کولکاتا: راجناتھ سنگھ نے جمعہ کے روز مغربی ایشیا میں جاری تنازع کے باعث عالمی توانائی سپلائی چین میں پیدا ہونے والی رکاوٹ کو تسلیم کرتے ہوئے اسے “انتہائی غیر معمولی صورتحال” قرار دیا۔ کولکاتا میں منعقدہ ساگر سنکلپ میری ٹائم کانکلیو سے خطاب کرتے ہوئے وزیر دفاع نے کہا کہ تجارتی راستوں، خصوصاً آبنائے ہرمز میں خلل نے کئی شعبوں اور عالمی تجارت کو متاثر کیا ہے۔

انہوں نے کہا کہ امریکہ اور اسرائیل کے ساتھ ایران کے جاری تنازع نے مغربی ایشیا کے خطے کو کشیدگی کی حالت میں دھکیل دیا ہے، جس کے نتیجے میں آبنائے ہرمز کے ذریعے گزرنے والے تجارتی راستے متاثر ہوئے ہیں اور عالمی تیل و توانائی کی سپلائی چین پر اثر پڑا ہے۔

راجناتھ سنگھ نے کہا، “مشرقِ وسطیٰ میں جو کچھ ہو رہا ہے وہ انتہائی غیر معمولی ہے۔ اس مرحلے پر یہ کہنا مشکل ہے کہ مستقبل میں وہاں یا ہمارے پڑوس میں حالات کس سمت جائیں گے۔ اگر ہم آبنائے ہرمز یا پورے خلیج فارس کے علاقے کو دیکھیں تو یہ عالمی توانائی کی سلامتی کے لیے انتہائی اہم خطہ ہے۔” انہوں نے مزید کہا کہ جب اس خطے میں کسی قسم کی بدامنی یا خلل پیدا ہوتا ہے تو اس کا براہ راست اثر تیل اور گیس کی فراہمی پر پڑتا ہے۔

ان کے مطابق اب صرف توانائی کا شعبہ ہی نہیں بلکہ دیگر شعبوں میں بھی سپلائی چین میں رکاوٹیں دیکھی جا رہی ہیں، اور ان غیر یقینی حالات کا براہ راست اثر عالمی معیشت اور تجارت پر پڑتا ہے۔ وزیر دفاع نے مختلف میدانوں میں ممالک کے درمیان بڑھتے ہوئے اسٹریٹجک مقابلے پر بھی تشویش ظاہر کرتے ہوئے کہا کہ “غیر معمولی صورتحال اب معمول بنتی جا رہی ہے۔”

انہوں نے کہا، “آج ممالک زمین، فضا، سمندر اور یہاں تک کہ خلا میں بھی ایک دوسرے سے ٹکرا رہے ہیں۔ یہ تشویشناک اور غیر معمولی صورتحال ہے، اور سب سے زیادہ فکر کی بات یہ ہے کہ یہ غیر معمولی صورتحال اب معمول بنتی جا رہی ہے۔” بدلتے ہوئے جغرافیائی و سیاسی حالات اور غیر یقینی صورتحال کے درمیان راجناتھ سنگھ نے کہا کہ سمندری شعبے میں بھارت کو قیادت فراہم کرنی چاہیے اور سپلائی چین میں رکاوٹوں سے نمٹنے کے لیے خود انحصاری کو واحد راستہ قرار دیا۔

انہوں نے کہا کہ بدلتی عالمی جغرافیائی سیاست کے اس دور میں سمندر ایک بار پھر عالمی طاقت کے توازن کے مرکز میں آ گئے ہیں۔ ایسے وقت میں ایک بڑی سمندری قوم ہونے کے ناطے بھارت کی ذمہ داری ہے کہ وہ اعتماد، صلاحیت اور واضح وژن کے ساتھ قیادت فراہم کرے۔ انہوں نے مزید کہا کہ دفاعی شعبے میں جدید اور انتہائی درست ٹیکنالوجی کا استعمال بڑھ رہا ہے، اس لیے حکومت کا شروع سے یہ ماننا ہے کہ غیر یقینی حالات کے اس دور میں سپلائی چین میں رکاوٹوں سے بچنے کا واحد راستہ خود انحصاری ہے۔ ان کے مطابق دفاعی شعبے کی سرکاری کمپنیاں اس وژن کا اہم ستون ہیں۔

راجناتھ سنگھ نے سمندری صنعت سے وابستہ سرکاری و نجی اداروں کے لیے ہدف مقرر کرتے ہوئے کہا کہ بھارت کو 2030 تک جہاز سازی کرنے والے دنیا کے دس بڑے ممالک میں اور 2047 تک پانچ بڑے ممالک میں شامل ہونا چاہیے۔ ان کا کہنا تھا، ہمارا ہدف واضح ہے: 2030 تک ہمیں جہاز سازی کے میدان میں دنیا کے ٹاپ 10 ممالک میں جگہ بنانی ہے اور 2047 تک ٹاپ 5 میں پہنچنا ہے۔ یہ خواب بڑا ضرور ہے مگر ناممکن نہیں، اور یہ صرف حکومت کا ہدف نہیں بلکہ صنعت، افرادی قوت اور پالیسی نظام سب کی مشترکہ ذمہ داری ہے۔

وزیر دفاع کا یہ بیان ایسے وقت میں سامنے آیا ہے جب مغربی ایشیا میں کشیدگی ساتویں دن میں داخل ہو چکی ہے۔ 28 فروری کو امریکہ اور اسرائیل کے حملوں میں ایران کے سپریم لیڈر آیت اللہ علی خامنہ ای سمیت کئی اہم شخصیات ہلاک ہو گئیں، جس کے جواب میں تہران نے خطے میں امریکی فوجی اڈوں اور اسرائیلی اہداف پر جوابی حملے کیے ہیں۔