نئی دہلی

وزیر اعظم نریندر مودی نے جمعرات کو 1975 میں نافذ کی گئی ایمرجنسی کو آئین پر "براہِ راست حملہ" قرار دیتے ہوئے اس دور میں جمہوری اقدار کے دفاع کے لیے جدوجہد کرنے والوں کو خراجِ عقیدت پیش کیا۔ایمرجنسی کے نفاذ کی 51ویں برسی کے موقع پر سوشل میڈیا پلیٹ فارم ایکس پر ایک پوسٹ میں وزیر اعظم مودی نے شہری آزادیوں کی معطلی اور سخت مینٹیننس آف انٹرنل سکیورٹی ایکٹ (میسا) کے تحت سیاسی رہنماؤں کی گرفتاریوں کو یاد کیا۔

انہوں نے لکھا کہ آج ہم ان تمام افراد کو خراجِ عقیدت پیش کرتے ہیں جنہوں نے ہندوستان کی تاریخ کے ایک سیاہ ترین باب، یعنی ایمرجنسی کے دوران جمہوری اقدار کا ثابت قدمی سے دفاع کیا۔ ایمرجنسی ہمارے آئین پر براہِ راست حملہ تھی۔ اس دوران شہری آزادیوں کو معطل کر دیا گیا، اظہارِ رائے کی آزادی پر پابندیاں عائد کی گئیں، سیاسی رہنماؤں، صحافیوں اور سماجی کارکنوں کو گرفتار کیا گیا اور ان اداروں کو نشانہ بنایا گیا جو ہماری جمہوریت کی بنیاد ہیں۔

انہوں نے مزید کہا کہ اسی دوران اس نے بے شمار شہریوں کی غیرمعمولی جرأت کو بھی اجاگر کیا، جنہوں نے خاموش رہنے سے انکار کیا اور ہمارے آئین میں درج نظریات اور اصولوں کو برقرار رکھا۔

وزیر اعظم نے آئینی اقدار کے تحفظ کے عزم کا اعادہ بھی کیا۔انہوں نے کہا کہ ہم سب کے لیے ہمارا آئین 140 کروڑ ہندوستانیوں کی امنگوں، حقوق اور فرائض کا مظہر ہے۔ ہم آئینی اقدار کے تحفظ کے اپنے اجتماعی عزم کا اعادہ کرتے ہیں۔ اپنے آئین کی روح کی رہنمائی میں ہم ایک ایسے ہندوستان کی تعمیر کریں گے جو انصاف، آزادی، مساوات اور اخوت کے اصولوں کے لیے ہمیشہ پُرعزم رہے گا۔واضح رہے کہ 25 جون 1975 کو اُس وقت کے صدر فخرالدین علی احمد نے آئین کے آرٹیکل 352 کے تحت "اندرونی بدامنی" کا حوالہ دیتے ہوئے ایمرجنسی کے نفاذ کا اعلان کیا تھا۔

ہندوستان میں 25 جون 1975 سے 21 مارچ 1977 تک ایمرجنسی نافذ رہی۔اس دور کی وزیر اعظم اندرا گاندھی کو بنیادی حقوق کی معطلی اور اپوزیشن رہنماؤں، بشمول جے پرکاش نارائن، کی میسا کے تحت گرفتاریوں پر شدید تنقید کا سامنا کرنا پڑا۔ جے پرکاش نارائن نے 1970 کی دہائی میں کانگریس حکومت کے خلاف سمپورن کرانتی بہار تحریک کی قیادت کی تھی۔

شاہ کمیشن کی رپورٹوں کے مطابق اس عرصے میں بڑے پیمانے پر گرفتاریاں، جبری نس بندی مہم اور ذرائع ابلاغ پر سنسرشپ نافذ رہی۔گزشتہ سال ہندوستانیہ جنتا پارٹی (بی جے پی) نے ایمرجنسی کی 50ویں برسی کو "سمویدھان ہتیا دیوس" (آئین قتل دن) کے طور پر منایا تھا۔