بھارت پٹرولیم اور ہندوستان پٹرولیم—ہر ماہ کی پہلی تاریخ کو بین الاقوامی قیمتوں اور ایکسچینج ریٹ کے مطابق اے ٹی ایف (ایوی ایشن ٹربائن فیول) اور ایل پی جی کی قیمتوں میں ترمیم کرتی ہیں۔

مغربی ایشیا میں جنگ کے باعث توانائی کی سپلائی چین متاثر ہونے کے بعد عالمی سطح پر تیل کی قیمتوں میں تقریباً 50 فیصد تک اضافہ ہو چکا ہے۔