ممبئی 

مہاراشٹر کے وزیر اعلیٰ دیویندر فڑنویس نے سینئر پلے بیک گلوکارہ سمن کلیان پور کو خراجِ عقیدت پیش کرتے ہوئے گہرے دکھ کا اظہار کیا ہے۔ انہوں نے کہا کہ موسیقی کی دنیا کی ایک دلکش، سریلی اور روح کو چھو لینے والی آواز ہمیشہ کے لیے خاموش ہو گئی ہے۔وزیر اعلیٰ نے اپنے تعزیتی پیغام میں کہا کہ سمن جی نے ابتدائی دور میں مصوری کی تعلیم بھی حاصل کی تھی۔ بعد ازاں انہوں نے اپنی منفرد اور کلاسیکی طرز کی گائیکی کے ذریعے چھ دہائیوں سے زائد عرصے تک مداحوں کے دلوں پر راج کیا۔ وزیر اعلیٰ کے دفتر کی جانب سے جاری بیان کے مطابق ان کے گیتوں نے 1950 اور 1960 کی دہائیوں کو خوبصورت دھنوں سے سجا دیا تھا۔

انہوں نے نہ صرف مراٹھی بلکہ ہندی، بنگالی اور اوڑیا سمیت کئی زبانوں میں اپنی لازوال شناخت قائم کی۔ سمن کلیان پور، جن کی پیدائش اُس وقت کے غیر منقسم ڈھاکہ میں ہوئی تھی اور بعد میں وہ ممبئی منتقل ہو گئی تھیں، کو ملک کے اعلیٰ شہری اعزاز پدم بھوشن سے نوازا گیا تھا۔

سمن کلیان پور نے بھاؤ گیت، بھجن اور فلمی نغموں کے ذریعے موسیقی کی دنیا کو بے پناہ دولت بخشی۔ فڑنویس نے کہا کہ ان کا انتقال فن اور موسیقی کے شعبے کے لیے ایک بہت بڑا نقصان ہے۔انہوں نے اپنے ایکس اکاؤنٹ پر لکھا کہ معروف پلے بیک گلوکارہ سمن کلیان پور کے انتقال کے ساتھ موسیقی کی دنیا کی ایک مدھر، سریلی اور دل کو چھو لینے والی آواز ہمیشہ کے لیے خاموش ہو گئی ہے۔

چھ دہائیوں سے زیادہ عرصے تک انہوں نے اپنی بے مثال گائیکی سے موسیقی کے شائقین کے دلوں پر حکومت کی۔ مراٹھی، ہندی، بنگالی، اوڑیا اور دیگر زبانوں میں ان کے گائے ہوئے لازوال نغمے موسیقی کی دنیا کا قیمتی سرمایہ رہیں گے۔پدم بھوشن سے سرفراز سمن جی نے اپنی جادوئی آواز سے موسیقی کو مالا مال کیا۔ ان کے گیتوں کی مٹھاس اور جذبات سے بھرپور انداز ہمیشہ ہماری یادوں میں زندہ رہے گا۔ ان کا انتقال موسیقی کی دنیا کے لیے ایک گہرا صدمہ ہے۔ میں انہیں اپنی جانب سے خراجِ عقیدت پیش کرتا ہوں۔ ہم ان کے اہلِ خانہ کے غم میں برابر کے شریک ہیں۔ اوم شانتی۔

پدم بھوشن یافتہ سمن کلیان پور، جو ہندی اور مراٹھی فلمی صنعت میں اپنے یادگار گیتوں کے لیے مشہور تھیں، 89 برس کی عمر میں انتقال کر گئیں۔اس سے قبل مرکزی وزیر نتن گڈکری، مہاراشٹر کے نائب وزیر اعلیٰ ایکناتھ شندے اور دیگر رہنماؤں نے بھی اس عظیم گلوکارہ کو خراجِ عقیدت پیش کیا اور موسیقی کے میدان میں ان کی خدمات کو یاد کیا۔نتن گڈکری نے سمن کلیان پور کے انتقال کو "انتہائی دل خراش" قرار دیتے ہوئے کہا کہ یہ موسیقی کی دنیا کے لیے ایک بہت بڑا نقصان ہے۔

انہوں نے اپنے ایکس اکاؤنٹ پر لکھا کہ موسیقی کی دنیا کی مقبول، عظیم اور سینئر پلے بیک گلوکارہ پدم بھوشن سمن کلیان پور کے انتقال کی خبر انتہائی افسوسناک ہے۔ میں انہیں خراجِ عقیدت پیش کرتا ہوں۔سمن کلیان پور کا دنیا سے رخصت ہونا موسیقی کے شعبے کے لیے ایک عظیم نقصان ہے۔ مراٹھی، ہندی اور کئی دیگر زبانوں میں انہوں نے اپنی آواز کے ذریعے ہزاروں گیتوں کو امر کر دیا۔ان کی مدھر آواز میں گائے گئے مشہور مراٹھی گیت 'کیتکیچیا بنی تیتھے'، 'سانگ کدھی کلنار تُلا' اور 'نمبونیاچیا جھاڈا ماگے' آج بھی موسیقی کے شائقین کی زبان پر ہیں۔

موسیقی کے میدان میں ان کی بے مثال خدمات ہمیشہ یاد رکھی جائیں گی۔ خدا مرحومہ کی روح کو سکون عطا کرے اور ان کے اہلِ خانہ کو یہ صدمہ برداشت کرنے کی طاقت دے۔ اوم شانتی۔

مہاراشٹر کے نائب وزیر اعلیٰ ایکناتھ شندے نے بھی سمن کلیان پور کو خراجِ عقیدت پیش کرتے ہوئے کہا کہ ان کے گیت ہمیشہ موسیقی کے آسمان پر گونجتے رہیں گے۔

انہوں نے لکھا کہ اپنی سادہ، خالص اور روحانی آواز کے ذریعے موسیقی میں پاکیزگی پیدا کرنے والی عظیم گلوکارہ سمن کلیان پور کا انتقال موسیقی سے محبت کرنے والی دو نسلوں کو جوڑنے والی ایک خوبصورت کڑی کے ٹوٹ جانے کے مترادف ہے۔

انہوں نے اپنی آواز کے ذریعے کئی نسلوں کے جذبات کو زبان دی، محبت کو الفاظ عطا کیے، عقیدت کو دھن دی اور زندگی کے نرم و نازک لمحات کو موسیقی کا سہارا فراہم کیا۔اپنی نرم، خالص اور جذبات سے بھپور آواز کی بدولت انہوں نے موسیقی کی دنیا میں ایک منفرد مقام حاصل کیا۔

انہوں نے مزید کہا کہ گزشتہ سات دہائیوں کے دوران سمن کلیان پور نے بے شمار لازوال گیتوں کے ذریعے موسیقی کے شائقین کو مسحور کیے رکھا۔ہندی فلمی صنعت میں محمد رفیع کے ساتھ گائے گئے ان کے کئی دوگانے آج بھی سامعین کے دلوں میں زندہ ہیں۔ 'نہ تم ہمیں جانو' اور 'آج کل تیرے میرے پیار کے چرچے' جیسے گیتوں نے ان کی آواز کے سحر کو مزید مضبوط کیا۔

ایکناتھ شندے نے بھجنوں اور فلمی گیتوں میں ان کی خدمات کو بھی یاد کرتے ہوئے کہا کہ مراٹھی بھاؤ گیتوں، بھجنوں اور فلمی نغموں میں بھی انہوں نے اپنی گائیکی کے ذریعے ایک انمٹ نقوش چھوڑے۔ صرف مراٹھی ہی نہیں بلکہ ہندی، گجراتی اور بنگالی زبانوں میں بھی انہوں نے بے شمار گیت گائے۔موسیقی کے شعبے میں ان کی غیر معمولی خدمات کے اعتراف میں حکومتِ ہند نے 2023 میں انہیں ملک کے اعلیٰ ترین شہری اعزازات میں سے ایک پدم بھوشن سے نوازا تھا۔

اگرچہ آج وہ ہمارے درمیان موجود نہیں ہیں، لیکن ان کی آواز ہمیشہ زندہ رہے گی۔ وقت گزرتا رہے گا، نسلیں بدلتی رہیں گی، مگر سمن کلیان پور کی مدھر، پاکیزہ اور روح کو چھو لینے والی آواز موسیقی کے افق پر ہمیشہ گونجتی رہے گی۔سمن کلیان پور نے "آج کل تیرے میرے پیار کے چرچے" جیسے کئی لازوال گیتوں کو اپنی آواز دے کر امر کر دیا۔