نئی دہلی۔:قومی سلامتی کے مشیر اجیت ڈوبھال اور چیف آف ڈیفنس اسٹاف جنرل انیل چوہان نے ترقی کے ساتھ ثقافتی شناخت کے تحفظ کی ضرورت پر زور دیا۔ یہ بات انہوں نے ہفتے کے روز نئی دہلی میں رائبر 7 پروگرام سے خطاب کے دوران کہی۔

رائبر گڑھوالی زبان کا ایک لفظ ہے جس کا مطلب پیغام ہے۔ یہ اعتماد اور جذباتی ربط پر مبنی روایتی مواصلاتی نظام کی علامت سمجھا جاتا ہے۔ اجتماع سے خطاب کرتے ہوئے اجیت ڈوبھال نے اس لفظ کی ثقافتی اہمیت اجاگر کی اور خبردار کیا کہ جدید ترقی کی دوڑ میں مقامی روایات کو نظر انداز نہیں کیا جانا چاہیے۔

اجیت ڈوبھال نے کہا کہ رائبر گڑھوالیوں کے لیے گہرے جذبات کی علامت ہے۔ یہ ایک ایسا مواصلاتی نظام ہے جو مکمل طور پر اعتماد پر قائم ہے۔ انہوں نے جدید ٹیکنالوجی کے مواصلاتی ذرائع سے اس کا موازنہ کرتے ہوئے کہا کہ آج بہت سے نظام موجود ہیں لیکن ان میں جذباتی وابستگی نہیں پائی جاتی۔

انہوں نے کہا کہ ترقی ایسی ہونی چاہیے جس سے نہ صرف سرمایہ کاروں بلکہ مقامی آبادی کو بھی فائدہ پہنچے۔ ان کے مطابق اتراکھنڈ کی ترقی کا مطلب وہاں کے لوگوں اور وہاں سرمایہ لگانے والوں کی مشترکہ ترقی ہے۔ انہوں نے سیاحت میں اضافے کا خیرمقدم کیا لیکن ساتھ ہی خبردار کیا کہ اگر اتراکھنڈ صرف فائیو اسٹار سیاحت کا مرکز بن گیا تو اس سے مقامی ثقافت کو نقصان پہنچنے کا خدشہ ہے۔

اپنی ذاتی زندگی کا حوالہ دیتے ہوئے اجیت ڈوبھال نے کہا کہ ان کے والدین نے ہمیشہ انہیں اپنی روایات اور رسم و رواج سے جڑے رہنے کی تعلیم دی۔ انہوں نے کہا کہ وقت کے ساتھ حالات بدل جاتے ہیں لیکن رائبر جیسی اقدار انسان کے ساتھ رہتی ہیں۔

اسی تقریب سے خطاب کرتے ہوئے چیف آف ڈیفنس اسٹاف جنرل انیل چوہان نے کہا کہ جب ہندوستان 2047 تک ایک ترقی یافتہ ملک بنے گا تو اتراکھنڈ کو صرف فائدہ اٹھانے والی ریاست نہیں ہونا چاہیے بلکہ اس سفر میں اپنا کردار بھی ادا کرنا چاہیے۔

انہوں نے کہا کہ یہ ہم سب کی مشترکہ ذمہ داری ہے کہ ریاست کی ترقی ملک کی مجموعی ترقی کے ہم پلہ ہو۔ جنرل انیل چوہان کے مطابق اتراکھنڈ کو نہ صرف بڑا سوچنا چاہیے بلکہ بعض مواقع پر قیادت کا کردار بھی ادا کرنا چاہیے۔