نئی دہلی: مصر کے صدر عبدالفتاح السیسی جمعہ کو 18ویں برکس سربراہ اجلاس میں شرکت کے لیے نئی دہلی پہنچ گئے۔ ہندوستان کی 2026 کی صدارت میں برکس ممالک کے سربراہان کا اجلاس 12 اور 13 ستمبر کو نئی دہلی میں منعقد ہوگا۔مصری صدر کا ہوائی اڈے پر وزیر مملکت برائے دفاع سنجے سیٹھ نے استقبال کیا۔ صدر السیسی کی آمد ایسے وقت میں ہوئی ہے جب برکس سربراہ اجلاس میں شرکت کے لیے کئی اہم رہنما اور اعلیٰ شخصیات نئی دہلی پہنچ رہی ہیں۔
روس کے صدر ولادیمیر پوتن اور ایران کے صدر مسعود پزشکیان بھی برکس سربراہ اجلاس میں شرکت کے لیے ہندوستان پہنچ چکے ہیں جبکہ اقوام متحدہ کے سیکریٹری جنرل انتونیو گوتریس بھی اجلاس میں شرکت کے لیے نئی دہلی میں موجود ہیں۔ہندوستان 12 اور 13 ستمبر کو نئی دہلی میں 18ویں برکس سربراہ اجلاس کی میزبانی کر رہا ہے۔ ہندوستان کی صدارت کا مرکزی موضوع ’’مضبوطی جدت تعاون اور پائیداری کے لیے تعمیر‘‘ ہے جس کے تحت ترقی پائیداری اور جدت کو اہم ترجیحات میں شامل کیا گیا ہے۔
برکس بڑی ابھرتی ہوئی معیشتوں کے درمیان تعاون اور رابطے کے لیے ایک اہم پلیٹ فارم کے طور پر ابھرا ہے۔ یہ کثیر ملکی اداروں میں عالمی جنوب کے مفادات کو آگے بڑھانے کے لیے بھی اہم کردار ادا کر رہا ہے۔ تنظیم کے ایجنڈے میں ترقی مالیات ٹیکنالوجی تجارت اور عوامی سطح پر باہمی روابط سمیت مختلف شعبے شامل ہیں۔
برکس میں اس وقت 11 ممالک برازیل چین مصر ایتھوپیا ہندوستان انڈونیشیا ایران روس سعودی عرب جنوبی افریقہ اور متحدہ عرب امارات شامل ہیں۔ہندوستان کی 2026 کی صدارت سے متعلق فراہم کردہ معلومات کے مطابق برکس کے رکن ممالک مجموعی طور پر دنیا کی تقریباً 49.5 فیصد آبادی 40 فیصد عالمی مجموعی قومی پیداوار اور عالمی تجارت کا 26 فیصد حصہ رکھتے ہیں۔
ہندوستان کو برکس کی صدارت ایسے وقت میں ملی ہے جب دنیا کو عالمی اقتصادی تقسیم تکنیکی تبدیلی جغرافیائی سیاسی غیر یقینی صورتحال موسمیاتی تبدیلی اور وسائل پر بڑھتے ہوئے دباؤ جیسے چیلنجوں کا سامنا ہے۔برکس کی توسیع سے تنظیم کو ترقی موسمیاتی اقدامات ٹیکنالوجی توانائی اور مالیاتی استحکام کے شعبوں میں تعاون کے لیے ایک وسیع پلیٹ فارم ملا ہے۔ اس کے ساتھ ساتھ عالمی اداروں میں اصلاحات سے متعلق مباحث میں بھی برکس کا کردار اہم ہوتا جا رہا ہے۔
ہندوستان کے لیے 2026 کی برکس صدارت کا مقصد تنظیم کی وسیع تر نمائندگی کو مؤثر تعاون اور ٹھوس نتائج میں تبدیل کرنا ہے۔ اس کے ساتھ متنوع رکن ممالک کے درمیان اتفاق رائے پیدا کرنے اور برکس کے موجودہ طریقہ کار کو مزید مؤثر بنانے پر بھی توجہ مرکوز کی جا رہی ہے۔
