جگدل پور

مرکزی وزیر داخلہ امیت شاہ نے منگل کے روز کہا کہ ہندوستان 31 مارچ کی آخری تاریخ سے پہلے ہی "نکسل فری" ہو گیا ہے، جس کا سہرا سکیورٹی فورسز کی "بہادری اور قربانی" کو جاتا ہے۔جگدل پور میں پریس کانفرنس سے خطاب کرتے ہوئے امیت شاہ نے کہا کہ اب بستر کے لوگ خوف کے بغیر زندگی گزار رہے ہیں۔ انہوں نے بستر میں ترقی کے لیے شروع کی گئی "ویر گوندادھور سیوا ڈیرہ" پہل کو سراہا، جو نکسل متاثرہ علاقوں میں ترقیاتی سرگرمیوں کے لیے ایک اہم قدم ہے۔انہوں نے سابق چھتیس گڑھ کی بھوپیش بگھیل حکومت پر تنقید کرتے ہوئے الزام لگایا کہ کانگریس نے نکسل فری مہم میں مرکز کا ساتھ نہیں دیا۔

مرکزی وزیر نے کہا کہ بستر کے عوام میں امید، اعتماد اور مستقبل کے حوالے سے یقین کا ماحول ہر جگہ نظر آ رہا ہے۔ خوف کی فضا اور بندوقوں کے سائے میں جینے کی مجبوری اب ختم ہو چکی ہے، اور بستر نے آخرکار آزاد سانس لینا شروع کر دیا ہے۔ یہ ہم سب کے لیے خوشی کی بات ہے کہ بستر نکسل فری ہو چکا ہے۔

انہوں نے کہا، "24 اگست 2024 کو ایک اجلاس میں اعلان کیا گیا تھا کہ ملک کو 31 مارچ 2026 تک نکسل ازم کے خوف سے آزاد کیا جائے گا۔ سکیورٹی فورسز کی بہادری، حوصلے اور قربانی کی بدولت یہ ہدف مقررہ وقت سے پہلے ہی حاصل کر لیا گیا۔کانگریس کو نشانہ بناتے ہوئے امیت شاہ نے کہا، "یہاں کچھ تاریخیں اہم ہیں۔ 13 دسمبر 2023 کو چھتیس گڑھ میں بی جے پی کی حکومت وشنو دیو سائی کی قیادت میں بنی۔ اس سے پہلے یہاں کانگریس کی حکومت تھی۔ کئی غیر بی جے پی حکومتوں نے نکسل فری مہم میں ہمارا ساتھ دیا، لیکن چھتیس گڑھ کی کانگریس حکومت نے تعاون نہیں کیا۔

انہوں نے کہا کہ 19 مئی بستر کی ترقی کے لیے ایک اہم دن ہے۔ انہوں نے بتایا کہ 70 سکیورٹی فورسز کے کیمپس کو "ویر گوندادھور سیوا ڈیرہ" میں تبدیل کیا جائے گا تاکہ حکومتی سہولیات براہ راست عوام تک پہنچ سکیں۔انہوں نے کہا کہ 19 مئی 2026 ایک تاریخی دن کے طور پر یاد رکھا جائے گا۔ کچھ دانشور کہتے تھے کہ نکسل ازم ترقی کی کمی سے پھیلتا ہے، لیکن حقیقت یہ ہے کہ نکسل ازم کی وجہ سے یہ علاقے ترقی سے محروم رہے۔ آج بستر میں ہم ہمہ جہتی ترقی کا آغاز کر رہے ہیں۔

انہوں نے مزید کہا کہ کل ہی میں نے شہید ویر گوندادھور سیوا ڈیرہ کا افتتاح کیا۔ اس کا مقصد پورے بستر خطے کو نکسل ازم سے مکمل طور پر آزاد کرنا ہے۔ پہلے یہاں تقریباً 200 سکیورٹی کیمپس قائم کیے گئے تھے جن میں سی آر پی ایف، ڈی آر جی اور چھتیس گڑھ پولیس اہلکار تعینات تھے۔ اب چونکہ بستر نکسل فری ہو چکا ہے، اس لیے ان میں سے 70 کیمپس کو پہلے مرحلے میں سیوا ڈیرہ میں تبدیل کیا جائے گا۔

انہوں نے یہ بھی بتایا کہ پیر کے روز انہوں نے بستر میں "شہید ویر گوندادھور سیوا ڈیرہ جن سہولت مرکز" کا افتتاح کیا تھا، جہاں ریاستی اور مرکزی حکومت کی 371 اسکیموں کے فوائد ایک ہی جگہ دستیاب ہوں گے۔