نئی دہلی
وزیر خارجہ ڈاکٹر ایس جے شنکر نے جمعرات کو وینزویلا کی قائم مقام صدر ڈیلسی روڈریگیز سے نئی دہلی میں ملاقات کی اور جنوبی امریکی ملک کے ساتھ تعلقات کو مزید مضبوط بنانے کے لیے ہندوستان کے عزم کا اعادہ کیا۔
ڈاکٹر ایس جے شنکر نے سوشل میڈیا پلیٹ فارم ایکس پر ایک پوسٹ میں کہا کہ انہیں آج نئی دہلی میں وینزویلا کی قائم مقام صدر ڈیلسی روڈریگیز سے ملاقات کرکے خوشی ہوئی۔ انہوں نے وینزویلا اور ہندوستان کے تعلقات کے فروغ کے لیے ڈیلسی روڈریگیز کے طویل عرصے سے جاری عزم کو سراہتے ہوئے کہا کہ ہندوستان اس شراکت داری کو بہت اہمیت دیتا ہے۔
انہوں نے مزید کہا کہ ڈیلسی روڈریگیز کی وزیر اعظم نریندر مودی کے ساتھ ملاقات دونوں ممالک کے درمیان تعاون کو مزید مضبوط بنانے میں مددگار ثابت ہوگی۔وینزویلا کی قائم مقام صدر ڈیلسی روڈریگیز بدھ کے روز پانچ روزہ سرکاری دورے پر نئی دہلی پہنچی تھیں۔ اس دورے کا مقصد دونوں ممالک کے درمیان دوطرفہ تعلقات کو مزید وسعت دینا اور مختلف شعبوں میں تعاون کو فروغ دینا ہے۔
وزارتِ خارجہ نے ان کا خیرمقدم کرتے ہوئے کہا کہ یہ دورہ دونوں ممالک کو باہمی شراکت داری کو مزید مضبوط بنانے اور موجودہ تعاون کو نئی بلندیوں تک لے جانے کا موقع فراہم کرے گا۔ وزارت کے مطابق ڈیلسی روڈریگیز اپنے دورے کے دوران وزیر اعظم نریندر مودی اور دیگر اعلیٰ ہندوستانی رہنماؤں کے ساتھ دوطرفہ مذاکرات کریں گی۔
وزارتِ خارجہ کے مطابق یہ دورہ 3 جون سے 7 جون تک جاری رہے گا۔ ڈیلسی روڈریگیز ایک اعلیٰ سطحی وفد کے ہمراہ ہندوستان آئی ہیں، جس میں وینزویلا کے وزرائے خارجہ، معیشت و مالیات، سائنس و ٹیکنالوجی، مواصلات و اطلاعات اور ٹرانسپورٹ شامل ہیں۔
اپنے دورے کے دوران وہ راج گھاٹ جا کر مہاتما گاندھی کو خراجِ عقیدت بھی پیش کریں گی۔وزارتِ خارجہ کے مطابق اعلیٰ سطحی مذاکرات میں دونوں ممالک کے تعلقات کے تمام پہلوؤں کا جائزہ لیا جائے گا اور توانائی کی سلامتی، تجارت و سرمایہ کاری، دواسازی، صحت، نقل و حمل اور قابلِ تجدید توانائی سمیت اہم شعبوں میں تعاون کو مزید گہرا کرنے کے امکانات پر غور کیا جائے گا۔
حکام کا کہنا ہے کہ یہ دورہ وینزویلا اور ہندوستان کے درمیان روایتی دوستانہ تعلقات کو مزید مضبوط بنانے اور اقتصادی و توانائی کے شعبوں میں تعاون کو نئی رفتار دینے میں اہم کردار ادا کرے گا۔
