نئی دہلی: مرکزی وزیر تعلیم پرہلاد جوشی نے ہفتہ کو یومِ اساتذہ کے موقع پر قومی اساتذہ ایوارڈ 2026 کے 82 حاصل کنندگان سے بات چیت کی۔ وزارت تعلیم کے مطابق، مرکزی وزیر تعلیم نے اساتذہ پر زور دیا کہ وہ بچوں کو ’ترقی یافتہ ہندوستان 2047‘ کی تعمیر کے لیے تیار کریں۔ اساتذہ کے اہم کردار کو اجاگر کرتے ہوئے جوشی نے کہا کہ طلبہ ملک کی سب سے بڑی دولت ہیں اور انہیں ہمہ جہت شخصیت کے طور پر تیار کیا جانا چاہیے۔

وزارت تعلیم نے ایکس پر جاری پوسٹ میں کہا، ”مرکزی وزیر تعلیم پرہلاد جوشی نے قومی اساتذہ ایوارڈ 2026 حاصل کرنے والے اساتذہ سے بات چیت کی۔ انہوں نے کہا کہ اساتذہ کو بچوں کو ترقی یافتہ ہندوستان 2047 کی تعمیر کے لیے تیار کرنا چاہیے۔ طلبہ ملک کی سب سے بڑی دولت ہیں اور انہیں ہمہ جہت شخصیت کے طور پر تیار کیا جانا چاہیے۔“

اس موقع پر وزرائے مملکت جینت چودھری اور ڈاکٹر سکانت مجمدار بھی موجود تھے۔ بعد میں ایکس پر ایک پوسٹ میں مرکزی وزیر تعلیم نے قومی اساتذہ ایوارڈ کے لیے منتخب 82 اساتذہ کو مبارکباد دی۔ انہوں نے کہا کہ اپنی غیر معمولی خدمات کے ذریعے یہ اساتذہ ملک بھر کے بے شمار طلبہ کو بلند مقاصد حاصل کرنے کی ترغیب دے رہے ہیں۔ انہوں نے کہا کہ اساتذہ کا کام صرف علم فراہم کرنا نہیں بلکہ بچوں کے مستقبل کو تشکیل دینا بھی ہے۔

Union Education Minister Sh @JoshiPralhad interacts with recipients of the 2026 #NationalTeachersAwards

Says teachers must prepare children for ushering in #ViksitBharat2047. Students are the ultimate wealth of the nation and they should be groomed to become all-rounded… pic.twitter.com/GhAmBZs5aE

— Ministry of Education (@EduMinOfIndia) September 5, 2026

مرکزی وزیر پرہلاد جوشی نے کہا، ”اساتذہ صرف علم فراہم نہیں کرتے بلکہ مستقبل کی تشکیل بھی کرتے ہیں۔ قومی اساتذہ ایوارڈ کے لیے منتخب 82 اساتذہ کو دلی مبارکباد۔ اپنی لگن، جدت اور غیر معمولی خدمات کے ذریعے وہ ملک بھر کے بے شمار طلبہ کو بڑے خواب دیکھنے اور بلند مقاصد حاصل کرنے کی ترغیب دے رہے ہیں۔ میں ان تمام اساتذہ کا تہہ دل سے شکریہ ادا کرتا ہوں جو ہر روز محض علم دینے سے آگے بڑھ کر اگلی نسل کو بااختیار بنانے اور ترقی یافتہ ہندوستان کی بنیاد مضبوط کرنے کے لیے کام کرتے ہیں۔ یومِ اساتذہ پر تمام اساتذہ کو نیک خواہشات۔“

مرکزی وزیر مملکت برائے تعلیم جینت چودھری اور شمال مشرقی خطے کی ترقی و تعلیم کے وزیر مملکت سکانت مجمدار نے بھی قومی اساتذہ ایوارڈ 2026 کے 82 حاصل کنندگان سے بات چیت کی۔ یومِ اساتذہ کے موقع پر وزیر مملکت سکانت مجمدار نے ہندوستان کے دوسرے صدر اور بھارت رتن سے سرفراز ڈاکٹر سروپلی رادھا کرشنن کو خراج عقیدت پیش کیا۔ انہوں نے کہا کہ ڈاکٹر رادھا کرشنن کی گہری بصیرت اور تعلیم کے تئیں ان کی غیر متزلزل وابستگی آج بھی نسلوں کے لیے تحریک کا باعث ہے۔

مجمدار نے کہا، ”یومِ اساتذہ کے موقع پر سبھی کو دلی مبارکباد اور نیک خواہشات۔ ممتاز فلسفی، دانشور، سابق پروفیسر اور ہندوستان کے دوسرے صدر، بھارت رتن ڈاکٹر سروپلی رادھا کرشنن جی کی یومِ پیدائش پر میں انہیں خراج عقیدت پیش کرتا ہوں۔ ان کی گہری بصیرت، تعلیم کے تئیں غیر متزلزل وابستگی اور ملک کی تعمیر میں ان کی انمول خدمات نسلوں کو تحریک دیتی رہیں گی اور علم و تعلیم کی تبدیلی کی طاقت کی یاد دلاتی رہیں گی۔“ اس سے قبل جمعہ کو صدر دروپدی مرمو نے نئی دہلی کے وگیان بھون میں 48 اسکولی اساتذہ کو قومی اساتذہ ایوارڈ سے نوازا تھا۔

ایوارڈ حاصل کرنے والوں کا انتخاب ضلع، ریاست اور قومی سطح پر تین مرحلوں کے عمل کے ذریعے کیا گیا۔ ان میں 26 مرد اور 22 خواتین اساتذہ شامل ہیں، جو 27 ریاستوں، سات مرکز کے زیر انتظام علاقوں اور مرکزی حکومت کے چھ اداروں کی نمائندگی کرتے ہیں۔

ایوارڈ تقریب کے بعد وزیر اعظم نریندر مودی نے 7، لوک کلیان مارگ پر قومی اساتذہ ایوارڈ حاصل کرنے والے اساتذہ کی میزبانی کی۔ اس دوران انہوں نے اساتذہ کے ساتھ تدریس کے جدید طریقوں، عوامی تقریر، اسکرین کی لت، منشیات کے استعمال اور ”بچپن کو زندہ رکھنے“ کی ضرورت جیسے موضوعات پر غیر رسمی لیکن فکر انگیز گفتگو کی۔ یومِ اساتذہ ہر سال 5 ستمبر کو سابق صدر ڈاکٹر سروپلی رادھا کرشنن کی یومِ پیدائش کے موقع پر منایا جاتا ہے۔ وہ فلسفی، دانشور اور استاد تھے اور ملک بھر میں اساتذہ کے لیے وقف یہ دن ان کی خدمات اور ورثے کو خراج عقیدت پیش کرتا ہے۔