نئی دہلی/ آواز دی وائس

انفورسمنٹ ڈائریکٹوریٹ (ای ڈی) نے کیرالہ میں چل رہی پونزی اسکیم مائی کلب ٹریڈرز کے خلاف بڑی کارروائی کی ہے۔ ای ڈی کے کوچی زونل دفتر نے اس معاملے میں تقریباً 3.78 کروڑ روپے کی منقولہ اور غیر منقولہ جائیدادوں کو عارضی طور پر ضبط کیا ہے۔ یہ جائیدادیں مبینہ طور پر دھوکہ دہی سے کمائی گئی رقم سے خریدی گئی تھیں۔

ای ڈی کے مطابق اس پونزی اسکیم کو محمد فیصل، ابو سفیان اور ان کے ساتھی چلا رہے تھے۔ یہ لوگ سادہ لوح سرمایہ کاروں کو زیادہ منافع کا لالچ دے کر ٹھگتے تھے۔ ضبط کی گئی جائیدادوں میں زرعی زمین، رہائشی مکانات، دفتر کی عمارت والی تجارتی زمین اور بینک کھاتے شامل ہیں، جو ملزمان، ان سے منسلک افراد اور کمپنیوں کے نام پر درج ہیں۔

روزانہ ایک فیصد منافع کا جھانسہ

تحقیقات میں سامنے آیا ہے کہ ملزمان سرمایہ کاروں کو ہر کام کے دن لگائی گئی رقم پر ایک فیصد یومیہ منافع دینے کا وعدہ کرتے تھے، جو مکمل طور پر غیر حقیقی تھا۔ اس اسکیم کو کرپٹو کرنسی اور دیگر کاروبار میں سرمایہ کاری کے طور پر پیش کیا گیا، جبکہ درحقیقت یہ ایک پیرامڈ/منی سرکولیشن اسکیم تھی۔ نئے سرمایہ کار شامل کرنے پر 10 فیصد بائنری کمیشن کا لالچ بھی دیا جاتا تھا۔ ای ڈی کے مطابق، یہ اسکیم نئے سرمایہ کاروں سے آنے والی رقم سے پرانے سرمایہ کاروں کو ادائیگیاں کرتی رہی۔ جیسے ہی نئے سرمایہ کار آنا بند ہوئے، اسکیم بیٹھ گئی اور لوگوں کی رقم واپس نہیں مل سکی۔

نقد وصولی اور شیل کمپنیوں کے ذریعے منی لانڈرنگ

تحقیقات میں یہ بھی انکشاف ہوا کہ رقم زیادہ تر نقد میں وصول کی جاتی تھی تاکہ ایجنسیوں کی نظر سے بچا جا سکے۔ بعد ازاں اس رقم کو ایم/ایس پرنسس گولڈ اینڈ ڈائمنڈز ایل ایل پی اور ایم/ایس ٹول ڈیل وینچرز ایل ایل پی جیسی شیل کمپنیوں کے ذریعے گھمایا گیا اور جائیدادیں خریدی گئیں۔

اس معاملے میں ای ڈی نے 4 جون 2025 کو پہلے ہی پانچ مقامات پر چھاپے مارے تھے، جہاں سے نقد لین دین کے ریکارڈ والی ڈائریاں، سرمایہ کاروں کی معلومات، مالیاتی دستاویزات اور ڈیجیٹل آلات برآمد کیے گئے تھے۔