نئی دہلی، پٹنہ:بہار اسمبلی انتخابات کے لیے منگل کو ووٹنگ مکمل ہونے کے بعد سامنے آنے والے ایکزٹ پولز کے مطابق قومی جمہوری اتحاد (این ڈ ی اے) ایک بار پھر واضح اکثریت کے ساتھ حکومت بنانے کی راہ پر ہے۔ اندازہ ہے کہ این ڈی اے کو 130 سے 160 نشستیں مل سکتی ہیں، جبکہ مہاگٹھ بندھن تمام دعوؤں کے باوجود صرف 70 سے 100 نشستوں تک محدود رہ سکتا ہے۔

پِیپل پلس سروے کے مطابق:این ڈی اے کو 133 سے 159 نشستیں،مہاگٹھ بندھن کو 75 سے 101 نشستیں،جن سوراج کو 0 سے 5 نشستیں،جبکہ دیگر پارٹیوں کو 2 سے 8 نشستیں ملنے کا امکان ہے۔

دینک بھاسکر پول کے مطابق:این ڈی اے کو 145 سے 160ن شستیں،مہاگٹھ بندھن کو 73 سے 91 نشستیں،جن سوراج کا کھاتہ بھی نہیں کھلنے کا امکان ہے،جبکہ دیگر آزاد امیدواروں کو 5 سے 10 نشستیں مل سکتی ہیں۔

ڈی وی سی ریسرچ سروے کے مطابق: این ڈی اے کے لیے 137 سے 152 نشستوں، مہاگٹھ بندھن کے لیے 83 سے 98 نشستوں،جن سوراج کے لیے 2 سے 4 نشستوں،اور دیگر کے لیے 4 سے 8 نشستوں کا امکان ظاہر کیا گیا ہے۔

میٹرکس–IANS کے ایکزٹ پول کے مطابق، بی جے پی کو 65–73، جنتا دل (یونائیٹڈ) کو 67–75، لوک جن شکتی پارٹی (رام ولاس) کو 7–9، ہندوستانی عوام مورچہ کو 4–5 اور آر ایل ایم کو 1–2 نشستیں ملنے کا امکان ظاہر کیا گیا ہے۔ ایکزٹ پول کے مطابق، بی جے پی کی قیادت والے این ڈی اے کو 147 سے 167 نشستیں ملنے کا امکان ہے، جب کہ مہاگٹھ بندھن کو 70 سے 90 نشستیں مل سکتی ہیں۔

اویسی کے لئے اچھی خبر

ایک سروے ایجنسی  کے مطابق، اسدالدین اویسی کی پارٹی آل انڈیا مجلس اتحاد المسلمین (AIMIM) کو اس بار 2 سے 3 نشستیں ملنے کا امکان ہے، جبکہ پارٹی کا ووٹ شیئر تقریباً 1 فیصد بتایا گیا ہے۔واضح ہوکہ  حیدرآباد کے رکنِ پارلیمان اسدالدین اویسی کی قیادت میں AIMIM نے اس بار بہار اسمبلی انتخابات میں کل 25 نشستوں پر اپنے امیدوار کھڑے کیے ہیں۔ ان میں سے 15 نشستیں سیمانچل کے علاقے سے ہیں، جسے پارٹی کا مضبوط گڑھ سمجھا جاتا ہے۔

سال 2020 کے انتخابات میں AIMIM نے 20 نشستوں پر انتخاب لڑا تھا، جن میں سے 5 نشستوں پر کامیابی حاصل کی تھی۔

بہار الیکشن  2020 میں ایکزٹ پول کے نتائج کیسے رہے تھے؟

2020 میں بھی مقابلہ این ڈی اے اور مہاگٹھ بندھن کے درمیان سخت تھا، لیکن اس بار اتحاد میں تبدیلیاں دیکھی گئیں۔ اس وقت این ڈی اے میں بی جے پی کے ساتھ وزیر اعلیٰ نتیش کمار کی جے ڈی(U)، وی آئی پی اور ہم شامل تھے، جبکہ مہاگٹھ بندھن میں آر جے ڈی، کانگریس اور دیگر بائیں بازو کے اتحادی شامل تھے۔

زیادہ تر ایکزٹ پولز نے مہاگٹھ بندھن کو واضح اکثریت دی تھی، جبکہ صرف دو—ٹوڈیز چانکیہ اور ٹائمز نیٹ ورک—نے اسے اکثریت نہیں دی تھی۔

رائے عامہ (اوپینین پول) کے بارے میں دلچسپ معلومات:

دنیا میں انتخابی سروے کی شروعات امریکہ میں ہوئی۔ جارج گیلاپ اور کلاڈ رابنسن نے سب سے پہلے عوامی رائے معلوم کرنے کے لیے یہ سروے کیا۔ بعد میں برطانیہ (1937) اور فرانس (1938) نے بڑے پیمانے پر سروے کرائے۔ اس کے بعد جرمنی، ڈنمارک، بیلجیم اور آئرلینڈ میں بھی انتخابی سروے شروع ہوئے۔

ایکزٹ پول کی ابتدا

ایکزٹ پول کی شروعات نیدرلینڈز کے سماجی ماہرِ علم و سیاستدان مارسل فان ڈیم نے 15 فروری 1967 کو کی تھی، اور ان کا اندازہ بالکل درست نکلا تھا۔

ہندوستان میں ایکزٹ پول کی ابتدا

ہندوستان میں ایکزٹ پول کی بنیاد انڈین انسٹی ٹیوٹ آف پبلک اوپینین (IIPO) کے سربراہ ایرک ڈی کوسٹا نے رکھی۔

1996 میں ایکزٹ پول ملک بھر میں مقبول ہوئے، جب دوردرشن نے سی ایس ڈی ایس (Centre for the Study of Developing Societies) کو قومی سطح پر سروے کی اجازت دی۔1998 میں پہلی بار ایکزٹ پول ٹی وی پر نشر کیے گئے۔

اوپینین پول اور ایکزٹ پول میں فرق

انتخابات سے پہلے کرایا جاتا ہے۔ اس میں ہر فرد شامل ہو سکتا ہے، چاہے وہ ووٹر ہو یا نہیں۔ اس کے ذریعے عوام کے جذبات، مسائل اور حکومت سے اطمینان یا ناراضی کا اندازہ لگایا جاتا ہے۔

ایکزٹ پول ووٹنگ ختم ہونے کے فوراً بعد کیا جاتا ہے۔ اس میں صرف وہ لوگ شامل ہوتے ہیں جنہوں نے ووٹ ڈالا ہو۔ایکزٹ پول زیادہ حتمی مرحلہ ہوتا ہے، جو یہ بتاتا ہے کہ عوام نے اصل میں کس پارٹی پر اعتماد کیا۔ اس کے نتائج ووٹنگ مکمل ہونے کے بعد ہی جاری کیے جاتے ہیں۔