نئی دہلی: ملک کی مختلف ریاستوں میں ووٹر فہرستوں کی خصوصی جامع نظرثانی (اسپیشل اِنٹینسیو ریویژن - SIR) کا عمل جاری ہے۔ اس دوران الیکشن کمیشن آف انڈیا (ای سی آئی) نے منگل کے روز اس مہم میں خدمات انجام دینے والے بوتھ لیول افسران (BLOs) اور بی ایل او سپروائزرز کے لیے 6,000 روپے کا خصوصی یکمشت اعزازیہ منظور کیا ہے۔

الیکشن کمیشن کی جانب سے جاری خط میں کہا گیا ہے: "خصوصی جامع نظرثانی (SIR) کے دوران کام کی نوعیت اور حجم کو مدنظر رکھتے ہوئے کمیشن نے اس عمل میں شامل ہر بوتھ لیول افسر (BLO) اور بی ایل او سپروائزر کو ان کے سالانہ معاوضے کے علاوہ ایک مرتبہ 6,000 روپے اعزازیہ دینے کی منظوری دی ہے۔" خط میں مزید ہدایت دی گئی کہ اس فیصلے سے متعلق تمام متعلقہ حکام کو آگاہ کیا جائے تاکہ اس پر عمل درآمد یقینی بنایا جا سکے۔

یہ خط آندھرا پردیش، اروناچل پردیش، چندی گڑھ، دادرا و نگر حویلی اور دمن و دیو، ہریانہ، جھارکھنڈ، کرناٹک، مہاراشٹر، منی پور، میگھالیہ، میزورم، ناگالینڈ، قومی دارالحکومت دہلی، اڈیشہ، پنجاب، سکم، تلنگانہ، تریپورہ اور اتراکھنڈ کے چیف الیکٹورل افسران کو ارسال کیا گیا ہے۔

واضح رہے کہ الیکشن کمیشن نے مئی میں اعلان کیا تھا کہ ووٹر فہرستوں کی خصوصی جامع نظرثانی (SIR) کے تیسرے مرحلے کا آغاز 16 ریاستوں اور 3 مرکز کے زیر انتظام علاقوں میں مرحلہ وار کیا جائے گا، جس کے تحت 36 کروڑ سے زائد ووٹروں کا احاطہ کیا جائے گا۔ کمیشن کی جانب سے جاری پریس نوٹ کے مطابق، اس عمل کو مردم شماری کے دوران گھروں کی فہرست سازی (House Listing) کے ساتھ ہم آہنگ کر کے ترتیب دیا گیا ہے، تاکہ فیلڈ مشینری کا مؤثر استعمال یقینی بنایا جا سکے۔

پریس نوٹ میں یہ بھی کہا گیا کہ جن تین ریاستوں یا مرکز کے زیر انتظام علاقوں میں مردم شماری کے دوسرے مرحلے کی تکمیل اور بالائی و برف پوش علاقوں کے موسمی حالات کو مدنظر رکھنا ضروری ہے، وہاں خصوصی جامع نظرثانی کے شیڈول کا اعلان بعد میں کیا جائے گا۔

الیکشن کمیشن کے مطابق، اس مہم کے دوران 3 لاکھ 94 ہزار سے زائد بوتھ لیول افسران (BLOs) گھر گھر جا کر ووٹروں کی تصدیق کا کام انجام دیں گے، جبکہ اس مرحلے میں سیاسی جماعتوں کی جانب سے مقرر کردہ 3 لاکھ 42 ہزار بوتھ لیول ایجنٹس (BLAs) بھی ان کی معاونت کریں گے۔ الیکشن کمیشن نے زور دے کر کہا کہ یہ ایک شراکتی عمل ہے، جس میں ووٹروں، سیاسی جماعتوں اور انتخابی عملے سمیت تمام متعلقہ فریقوں کی فعال شرکت کو یقینی بنایا جا رہا ہے۔