نئی دہلی: الیکشن کمیشن کے تازہ ترین بلیٹن کے مطابق، یکم اگست کو بہار کی ووٹر لسٹ کے مسودے کی اشاعت کے بعد سے اب تک کسی بھی سیاسی جماعت نے نام شامل کرنے یا ہٹانے کے لیے کمیشن سے رابطہ نہیں کیا ہے۔ الیکشن کمیشن کے ایک افسر نے کہا، ایسا لگتا ہے کہ ہمیشہ کی طرح راہل گاندھی بہار کی ایس آئی آر (خصوصی گہرائی سے نظرثانی) میں اپنے دعوے اور اعتراضات انتخابات کے بعد ہی پیش کریں گے۔

الیکشن کمیشن نے لوک سبھا میں اپوزیشن لیڈر راہل گاندھی پر یہ طنز ایک دن بعد کیا جب انہوں نے کرناٹک، مہاراشٹر اور ہریانہ میں ’’ووٹ چوری‘‘ کے الزامات عائد کیے۔ ان تینوں ریاستوں کے چیف الیکشن افسران نے راہل گاندھی سے مطالبہ کیا ہے کہ وہ انتخابی ضابطوں کے مطابق حلف نامہ دے کر ان ووٹرز کے نام فراہم کریں جن پر انہیں اعتراض ہے۔

راہل گاندھی کے الزامات اور دعوے: کانگریس رہنما راہل گاندھی نے ووٹر لسٹ کی خصوصی نظرثانی کو ’’ادارہ جاتی چوری‘‘ قرار دیتے ہوئے الزام لگایا کہ الیکشن کمیشن غریبوں کے ووٹ کا حق چھیننے کے لیے بھارتیہ جنتا پارٹی (بی جے پی) کے ساتھ کھلی ملی بھگت کر رہا ہے۔

انہوں نے دعویٰ کیا کہ بہار میں ایس آئی آر اس لیے لایا گیا ہے کیونکہ الیکشن کمیشن جان چکا ہے کہ کانگریس نے اس کی ’’چوری پکڑ لی ہے‘‘۔ راہل گاندھی نے اپنے دعووں کو دہراتے ہوئے کہا کہ کرناٹک کی بنگلورو سنٹرل لوک سبھا سیٹ کے مہادیوپورہ اسمبلی حلقے میں پانچ طریقوں سے 1 لاکھ سے زائد ووٹ چوری کیے گئے۔ انہوں نے دعویٰ کیا کہ 2024 کے لوک سبھا انتخابات میں صرف اس ایک حلقے میں 1,00,250 ووٹ چرائے گئے۔

انہیں یقین ہے کہ پورے ہندوستان میں ایسی 100 سے زیادہ سیٹیں ہیں جہاں یہی صورتحال دہرائی گئی۔ اگر بی جے پی کی 10-15 سیٹیں کم ہوتیں تو نریندر مودی وزیراعظم نہ ہوتے، اور "انڈیا" اپوزیشن اتحاد کی حکومت ہوتی۔ راہل گاندھی نے یاد کرتے ہوئے کہا کہ جب وہ چھوٹے تھے، 1980 میں، تو اپنی بہن پرینکا کے ساتھ رات کو پوسٹر لگانے جایا کرتے تھے۔ انہوں نے کہا، ’’میں انتخابات کو سمجھتا ہوں اور پچھلے 20 سال سے خود بھی الیکشن لڑ رہا ہوں۔

میں جانتا ہوں کہ پولنگ کیسے ہوتی ہے، بوتھ کا انتظام کیسے ہوتا ہے، ووٹر لسٹ، فارم 17، یہ سب مجھے معلوم ہے۔‘‘ انہوں نے کہا کہ کچھ عرصہ پہلے انہیں محسوس ہوا کہ کچھ گڑبڑ ہو رہی ہے۔ انہوں نے کہا کہ کئی جگہوں پر انتخابی نتائج عوامی جذبات کے بالکل برعکس آ رہے ہیں

انہوں نے اتراکھنڈ کی مثال دی کہ ہم نے وہاں روڈ شو کیا، ہزاروں لوگ آئے، لیکن جب نتائج آئے تو ہمیں بہت کم ووٹ ملے، جیسے کسی نے ووٹ دیا ہی نہ ہو  یہ ناممکن ہے۔ راہل نے کہا کہ بعد میں چھتیس گڑھ اور مدھیہ پردیش کے نتائج آئے اور ہمیں یقین ہو گیا کہ کچھ تو گڑبڑ ہے۔ مدھیہ پردیش میں 2018 میں کانگریس نے کامیابی حاصل کی، لیکن بعد میں اس کی حکومت چھین لی گئی۔

بھارت جوڑو یاترا کے دوران بی جے پی حکومت کے خلاف زبردست عوامی غصہ دیکھا گیا، مگر 2023 کے انتخابات میں ہمیں صرف 65 سیٹیں ملیں — جو ناممکن ہے۔ انہوں نے کہا کہ جب ہم نے شک کا اظہار کیا تو ہم نے اپنے اتحادیوں کے ساتھ پریس کانفرنس کی اور الیکشن کمیشن سے ووٹر لسٹ اور ویڈیو ریکارڈنگ مانگی، لیکن ہمیں کچھ نہیں دیا گیا۔ اس سے ہمارا شک اور بڑھ گیا۔ تب ہمارے ذہن میں سوال آیا کہ کیا الیکشن کمیشن بی جے پی کی مدد کر رہا ہے؟ کیا وہ انتخابات چرانے میں ملوث ہے؟ پھر ہم نے ایک ٹیم تشکیل دی تاکہ وہ سچائی کا پتہ لگائے۔