نئی دہلی

کُشمن اینڈ ویک فیلڈ کی ایک رپورٹ کے مطابق، عالمی معاشی غیر یقینی صورتحال کے باعث غیر ملکی سرمایہ کاری میں کمی اور مقامی مارکیٹ پر بڑھتے اعتماد کے سبب گھریلو ادارہ جاتی سرمایہ کار مسلسل تیسرے سہ ماہی میں ہندوستان کے رئیل اسٹیٹ سیکٹر پر حاوی رہے۔کمپنی کی  کیو 1 2026 کی "کیپیٹل مارکیٹ بیٹ" رپورٹ کے مطابق، اس سہ ماہی کے دوران کل ادارہ جاتی سرمایہ کاری میں سے 76 فیصد یعنی 1.2 ارب امریکی ڈالر گھریلو سرمایہ کاروں کی جانب سے آئے، جبکہ غیر ملکی سرمایہ کاری 0.4 ارب ڈالر رہی جو کل کا 24 فیصد ہے۔ مجموعی ادارہ جاتی سرمایہ کاری 1.6 ارب ڈالر رہی، جو سالانہ بنیاد پر 26 فیصد اضافہ ظاہر کرتی ہے، تاہم گزشتہ سہ ماہی کے مقابلے میں 52 فیصد کمی آئی۔

رپورٹ میں کہا گیا ہے کہ غیر ملکی سرمایہ عالمی معاشی اور جغرافیائی سیاسی حالات سے زیادہ متاثر ہوتا ہے، جبکہ گھریلو سرمایہ کاری مسلسل استحکام فراہم کر رہی ہے۔ اسی وجہ سے سرمایہ کاری کے بہاؤ میں توازن کی نئی صورت پیدا ہو رہی ہے، جہاں گزشتہ پانچ سہ ماہیوں میں سے چار میں گھریلو سرمایہ کاروں کا حصہ زیادہ رہا ہے۔

گزشتہ تین سہ ماہیوں کے دوران گھریلو سرمایہ کاری میں مسلسل اضافہ ہوا ہے، جو کیو3 2025 میں تقریباً 63 فیصد (1.1 ارب ڈالر) سے بڑھ کر کیو4 2025 میں 81 فیصد (2.7 ارب ڈالر) تک پہنچ گئی، جبکہ کیو1 2026 میں یہ معمولی کمی کے ساتھ 76 فیصد رہی۔ یہ رئیل اسٹیٹ کو ایک مضبوط سرمایہ کاری کے طور پر مقامی اعتماد کو ظاہر کرتا ہے۔

رپورٹ کے مطابق کیو1 2026 میں مجموعی سرمایہ کاری 2021 کے بعد پہلی سہ ماہی کی سب سے بڑی سرمایہ کاری رہی، جو عالمی غیر یقینی حالات کے باوجود سرمایہ کے مضبوط بہاؤ کو ظاہر کرتی ہے۔

پرائیویٹ ایکویٹی سرمایہ کاری کا سب سے بڑا ذریعہ رہی، جس کا حصہ 74 فیصد رہا، جبکہ رئیل اسٹیٹ انویسٹمنٹ ٹرسٹس  نے 26 فیصد حصہ ڈالا۔شعبہ وار جائزے میں دفتری (آفس) سیکٹر سرفہرست رہا، جس میں 1.0 ارب ڈالر کی سرمایہ کاری ہوئی جو کل کا 64 فیصد ہے۔ اس کے بعد ہوٹیلٹی سیکٹر 13 فیصد اور رہائشی سیکٹر 9 فیصد کے ساتھ رہا، جس سے ظاہر ہوتا ہے کہ کمرشل رئیل اسٹیٹ میں زیادہ دلچسپی برقرار ہے۔

شہروں کے لحاظ سے دہلی این سی آر نے سب سے زیادہ 28 فیصد سرمایہ حاصل کیا، اس کے بعد چنئی 17 فیصد اور بنگلورو 14 فیصد کے ساتھ رہے، جو بڑے شہروں میں سرمایہ کاروں کی وسیع دلچسپی کو ظاہر کرتا ہے۔اس رجحان پر تبصرہ کرتے ہوئے کُشمن اینڈ ویک فیلڈ کے ایگزیکٹو مینجنگ ڈائریکٹر، سومی تھامس نے کہا کہ گھریلو سرمایہ کاری کا مسلسل غلبہ رئیل اسٹیٹ کے سرمایہ کاری کے منظرنامے میں ایک اہم موڑ کی نشاندہی کرتا ہے۔ انہوں نے کہا کہ مارکیٹ کی بنیادی مضبوطی اور منظم سرمایہ کاری کے طریقہ کار کی وجہ سے سرمایہ کی تقسیم میں ایک ساختی تبدیلی دیکھی جا رہی ہے۔