نئی دہلی:ہندستان کے وزیر خارجہ ایس جے شنکر نے ایران کے وزیر خارجہ سید عباس عراقچی سے ٹیلیفون پر بات چیت کی جس میں دوطرفہ امور اور برکس سے متعلق مسائل پر تبادلہ خیال کیا گیا۔ایس جے شنکر نے ایکس پر اپنے پیغام میں کہا کہ گزشتہ رات ایرانی وزیر خارجہ سید عباس عراقچی سے دوبارہ گفتگو ہوئی جس میں دوطرفہ امور کے ساتھ برکس سے متعلق معاملات پر بھی بات کی گئی۔

موجودہ تنازع کے دوران جب امریکہ اور اسرائیل ایک طرف اور ایران دوسری طرف ہیں دونوں رہنماؤں کے درمیان یہ چوتھی گفتگو بتائی جا رہی ہے۔اس سے قبل بھی ایس جے شنکر اور ایرانی وزیر خارجہ کے درمیان گفتگو ہوئی تھی جس میں بحری جہازوں کی سلامتی اور توانائی کے تحفظ سے متعلق مسائل پر بات چیت کی گئی تھی۔

ہندستانی وزارت خارجہ کے ترجمان نے پریس بریفنگ میں بتایا کہ بات چیت کا محور خطے میں جہاز رانی کے محفوظ گزر اور توانائی کی فراہمی کو مستحکم رکھنے پر تھا۔ترجمان نے کہا کہ گزشتہ چند دنوں میں ہندستان اور ایران کے وزرائے خارجہ کے درمیان تین مرتبہ گفتگو ہو چکی ہے اور حالیہ گفتگو میں جہاز رانی کی سلامتی اور ہندستان کی توانائی سلامتی سے متعلق امور زیر بحث آئے۔

ادھر اسرائیلی فضائیہ نے جمعہ کو کہا کہ اس نے ایران کے مختلف شہروں میں ایرانی حکومت کے بنیادی ڈھانچے کو نشانہ بناتے ہوئے کئی فضائی حملے مکمل کیے ہیں۔اسرائیلی فضائیہ کے مطابق تہران شیراز اور اہواز میں بیک وقت کارروائیاں کی گئیں جن میں میزائلوں کی تیاری اور ذخیرہ گاہوں سمیت فضائی دفاعی نظام کے کئی مراکز کو نشانہ بنایا گیا۔

بیان میں کہا گیا کہ شیراز میں ایک زیر زمین مقام کو نشانہ بنایا گیا جہاں بیلسٹک میزائل تیار اور ذخیرہ کیے جاتے تھے جبکہ تہران میں فضائی دفاعی نظام کے اہم مراکز پر حملے کیے گئے۔اسی طرح مغربی ایران کے شہر اہواز میں مختلف سرکاری اداروں کے ہیڈکوارٹرز کو نشانہ بنایا گیا جہاں ایرانی فوجی سرگرم تھے۔

ادھر امریکہ اور اسرائیل کی مشترکہ فوجی کارروائیوں کے نتیجے میں ایران کے سابق سپریم لیڈر آیت اللہ علی خامنہ ای کی ہلاکت کے بعد مغربی ایشیا میں کشیدگی مزید بڑھ گئی ہے۔جوابی کارروائی میں ایران نے خلیجی ممالک میں اسرائیل اور امریکہ سے متعلق اہداف کو نشانہ بنایا جس سے اہم بحری راستے متاثر ہوئے اور عالمی توانائی منڈیوں پر بھی اثر پڑا۔جنگ کے 14ویں دن بھی دونوں جانب سے حملوں اور جوابی کارروائیوں کا سلسلہ جاری ہے جبکہ ایران کی جانب سے آبنائے ہرمز بند کرنے کی دھمکی نے کئی ممالک کی توانائی ضروریات کے حوالے سے تشویش پیدا کر دی ہے۔