گوہاٹی (آسام)آسام بھر کے جذباتی مداحوں نے مشہور آسامیا گلوکار زوبین گرگ، جنہیں "کنگ آف ہمِنگ" کہا جاتا تھا، کو ان کے اچانک انتقال کے بعد شمعیں جلا کر خراجِ عقیدت پیش کیا۔ وہ 19 ستمبر کو سنگاپور میں اسکیوبا ڈائیونگ حادثے میں جاں بحق ہو گئے تھے۔گوہاٹی میں مداحوں نے ان کی یاد میں شمعیں روشن کیں اور اپنے محبوب فنکار کے غم میں سوگ منایا۔زوبین گرگ کے جسدِ خاکی کو دہلی کے اندرا گاندھی انٹرنیشنل (آئی جی آئی) ایئرپورٹ لایا گیا، جہاں سے اسے گوہاٹی منتقل کیا جا رہا ہے۔ وہاں ارجن بھوگیسور بروآہ اسپورٹس کمپلیکس (ساروسجائی اسٹیڈیم) لے جایا جائے گا تاکہ مداح اپنے آخری دیدار اور خراجِ عقیدت پیش کر سکیں۔

آسام کے وزیراعلیٰ ہیمنت بسوا سرما اور مرکزی وزیر مملکت برائے امورِ خارجہ پبیترا مرگہیٹا نے آئی جی آئی ایئرپورٹ پر مرحوم گلوکار کو خراجِ عقیدت پیش کیا۔قبل ازیں پوسٹ مارٹم کے بعد زوبین گرگ کے جسدِ خاکی کو بھارتی سفیر کے حوالے کر دیا گیا اور ہفتے کے روز وہ بھارت لایا گیا۔وزیراعلیٰ سرما نے بتایا کہ 'یا علی' کے گلوکار کے جسدِ خاکی کو 21 ستمبر، اتوار کے روز صبح 9 بجے سے شام 7 بجے تک ساروسجائی اسٹیڈیم، گوہاٹی میں رکھا جائے گا تاکہ مداح اور چاہنے والے اپنے آخری احترام پیش کر سکیں۔

آسام حکومت نے ایک بیان میں کہاکہ گہری رنجیدگی کے ساتھ آسام حکومت اطلاع دیتی ہے کہ جناب زوبین گرگ، جو ایک عظیم فنکار، ثقافتی علامت، فلم ساز اور لاکھوں دلوں کی دھڑکن تھے، ان کے جسدِ خاکی کو کل، 21 ستمبر کو، صبح 9 بجے سے شام 7 بجے تک ارجن بھوگیسور بروآہ اسپورٹس کمپلیکس (ساروسجائی اسٹیڈیم) میں رکھا جائے گا تاکہ دوست، مداح اور چاہنے والے ان کو خراجِ عقیدت پیش کر سکیں۔ تمام لوگوں سے درخواست ہے کہ وہ اس سفرِ آخرت کو وقار اور یادگار بنانے کے لیے تعاون کریں

شام کو ایک کابینہ اجلاس میں ان کی آخری رسومات کے مقام کا فیصلہ کیا جائے گا۔ وزیراعلیٰ نے میڈیا سے گفتگو کرتے ہوئے کہا کہ زوبین گرگ کے جسدِ خاکی کو خصوصی پرواز کے ذریعے گوہاٹی لایا جائے گا۔انہوں نے مزید کہا کہ جسدِ خاکی پہلے زوبین کے گھر لے جایا جائے گا۔ ہم عوام سے درخواست کرتے ہیں کہ وہ زوبین کے اہلِ خانہ کو کچھ نجی وقت گزارنے دیں، کیونکہ یہ ان کا ان کے ساتھ آخری لمحہ ہوگا۔

ادھر آسام حکومت نے زوبین گرگ کے انتقال پر تین روزہ ریاستی سوگ کا اعلان کیا ہے۔ اس دوران کسی قسم کی سرکاری تقریبات، عوامی جشن یا تفریحی پروگرام منعقد نہیں ہوں گے۔

ملک بھر سے تعزیتی پیغامات موصول ہو رہے ہیں جبکہ بڑی تعداد میں مداح گوہاٹی میں زوبین گرگ کی رہائش گاہ کے باہر جمع ہو گئے ہیں تاکہ اپنے محبوب گلوکار کی ایک جھلک دیکھ سکیں۔