سری نگر/ آواز دی وائس

اینفورسمنٹ ڈائریکٹوریٹ (ای ڈی) نے جمعرات کے روز نشیلی اشیا اور دہشت گردی کی فنڈنگ سے جڑے ایک کیس میں جموں و کشمیر کے چھ مختلف مقامات پر چھاپے مارے، حکام نے اس کی تصدیق کی۔ چھاپے کی کارروائی جموں کے دو اور کشمیر کے چار مقامات پر جاری ہے، جن میں سابق وزیر اور سابق ایم ایل اے جتندر سنگھ عرف بابو سنگھ کی رہائش گاہ کٹھوعہ میں شامل ہے۔

ای ڈی کے جموں سب زونل دفتر نے جمعرات کی صبح سے یہ تلاشی مہم شروع کی۔ یہ کیس 30 مارچ 2022 کو اس وقت سامنے آیا تھا جب پولیس نے محمد شریف شاہ کو گرفتار کیا، جو مبینہ طور پر کشمیر سے جموں تک 6.9 لاکھ روپے حوالہ کے ذریعے جتندر سنگھ تک پہنچانے کی کوشش کر رہا تھا۔ حکام کے مطابق، یہ رقم مبینہ طور پر جموں میں علیحدگی پسند اور تخریبی گروہوں کی سرگرمیوں کی مالی مدد کے لیے بھیجی جا رہی تھی۔

مزید تحقیقات سے انکشاف ہوا کہ یہ ایک وسیع نیٹ ورک ہے جس میں سیف الدین، فاروق احمد نائیکو اور مبشر مشتاق فافو جیسے کئی ملزمان شامل ہیں، جو مبینہ طور پر پاکستان میں مقیم ہینڈلرز کے ذریعے چلائے جانے والے سرحد پار منشیات و دہشت گردی کے نیٹ ورک کا حصہ تھے۔ حکام کے مطابق، یہ نیٹ ورک منشیات کی اسمگلنگ سے حاصل ہونے والی رقم کو ہندوستان میں دہشت گرد سرگرمیوں کی مالی اعانت کے لیے استعمال کرتا تھا۔ مالی ریکارڈ کے تجزیے سے یہ بات سامنے آئی کہ فاروق احمد نائیکو نے 2021-22 کے دوران ایک ایسا منشیات و دہشت گردی فنڈنگ ریکیٹ منظم کیا، جس میں پاکستان سے اسمگل کی گئی ہیروئن ہندوستان میں فروخت کی گئی۔

ان غیر قانونی فروخت سے حاصل ہونے والی رقم  جو دو کروڑ روپے سے زائد تھی  سری نگر کے مقامی بینک اکاؤنٹس میں جمع کرائی گئی، اور بعد ازاں دبئی میں مقیم ہندوستانی شہریوں کے اکاؤنٹس میں منتقل کی گئی، تاکہ رقم کے اصل ماخذ کو چھپایا جا سکے۔ حکام کے مطابق، یہ رقم دبئی میں نکلوائی گئی اور جمع کی گئی، جسے بعد میں پاکستان میں موجود حزب المجاہدین کے کارندوں تک پہنچایا گیا۔ ای ڈی کی تفتیش اب بھی جاری ہے تاکہ باقی رقمی نیٹ ورک کا سراغ لگایا جا سکے اور ان دیگر افراد کی شناخت کی جا سکے جو اس منشیات و دہشت گردی کے مالی نیٹ ورک سے منسلک ہیں۔