نئی دہلی
ڈائریکٹوریٹ آف ریونیو انٹیلیجنس (ڈی آر آئی) کی کوچی یونٹ نے مربوط اینٹی نارکوٹکس کارروائیوں کے دوران کیرالہ کے مختلف شہروں کوچی، ملاپورم اور ترواننت پورم میں بڑی مقدار میں منشیات اور نفسیاتی اثر رکھنے والے مادے برآمد کیے ہیں۔ یہ کارروائیاں آپریشن چکرویہ کے تحت کی گئیں۔
بیان کے مطابق برآمد ہونے والی اشیاء میں میتھاکوالون، میتھ ایمفیٹامین اور ہیشش آئل شامل ہیں، جو غیر قانونی ترسیل اور اسمگلنگ کے لیے استعمال کیے جا رہے تھے۔
۔24 کلو سے زائد منشیات برآمد
ڈی آر آئی کے مطابق ان کارروائیوں میں مجموعی طور پر 24 کلو سے زائد منشیات اور نفسیاتی مادے ضبط کیے گئے ہیں۔ اس کیس میں اسمگلنگ نیٹ ورک سے وابستہ 5 اہم افراد کو گرفتار کیا گیا ہے۔یہ منشیات مختلف طریقوں سے چھپائی گئی تھیں، جن میں ایئرپورٹ پر مسافروں کے سامان، کوریئر کنسائنمنٹس اور برآمدی کارگو شامل ہیں۔
منظم نیٹ ورک کے خلاف بڑی کامیابی
ڈی آر آئی نے کہا ہے کہ یہ کارروائیاں منظم منشیات اسمگلنگ نیٹ ورکس کو توڑنے کے لیے ان کی مسلسل نگرانی اور کوششوں کا حصہ ہیں۔گزشتہ مالی سال کے دوران بھی کوچی زونل یونٹ نے کیرالہ میں تقریباً 70.76 کروڑ روپے مالیت کی منشیات ضبط کی تھیں اور مختلف این ڈی پی ایس مقدمات میں 21 افراد کو گرفتار کیا گیا تھا۔
منشیات کے خلاف زیرو ٹالرنس پالیسی
ڈی آر آئی نے کہا ہے کہ وہ منشیات کے خطرے سے معاشرے کو محفوظ رکھنے اور حکومت کے "نشہ مکت ہندوستان" کے وژن کو آگے بڑھانے کے لیے پرعزم ہے۔
