نئی دہلی
وزیرِ دفاع راج ناتھ سنگھ نے ہفتہ کے روز مسلح افواج میں شامل ہونے والے نئے افسران کو مشورہ دیا کہ وہ جدید جنگوں کی بدلتی ہوئی نوعیت کے لیے ذہنی طور پر تیار رہیں۔ انہوں نے کہا کہ اب بڑی طاقتوں کو میدانِ جنگ میں وہ فیصلہ کن برتری حاصل نہیں رہی جو ماضی میں ہوا کرتی تھی، کیونکہ نسبتاً چھوٹی قوتیں بھی خصوصی حکمتِ عملی اور جدید ہتھیاروں کے ذریعے بھاری نقصان پہنچانے کی صلاحیت رکھتی ہیں۔
راج ناتھ سنگھ نے نئی دہلی کے قریب واقع ہندوستانی فضائیہ اکیڈمی میں منعقدہ مشترکہ گریجویشن پریڈ سے خطاب کرتے ہوئے یہ بھی کہا کہ ابھرتی ہوئی نئی ٹیکنالوجیز نے جنگ کی تعریف ہی بدل کر رکھ دی ہے۔
انہوں نے کہا کہ پہلے یہ سمجھا جاتا تھا کہ بڑی طاقتوں کو میدانِ جنگ میں فیصلہ کن برتری حاصل ہوتی ہے، لیکن اب نسبتاً چھوٹی قوتیں بھی اپنے چھوٹے مگر خطرناک ہتھیاروں اور نئی حکمتِ عملیوں کے ذریعے بھاری نقصان پہنچا سکتی ہیں۔ میرا مقصد آپ سب کو یہ بتانا ہے کہ آپ جنگ کی ہر قسم اور ہر صورتِ حال کے لیے ذہنی طور پر تیار رہیں۔
وزیرِ دفاع نے ہندوستانی فضائیہ میں شامل ہونے والی خواتین پائلٹوں کو مبارکباد دیتے ہوئے کہا کہ ان کی شمولیت سے فضائیہ مزید طاقتور، متوازن اور مضبوط ہوئی ہے اور یہ ایک جامع اور ہمہ گیر فورس کی طاقت کی عکاسی کرتی ہے۔انہوں نے انتہائی خطرناک امدادی اور ریسکیو مشنز میں ہندوستانی فضائیہ کی کامیابیوں اور بحران کے وقت غیر ملکی شہریوں کی حفاظت کو یقینی بنانے میں اس کے کردار کو بھی سراہا۔
راج ناتھ سنگھ نے کہا کہ ہندوستانی فضائیہ نے انسانی ہمدردی پر مبنی کارروائیوں کے دوران ہندوستانی ثقافت اور اقدار کا وقار بلند کیا ہے۔
