نئی دہلی
مرکزی وزیرِ خزانہ نرملا سیتا رمن نے جمعہ کو کہا کہ ایک لاکھ کروڑ روپے کے اکنامک اسٹیبلائزیشن فنڈ سے حکومت کو مالیاتی گنجائش حاصل ہوگی، جس کے ذریعے عالمی سطح پر پیدا ہونے والے دباؤ اور چیلنجز کا مؤثر طریقے سے مقابلہ کیا جا سکے گا۔لوک سبھا میں اضافی گرانٹس کے دوسرے مرحلے پر ہونے والی بحث کا جواب دیتے ہوئے انہوں نے کہا کہ یہ فنڈ مغربی ایشیا میں جاری موجودہ صورتحال جیسے غیر متوقع عالمی چیلنجز سے پیدا ہونے والے معاشی جھٹکوں کو برداشت کرنے کے لیے ایک حفاظتی بفر کے طور پر کام کرے گا۔
انہوں نے کہا كہ ایک لاکھ کروڑ روپے کا اکنامک اسٹیبلائزیشن فنڈ حکومت کو مالیاتی گنجائش فراہم کرے گا تاکہ عالمی معاشی دباؤ کا مؤثر جواب دیا جا سکے۔اضافی گرانٹس کے دوسرے مرحلے کے ذریعے حکومت نے موجودہ مالی سال میں مجموعی طور پر 2.81 لاکھ کروڑ روپے اضافی خرچ کرنے کی منظوری لوک سبھا سے طلب کی ہے۔ موجودہ مالی سال میں 80 ہزار کروڑ روپے کی اضافی آمدنی کو مدنظر رکھتے ہوئے خالص اضافی نقد خرچ تقریباً 2.01 لاکھ کروڑ روپے ہوگا۔
نرملا سیتا رمن نے کہا کہ موجودہ مالی سال 2025-26 کے لیے مالیاتی خسارہ نظرثانی شدہ تخمینوں کے اندر ہی رہے گا۔ نظرثانی شدہ تخمینوں کے مطابق مالی سال 2025-26 کے لیے مالیاتی خسارہ مجموعی گھریلو پیداوار (جی ڈی پی) کا 4.4 فیصد رہنے کا اندازہ ہے، جو بجٹ تخمینے کے برابر ہے۔
انہوں نے کہا کہ اضافی گرانٹس کے دوسرے مرحلے کے باوجود 2025-26 کے بجٹ تخمینوں سے زیادہ خرچ نہیں ہوگا۔ اس دوران اپوزیشن اراکین ایل پی جی کی قلت کے مسئلے پر مسلسل نعرے بازی کر رہے تھے۔موجودہ مالی سال کے نظرثانی شدہ تخمینوں میں حکومت نے کل اخراجات کو 50.65 لاکھ کروڑ روپے سے کم کر کے 49.65 لاکھ کروڑ روپے کر دیا تھا۔
کنٹرولر جنرل آف اکاؤنٹس کے اعداد و شمار کے مطابق جنوری تک حکومت تقریباً 36.90 لاکھ کروڑ روپے خرچ کر چکی تھی۔اضافی گرانٹس میں ایک لاکھ کروڑ روپے کے اکنامک اسٹیبلائزیشن فنڈ کے قیام کے لیے رقم مختص کرنے کی تجویز بھی شامل ہے۔ اس کے علاوہ کھاد کی سبسڈی کے لیے 19,230 کروڑ روپے اضافی خرچ اور پردھان منتری غریب کلیان انا یوجنا کے تحت سبسڈی کے لیے 23,641 کروڑ روپے اضافی خرچ کی منظوری بھی پارلیمنٹ سے طلب کی گئی ہے۔
دیگر بڑے اخراجات میں وزارتِ دفاع کے لیے 41,822 کروڑ روپے شامل ہیں۔وزیرِ خزانہ نے کہا کہ کسانوں کے لیے کھاد کی کوئی کمی نہیں ہوگی اور اضافی گرانٹس میں اس کے لیے مناسب انتظام کیا گیا ہے۔
.gif)
