نئی دہلی
پیٹرولیم اور قدرتی گیس کی وزارت کی جوائنٹ سیکریٹری سجاتا شرما نے جمعرات کو مغربی ایشیا کی صورتحال پر منعقدہ بین الوزارتی پریس بریفنگ کے دوران کہا کہ ڈیزل کی طلب اب تھوک خریداروں سے منتقل ہو کر سرکاری تیل کمپنیوں کے زیرِ انتظام ریٹیل آؤٹ لیٹس کی جانب بڑھ رہی ہے، تاہم ملک میں اس طلب کو پورا کرنے کے لیے ایندھن کی وافر سپلائی موجود ہے۔
سجاتا شرما نے کہا کہ ڈیزل کی تھوک سپلائی اب ریٹیل سیکٹر کی جانب جا رہی ہے۔ طلب سرکاری کمپنیوں کے آؤٹ لیٹس کی طرف منتقل ہو رہی ہے اور ہمارے پاس کافی مقدار میں سپلائی موجود ہے۔
انہوں نے مزید بتایا کہ عالمی جغرافیائی سیاسی کشیدگی کے باعث درآمدات متاثر ضرور ہوئی ہیں، لیکن اس کے باوجود ہندوستان میں پیٹرول، ڈیزل، ایل پی جی اور قدرتی گیس کا خاطر خواہ ذخیرہ موجود ہے۔ حکومت نے عوام پر پڑنے والے مالی بوجھ کو کم کرنے کے لیے متعدد اقدامات بھی کیے ہیں۔
انہوں نے کہا کہ ہماری درآمدات متاثر ہوئی ہیں، لیکن حکومتِ ہند نے شہریوں پر اس کے اثرات کم کرنے کے لیے بھرپور کوششیں کی ہیں۔افسر کے مطابق ملک بھر میں بڑھتی ہوئی طلب کو پورا کرنے کے لیے ایل پی جی کی پیداوار میں اضافہ کیا گیا ہے۔آپریشنل اعداد و شمار شیئر کرتے ہوئے سجاتا شرما نے بتایا کہ تقریباً 1.34 کروڑ ایل پی جی سلنڈر صارفین تک پہنچائے گئے، جبکہ کمرشل ایل پی جی کی فروخت 23,588 ٹن رہی۔
قدرتی گیس کے شعبے میں انہوں نے بتایا کہ 7.99 لاکھ نئے صارفین رجسٹر کیے گئے ہیں۔انہوں نے ایندھن کی تقسیم کی نگرانی اور بے ضابطگیوں کو روکنے کے لیے کی جانے والی کارروائیوں کی تفصیلات بھی پیش کیں۔ ان کے مطابق:500 مقامات پر چھاپے مارے گئے، 111 افراد کو وجہ بتاؤ نوٹس جاری کیے گئے، 35 ڈسٹری بیوٹرز کو نوٹس دیے گئے اور ایک ڈسٹری بیوٹر کو معطل کر دیا گیا۔
اس سے قبل آئل مارکیٹنگ کمپنیوں کے ذرائع نے اے این آئی کو بتایا تھا کہ ہندوستان پیٹرولیم مصنوعات کے معاملے میں مسلسل سرپلس کی پوزیشن میں ہے اور ملک میں پیٹرول، ڈیزل یا ایل پی جی کی کسی قسم کی کمی نہیں ہے۔ذرائع کے مطابق، پیٹرول، ڈیزل اور ایل پی جی کی کوئی قلت نہیں ہے کیونکہ ہندوستان پیٹرولیم مصنوعات کا خالص برآمد کنندہ ہے اور ان مصنوعات کا اضافی ذخیرہ رکھتا ہے۔
ذرائع نے مزید بتایا کہ بعض ریٹیل آؤٹ لیٹس پر فروخت میں اضافہ موسمی طلب اور مارکیٹ میں قیمتوں میں ہونے والی تبدیلیوں کی وجہ سے دیکھا جا رہا ہے۔خام تیل کی درآمدات کے حوالے سے ذرائع نے کہا کہ مغربی ایشیا میں جاری جغرافیائی سیاسی کشیدگی اور عالمی توانائی سپلائی میں رکاوٹوں کے خدشات کے باوجود روس سے خام تیل کی فراہمی بدستور مستحکم ہے۔
ذرائع کے مطابق، روس سے آنے والے خام تیل کی مقدار میں کوئی کمی نہیں آئی ہے۔
.webp "ہندوستان میں ایندھن کی مناسب فراہمی ہے: حکومت")
