پٹنہ/ آواز دی وائس

بہار کے نائب وزیر اعلیٰ سمرات چودھری نے بدھ کے روز راشٹریہ جنتا دل (آر جے ڈی) کے سربراہ لالو پرساد یادو کی غیر موجودگی پر طنز کیا، جن کی تصویر مہاگٹھ بندھن کے انتخابی منشور کے سرورق پر شامل نہیں کی گئی۔ انہوں نے کہا کہ تیجسوی یادو اب اپنے والد کو وہی سمجھتے ہیں جو بہار کے عوام برسوں سے سمجھتے آئے ہیں ۔ یعنی ولن۔ چودھری نے مزید کہا کہ پہلے صرف عوام لالو یادو کو ولن مانتے تھے، لیکن اب مہاگٹھ بندھن نے بھی انہیں اسی نظر سے دیکھنا شروع کر دیا ہے۔

انہوں نے میڈیا سے بات کرتے ہوئے کہا کہ بہار کے لوگ پہلے راشٹریہ جنتا دل کے قومی صدر کو ولن مانتے تھے، مگر اب تو خود آر جے ڈی بھی انہیں ولن ماننے لگی ہے۔ ان کا اپنا بیٹا بھی اب انہیں ولن سمجھتا ہے۔ وہ اپنے منشور میں لالو یادو کو جگہ تک نہیں دے رہے۔ بہار کے عوام پہلے ہی جانتے تھے کہ لالو یادو ولن ہیں، اور اب آر جے ڈی اور مہاگٹھ بندھن کے لوگ بھی یہی کہنے لگے ہیں کہ لالو یادو ولن ہیں۔

یہ بیان اس وقت آیا جب مہاگٹھ بندھن نے پٹنہ میں ایک مشترکہ پریس کانفرنس کے دوران اپنا منشور جاری کیا، جس کا عنوان تھا "بہار کا تیجسوی پرن"۔ اس منشور میں انتخابات سے قبل کئی اہم وعدے کیے گئے ہیں۔ منشور کے مطابق، ‘مائی-بہن مان یوجنا’ کے تحت خواتین کو ہر ماہ 2,500 روپے کی مالی مدد دی جائے گی، جو یکم دسمبر سے اگلے پانچ سالوں تک جاری رہے گی۔

اس کے علاوہ اپوزیشن اتحاد نے وعدہ کیا ہے کہ اگر وہ اقتدار میں آئے تو اولڈ پنشن اسکیم کو دوبارہ نافذ کرے گا۔ یہ اسکیم کانگریس کے ایجنڈے میں بھی شامل رہی ہے، خاص طور پر جب ہماچل پردیش میں سکھویندر سنگھ سکھو کی حکومت نے عہدہ سنبھالنے کے فوراً بعد اسے بحال کیا تھا۔ منشور میں مزید کہا گیا ہے کہ وقف (ترمیمی) ایکٹ کو فی الحال روک دیا جائے گا اور وقف جائیدادوں کے انتظام کو شفاف اور فلاحی بنایا جائے گا۔ بہار کے 2025 کے اسمبلی انتخابات میں اصل مقابلہ نیشنل ڈیموکریٹک الائنس (این ڈی اے) اور مہاگٹھ بندھن کے درمیان ہوگا۔

این ڈی اے میں شامل ہیں

بھارتیہ جنتا پارٹی (بی جے پی)، جنتا دل (یونائیٹڈ)، لوک جن شکتی پارٹی (رام ولاس)، ہندوستانی عوام مورچہ (سیکولر) اور راشٹریہ لوک مورچہ۔ جبکہ مہاگٹھ بندھن کی قیادت راشٹریہ جنتا دل (آر جے ڈی) کر رہی ہے، جس میں کانگریس پارٹی، کمیونسٹ پارٹی آف انڈیا (مارکس وادی-لیننسٹ) جس کی قیادت دیپانکر بھٹاچاریہ کر رہے ہیں، کمیونسٹ پارٹی آف انڈیا (سی پی آئی)، کمیونسٹ پارٹی آف انڈیا (مارکس وادی) اور مکیش سہنی کی وِکاس شیل انسان پارٹی (وی آئی پی) شامل ہیں۔

اس کے علاوہ، پرسنت کشور کی پارٹی جن سوراج نے بھی ریاست کی تمام 243 نشستوں پر انتخاب لڑنے کا اعلان کیا ہے۔ اسمبلی انتخابات دو مرحلوں میں، 6 اور 11 نومبر کو ہوں گے، جب کہ نتائج 14 نومبر کو جاری کیے جائیں گے۔