نئی دہلی/ آواز دی وائس

مغربی بنگال کی وزیرِ اعلیٰ ممتا بنرجی نے جمعرات کو سپریم کورٹ کو بتایا کہ انہیں 8 جنوری کو یہ اطلاع ملی تھی کہ کچھ غیر مجاز افراد ترنمول کانگریس (ٹی ایم سی) کے انتخابی کام سے وابستہ پرتیک جین کے دفتر میں داخل ہو گئے ہیں، جس کے بعد وہ آئی-پی اے سی (انڈین پولیٹیکل ایکشن کمیٹی) کے احاطے میں گئیں۔

یہ وضاحت کرتے ہوئے کہ ممتا بنرجی وہاں وزیرِ اعلیٰ کی حیثیت سے نہیں گئیں، بلکہ پارٹی کی چیئرپرسن کے طور پر گئیں، ان کی جانب سے پیش ہونے والے سینئر وکیل کپل سبل نے جسٹس پرشانت کمار مشرا اور جسٹس وِپل پنچولی پر مشتمل بنچ کو بتایا کہ ترنمول کانگریس کی سربراہ آئی-پی اے سی کے دفتر پارٹی چیئرپرسن کی حیثیت سے پہنچی تھیں۔

سبل نے کہا کہ آئی-پی اے سی مغربی بنگال میں انتخابات کی دیکھ بھال کرتی ہے۔ پارٹی اور آئی-پی اے سی کے درمیان 2021 میں ایک باضابطہ معاہدہ طے پایا تھا۔ ہمیں یقین ہے کہ ای ڈی (انفورسمنٹ ڈائریکٹوریٹ) اس بات سے واقف ہے۔ آئی-پی اے سی کے پاس پارٹی سے متعلق ڈیٹا کا ایک بڑا ذخیرہ موجود ہے۔

انہوں نے مزید کہا کہ جب ای ڈی وہاں پہنچی تو انہیں معلوم تھا کہ پارٹی کا کافی ڈیٹا وہاں موجود ہوگا۔ انتخابات کے عین دوران وہاں جانے کی کیا ضرورت تھی؟ کوئلہ گھوٹالے میں آخری بیان 24 فروری 2024 کو درج کیا گیا تھا۔ اس کے بعد وہ کیا کر رہے تھے؟ انتخابات کے بیچ میں اتنی سرگرمی کیوں؟ اگر آپ معلومات اپنے قبضے میں لے لیں گے تو ہم انتخابات کیسے لڑیں گے؟ سبل نے سوال اٹھایا۔

انہوں نے کہا کہ ٹی ایم سی کی چیئرپرسن کو وہاں جانے کا پورا حق تھا۔ ای ڈی کو پارٹی دفتر کے اُس حصے میں جانے کی کیا ضرورت تھی جہاں ساری معلومات موجود ہیں؟سبل نے دلیل دی۔

ای ڈی کی عرضی کی قابلِ سماعت ہونے پر سوال اٹھاتے ہوئے سبل نے کہا کہ اس معاملے کی سماعت کلکتہ ہائی کورٹ میں ہونی چاہیے۔ ان کا کہنا تھا کہ جب بھی انتخابات قریب ہوتے ہیں، تفتیش کے نام پر ای ڈی کی مداخلت کا ایک طے شدہ انداز نظر آتا ہے۔

“ہائی کورٹ آرٹیکل 226 کے تحت اس کی سماعت کر سکتی ہے۔ یہی عدالتی درجہ بندی ہے۔ یہ متوازی کارروائیاں دائر کر رہے ہیں۔

سبل نے ممتا بنرجی پر مداخلت اور رکاوٹ ڈالنے کے ای ڈی کے الزام کو مسترد کرتے ہوئے کہا کہ یہ الزام کہ وزیرِ اعلیٰ تمام ڈیوائسز لے گئیں، سراسر جھوٹ ہے۔ خود ان کے پنچنامے (تلاشی ریکارڈ) سے اس کی تردید ہوتی ہے۔ یہ محض تعصب پیدا کرنے کی کوشش ہے۔ ریاستی حکومت اور پولیس افسران کی جانب سے پیش ہونے والے سینئر وکیل ابھیشیک سنگھوی نے کہا کہ وزیرِ اعلیٰ زیڈ پلس سکیورٹی یافتہ ہیں، اس لیے ڈی جی پی راجیو کمار کا ان کے ساتھ آئی-پی اے سی کے دفتر جانا ان کا فرض تھا۔

سپریم کورٹ نے ای ڈی کے اس الزام کو کہ ممتا بنرجی نے تفتیش میں “رکاوٹ” ڈالی، “انتہائی سنگین” قرار دیا اور اس بات کا جائزہ لینے پر اتفاق کیا کہ آیا کسی ریاست کی قانون نافذ کرنے والی ایجنسیاں کسی سنگین جرم میں مرکزی ایجنسی کی تفتیش میں مداخلت کر سکتی ہیں یا نہیں۔

عدالتِ عظمیٰ نے 8 جنوری کو آئی-پی اے سی کے دفتر اور اس کے ڈائریکٹر پرتیک جین کی رہائش گاہ پر چھاپے کے بعد مغربی بنگال میں ای ڈی افسران کے خلاف درج ایف آئی آر پر روک لگا دی اور ریاستی پولیس کو چھاپوں کی سی سی ٹی وی فوٹیج محفوظ رکھنے کی ہدایت دی۔

سپریم کورٹ میں ای ڈی کی عرضی 8 جنوری کے واقعات کے بعد دائر کی گئی، جب کوئلہ اسمگلنگ کیس سے متعلق کولکتہ میں واقع آئی-پی اے سی کے سالٹ لیک دفتر اور اس کے سربراہ پرتیک جین کی رہائش گاہ پر چھاپوں کے دوران ای ڈی افسران کو مبینہ طور پر رکاوٹوں کا سامنا کرنا پڑا تھا۔ تحقیقی ایجنسی کا دعویٰ ہے کہ ممتا بنرجی نے احاطے میں داخل ہو کر تفتیش سے متعلق “اہم” شواہد اپنے ساتھ لے لیے۔ وزیرِ اعلیٰ نے مرکزی ایجنسی پر اختیارات سے تجاوز کا الزام عائد کیا ہے، جبکہ ان کی پارٹی ٹی ایم سی نے ای ڈی کے “تفتیش میں رکاوٹ” ڈالنے کے الزام کو مسترد کر دیا ہے۔ ریاستی پولیس نے ای ڈی افسران کے خلاف ایک ایف آئی آر بھی درج کی ہے۔