نئی دہلی

عید الاضحی کا تہوار 27 مئی کو متوقع ہے (چاند نظر آنے پر منحصر)، جس کے پیشِ نظر دہلی حکومت نے قومی دارالحکومت میں امن و امان اور صفائی ستھرائی کو یقینی بنانے کے لیے سخت رہنما ہدایات جاری کی ہیں۔

دہلی حکومت کے وزیر کپل مشرا نے خبردار کیا ہے کہ جانوروں کی قربانی اور کچرے کے انتظام سے متعلق قوانین کی خلاف ورزی کرنے والوں کے خلاف سخت فوجداری کارروائی کی جائے گی۔کپل مشرا نے کہا کہ قومی دارالحکومت میں مویشیوں، گایوں، بچھڑوں، اونٹوں اور دیگر ممنوعہ جانوروں کی قربانی دینا مکمل طور پر غیر قانونی ہے، اور ایسا کرنے والوں کو قانونی نتائج کا سامنا کرنا پڑے گا۔

انہوں نے کہا کہ دہلی حکومت کے محکمۂ ترقیات نے آنے والی عید الاضحی کے سلسلے میں کچھ ہدایات جاری کی ہیں۔ عید الاضحی کے موقع پر دہلی میں مویشیوں، گایوں، بچھڑوں، اونٹوں اور دیگر ممنوعہ جانوروں کی قربانی دینا مکمل طور پر غیر قانونی ہے۔ جو بھی ایسا کرے گا یا کرنے کی کوشش کرے گا، اس کے خلاف فوجداری مقدمہ درج کیا جائے گا اور قانونی کارروائی عمل میں لائی جائے گی۔

کپل مشرا نے مزید کہا کہ عوامی مقامات پر جانوروں کی قربانی دینا اور سڑکوں یا رہائشی علاقوں میں جانوروں کی غیر قانونی خرید و فروخت کی ہرگز اجازت نہیں ہوگی۔انہوں نے کہا کہ اس کے علاوہ عوامی مقامات پر جانوروں کی قربانی دینا مکمل طور پر ممنوع ہے، اور ایسا کرنے والوں کے خلاف قانونی کارروائی کی جائے گی۔ اسی طرح بازاروں میں جانوروں کی غیر قانونی خرید و فروخت، سڑکوں اور گلیوں میں مویشی منڈیاں لگانا، اور جانوروں کی خرید و فروخت کرنا بھی غیر قانونی ہے اور اس کی اجازت نہیں دی جائے گی۔دہلی کے وزیر نے قربانی کے بعد جانوروں کی آلائشوں اور خون کو غلط طریقے سے ٹھکانے لگانے کے خلاف بھی سخت انتباہ جاری کیا۔

کپل مشرا نے کہا کہ قربانی کے بعد نالیوں، سیور لائنوں یا سڑکوں پر خون بہانا، یا جانوروں کا کچرا اور آلائشیں نالیوں اور سیوروں میں پھینکنا سختی سے ممنوع ہے۔ قربانی صرف مقررہ مقامات پر اور صرف انہی جگہوں پر کی جانی چاہیے جہاں اس کی باقاعدہ اجازت حاصل ہو۔

انہوں نے شہریوں سے اپیل کی کہ اگر انہیں کوئی شخص ان ہدایات کی خلاف ورزی کرتا نظر آئے تو اس کی اطلاع فوراً پولیس اور دہلی حکومت کے محکمۂ ترقیات کو دیں۔کپل مشرا نے کہا کہ اگر آپ کو کوئی شخص ان رہنما ہدایات کی خلاف ورزی کرتا ہوا دکھائی دے تو آپ اس کی شکایت پولیس اور دہلی حکومت کے محکمۂ ترقیات سے کر سکتے ہیں۔