نئی دہلی

انفورسمنٹ ڈائریکٹوریٹ (ای ڈی) نے بدھ کے روز دہلی میں پانچ مقامات پر تلاشی مہم شروع کی۔یہ کارروائی مندرہ بندرگاہ پر تقریباً 3,000 کلوگرام منشیات ضبط کیے جانے کے معاملے سے متعلق منی لانڈرنگ کی تحقیقات کے سلسلے میں کی جا رہی ہے۔

یہ چھاپے پریوینشن آف منی لانڈرنگ ایکٹ کے تحت ہرپریت سنگھ تلوار، شمس الدین اور ان کے ساتھیوں سے وابستہ مقامات پر مارے جا رہے ہیں۔حکام کے مطابق ایجنسی منشیات کی اسمگلنگ سے حاصل ہونے والی آمدنی کو مبینہ طور پر قانونی شکل دینے (منی لانڈرنگ) کے معاملات کی تحقیقات کر رہی ہے۔

تفتیشی حکام نے بتایا کہ ابتدائی تحقیقات سے معلوم ہوا ہے کہ منشیات کی تجارت سے حاصل ہونے والی رقم کا ایک حصہ دارالحکومت کے نائٹ کلبوں میں سرمایہ کاری کے طور پر استعمال کیا گیا، جس سے ہوٹل اور مہمان نوازی کے شعبے میں غیر قانونی فنڈز کے استعمال کے حوالے سے تشویش پیدا ہوئی ہے۔ای ڈی کے ہیڈکوارٹر یونٹ نے منگل کو تلاشی کا عمل شروع کیا تھا اور رقم کے لین دین کے راستوں (منی ٹریل) کا سراغ لگانے اور دیگر روابط کی نشاندہی کے لیے مزید تحقیقات جاری ہیں۔

اگست 2022 میں قومی تحقیقاتی ایجنسی (این آئی اے) نے اسی مقدمے میں دہلی کے رہائشی ہرپریت سنگھ تلوار عرف کبیر تلوار کو گرفتار کیا تھا۔ یہ مقدمہ 13 ستمبر 2021 کو مندرہ بندرگاہ پر 2,988 کلوگرام ہیروئن ضبط کیے جانے سے متعلق ہے۔انہیں دہلی کے ہی رہائشی پرنس شرما کے ساتھ گرفتار کیا گیا تھا۔ یہ گرفتاریاں این آئی اے کے مقدمہ نمبر آر سی (26/2021/این آئی اے /ڈی ایل آئی) کے تحت دہلی، گجرات، پنجاب اور مغربی بنگال میں 20 مختلف مقامات پر بیک وقت چھاپوں کے بعد عمل میں آئی تھیں۔

حکام کے مطابق دونوں افراد پر افغانستان سے سمندری راستے کے ذریعے درآمدی کھیپ میں ہیروئن اسمگل کرنے میں ملوث ہونے کا شبہ تھا۔ ہرپریت سنگھ تلوار کو حال ہی میں ضمانت پر رہا کیا گیا تھا۔این آئی اے کی تحقیقات کے مطابق ہرپریت سنگھ تلوار اور پرنس شرما ایک بین الاقوامی منشیات اسمگلنگ نیٹ ورک کا حصہ تھے۔

یہ نیٹ ورک افغانستان سے بڑے تجارتی پیمانے پر ہیروئن اسمگل کر کے ہندوستان لانے میں ملوث تھا۔ منشیات کو نیم پراسیس شدہ ٹیلک، بٹومینس کوئلہ اور دیگر درآمدی سامان کی کھیپوں میں چھپا کر لایا جاتا تھا۔این آئی اے کے مطابق 13 ستمبر 2021 کو ڈائریکٹوریٹ آف ریونیو انٹیلی جنس (DRI) نے مندرہ بندرگاہ پر تقریباً 3,000 کلوگرام ہیروئن پر مشتمل ایسی ہی ایک کھیپ پکڑ کر ضبط کی تھی۔

ایجنسی نے بتایا کہ ملزمان جعلی اور شیل درآمدی کمپنیوں کے ذریعے منشیات کی درآمد میں ملوث تھے۔ بعد ازاں یہ منشیات دہلی میں مقیم افغان شہریوں تک پہنچائی جاتی تھیں، جو دہلی، پنجاب، ہریانہ اور اتر پردیش سمیت مختلف ریاستوں میں ہیروئن کو صاف کرنے اور تقسیم کرنے کا کام کرتے تھے۔

این آئی اے کا کہنا ہے کہ اس بین الاقوامی منشیات نیٹ ورک، منی لانڈرنگ، منشیات کی تقسیم اور اس میں ملوث دیگر افراد کی مکمل سپلائی چین کا پتہ لگانے کے لیے تحقیقات ابھی بھی جاری ہیں۔