نئی دہلی/آواز دی وائس

چیف الیکشن کمشنر  گیانیش کمار نے 2026 کے لیے انٹرنیشنل انسٹیٹیوٹ فار ڈیموکریسی اینڈ الیکٹورل اسسٹنس کی کونسل آف ممبر اسٹیٹس کی چیئرمین شپ سنبھال لی اور ہندوستان کے الیکشن کمیشن  کو دنیا کی سب سے بڑی تنظیم قرار دیا، جس میں دس لاکھ سے زیادہ عملہ شامل ہے۔

بدھ کے روز اسٹاک ہوم میں اپنے قبولیتِ خطاب میں سی ای سی کمار نے ہندوستان کی جمہوری مشق کے وسیع پیمانے کو نمایاں کیا۔ پریس ریلیز کے مطابق، ہندوستان میں 28 ریاستوں اور 8 مرکز کے زیر انتظام علاقوں میں 90 کروڑ سے زائد ووٹرز موجود ہیں۔2024 کے عام انتخابات پر روشنی ڈالتے ہوئے انہوں نے بتایا کہ ہندوستان نے ایک بے مثال جمہوری منظرنامہ دیکھا، جہاں 743 سیاسی جماعتوں کے 20 ہزار سے زیادہ امیدواروں نے حصہ لیا، جن میں 6 قومی جماعتیں اور 67 ریاستی جماعتیں شامل تھیں۔

انہوں نے کہا کہ ہندوستان کی 28 ریاستوں اور 8 یونین ٹیریٹریز میں 900 ملین سے زیادہ ووٹرز ہیں۔ الیکشن کمیشن آف انڈیا کے پاس شفاف انتخابات کرانے اور اہلیت کی بنیاد پر درست ووٹر لسٹ تیار کرنے کا تقریباً 75 سال کا تجربہ ہے۔ لوک سبھا انتخابات کے دوران، الیکشن کمیشن آف انڈیا دنیا کی سب سے بڑی تنظیم بن جاتا ہے، جس میں دس لاکھ سے زیادہ اہلکار کام کرتے ہیں۔ ای سی آئی کے مطابق، 2024 کے لوک سبھا انتخابات میں 20 ملین سے زیادہ انتخابی عملہ تعینات کیا گیا، جن میں 10 لاکھ سے زائد بوتھ لیول آفیسرز اور 50 لاکھ پولنگ اسٹاف شامل تھے۔

سی ای سی کمار نے مزید کہا کہ میں ہندوستان سے ہوں، اس لیے میں آپ کو ہندوستان کے بارے میں بتاتے ہوئے آغاز کروں گا۔ ہندوستان جمہوریت کی جنم بھومی ہے اور آج یہ دنیا کی سب سے بڑی جمہوریت بھی ہے۔ الیکشن کمیشن آف انڈیا ایک آئینی ادارہ ہے اور صدر، نائب صدر، پارلیمنٹ، قانون ساز اسمبلیوں اور قانون ساز کونسلوں کے انتخابات کرانا اس کی آئینی ذمہ داری ہے۔

انہوں نے بتایا کہ آزادی 1947 کے بعد سے ہندوستان میں پارلیمنٹ کے 18 عام انتخابات اور ریاستی اسمبلیوں کے 400 سے زیادہ عام انتخابات منعقد ہو چکے ہیں۔ انہوں نے کہا کہ ہندوستان کا وژن یہ ہے کہ دنیا کے ساتھ نہ صرف دنیا کی سب سے بڑی، سب سے متنوع اور جامع جدید جمہوریت کے تجربات کو بانٹا جائے بلکہ وہ جمہوری قدریں بھی شیئر کی جائیں جو ہندوستان کی تہذیبی وراثت میں رچی بسی ہیں۔

آئندہ سمت کا تعین کرتے ہوئے، سی ای سی نے وعدہ کیا کہ ہندوستان کی چیئرمین شپ فیصلہ کن، بلند عزائم پر مبنی اور عملی اقدامات والی ہوگی۔ چیئرمین کی حیثیت سے، گیانیش کمار کونسل کے کام کو ہندوستان کے مرکزی موضوع کے تحت آگے بڑھائیں گے: “ایک جامع، پُرامن، مضبوط اور پائیدار دنیا کے لیے جمہوریت‘‘ اور دو بنیادی نکات پر فوکس کریں گے۔

مستقبل کی جمہوریت کا ازسرِنو تصور

پائیدار جمہوریت کے لیے خودمختار اور پیشہ ورانہ الیکشن مینجمنٹ باڈیز

پریس ریلیز کے مطابق، یہ چیئرمین شپ ایک اہم سنگِ میل ہے، جو الیکشن کمیشن آف انڈیا اور جدید انتخابی انتظامی اداروں کی عالمی سطح پر پہچان کی عکاسی کرتی ہے۔ ہندوستان، جو انٹڑنیشنل آئڈیا  کا بانی رکن ہے، ہمیشہ سے اس کی حکمرانی، جمہوری مباحث اور ادارہ جاتی اقدامات میں فعال کردار ادا کرتا آیا ہے۔ اپنے خطاب کے اختتام پر سی ای سی نے کہا کہ ہندوستان اس بات کو یقینی بنانے کی کوشش کرے گا کہ ہر ووٹ کی قدر ہو، ہر آواز سنی جائے اور دنیا بھر کی جمہوریتیں مزید جامع، پُرامن، مضبوط اور پائیدار بنیں۔ اس موقع پر ہندوستان کے سویڈن میں سفیر، انوراگ بھوشن بھی موجود تھے۔ پریس ریلیز میں مزید بتایا گیا کہ ہندوستان کے ساتھ ساتھ ماریشس اور میکسیکو بھی 2026 میں انٹرنیشنل آئی ڈی ای اے کونسل کے نائب صدر کی حیثیت سے ذمہ داری سنبھالیں گے۔