تہران

ایران کی پارلیمنٹ کے اسپیکر محمد باقر قالیباف نے مشرقِ وسطیٰ میں امریکہ کی فوجی موجودگی کے حوالے سے سخت انتباہ جاری کرتے ہوئے کہا ہے کہ تہران خطے کی تمام سرگرمیوں پر “گہری نظر” رکھے ہوئے ہے۔ ایکس پر ایک پوسٹ میں قالیباف نے کہا کہ ہم خطے میں امریکہ کی تمام نقل و حرکت، خاص طور پر فوجی تعیناتیوں پر قریبی نظر رکھے ہوئے ہیں۔سینئر ایرانی عہدیدار نے مزید اشارہ دیا کہ امریکی فوجی قیادت کی پالیسیوں کی وجہ سے خود امریکی فوجی نقصان اٹھا سکتے ہیں۔ انہوں نے کہا، “جو کچھ جرنیلوں نے بگاڑا ہے، اسے سپاہی درست نہیں کر سکتے؛ بلکہ وہ نیتن یاہو کے فریب کا شکار بنیں گے۔

قالیباف نے قومی خودمختاری پر ایران کے مؤقف کو دہراتے ہوئے خبردار کیا کہ کوئی بھی ایسا قدم نہ اٹھایا جائے جو اسلامی جمہوریہ کو فوجی ردعمل پر مجبور کرے۔ انہوں نے کہا کہ ہماری سرزمین کے دفاع کے عزم کو آزمانے کی کوشش نہ کریں۔یہ سخت بیانات ایسے وقت میں سامنے آئے ہیں جب امریکہ کی جانب سے مزید فوجی سرگرمیوں کی خبریں سامنے آ رہی ہیں۔اگرچہ امریکی صدر ڈونلڈ ٹرمپ نے دعویٰ کیا ہے کہ ایران کے ساتھ مذاکرات جاری ہیں اور جنگ جلد ختم ہو سکتی ہے، لیکن پینٹاگون کی جانب سے مشرقِ وسطیٰ میں 82ویں ایئربورن ڈویژن کے فوجیوں کی تعیناتی کی تیاری کی جا رہی ہے، کیونکہ جنگ اپنے چوتھے ہفتے میں داخل ہو چکی ہے۔

سی بی ایس نیوز کے مطابق، ایک ذریعے کے حوالے سے بتایا گیا ہے کہ پینٹاگون اس ڈویژن کے کچھ حصوں، بشمول کمانڈ یونٹ اور زمینی افواج، کو خطے میں بھیجنے کا منصوبہ بنا رہا ہے۔رپورٹ کے مطابق اس تعیناتی میں 1500 سے کم فوجی شامل ہو سکتے ہیں۔یہ فوجی سرگرمیاں وائٹ ہاؤس کی جانب سے پیش کیے گئے بیانیے کے بالکل برعکس ہیں۔

صدر ٹرمپ پہلے بھی تصدیق کر چکے ہیں کہ ایران کے ساتھ مذاکرات جاری ہیں اور جنگ کے خاتمے کا امکان ہے۔ انہوں نے کہا کہ ہم اس وقت مذاکرات کر رہے ہیں۔ میں آپ کو بتا سکتا ہوں کہ وہ معاہدہ کرنا چاہتے ہیں... ان کی بحریہ ختم ہو چکی ہے، فضائیہ ختم ہو چکی ہے، مواصلاتی نظام تباہ ہو چکا ہے—تقریباً سب کچھ ختم ہو گیا ہے۔ٹرمپ نے مزید کہا کہ میرا خیال ہے ہم اسے ختم کر دیں گے۔ میں یقین سے نہیں کہہ سکتا، لیکن ہم جیت چکے ہیں... ہمارے طیارے تہران اور دیگر علاقوں کے اوپر پرواز کر رہے ہیں اور وہ کچھ نہیں کر سکتے... وہ مکمل طور پر شکست کھا چکے ہیں، عسکری طور پر ختم ہو چکے ہیں۔

تاہم، جاری تنازع پر ایرانی مؤقف ٹرمپ کے دعوؤں سے بالکل مختلف ہے۔فارس نیوز کی جانب سے جاری ایک ویڈیو میں ایرانی فوج کے ترجمان نے طنزیہ انداز میں کہا کہ صورتحال یہاں تک پہنچ چکی ہے کہ امریکی دراصل “خود ہی اپنے ساتھ مذاکرات کر رہے ہیں۔

 نہوں نے کہا کہ جس اسٹریٹجک طاقت پر آپ فخر کرتے تھے، وہ اب اسٹریٹجک شکست میں بدل چکی ہے... اپنی شکست کو ‘معاہدہ’ کا نام نہ دیں۔ آپ کے وعدوں کا دور ختم ہو چکا ہے۔ انہوں نے مزید کہا کہ دنیا اب “حق اور باطل” کے دو محاذوں میں تقسیم ہو چکی ہے اور “آزادی کے متلاشی کوئی بھی شخص آپ کے میڈیا پروپیگنڈے سے دھوکہ نہیں کھائے گا۔

ترجمان نے خبردار کیا کہ خطے کی معیشت اور سلامتی میں مستقل تبدیلی آ چکی ہے۔ انہوں نے کہا کہ اب نہ آپ کی سرمایہ کاری کی بات ہوگی اور نہ ہی توانائی اور تیل کی پرانی قیمتیں واپس آئیں گی، جب تک آپ یہ نہ سمجھ لیں کہ اس خطے میں استحکام صرف ہماری مسلح افواج کی طاقت سے ہی ممکن ہے۔اسی سخت مؤقف کے تحت ایران نے آپریشن “ٹرُو پرومس 4” کی 80ویں لہر کی ویڈیو بھی جاری کی، جس میں امریکہ-اسرائیل کے ٹھکانوں کی طرف میزائل داغے گئے، جبکہ دوسری جانب امریکی صدر مذاکرات کے امکانات کا ذکر کر رہے ہیں۔

تہران نے امریکہ کے ساتھ کسی بھی قسم کے مذاکرات کی خبروں کو مسترد کرتے ہوئے کہا ہے کہ امن اسی وقت ممکن ہوگا جب امریکہ اور اسرائیل اپنی کارروائیاں بند کریں گے۔