نئی دہلی: حکومت ہند کے محکمہ برائے صنعت و داخلی تجارت کے فروغ (ڈی پی آئی آئی ٹی) کے سکریٹری امردیپ سنگھ بھاٹیہ نے کہا ہے کہ ہندوستان الیکٹرانکس اور سیمی کنڈکٹر مینوفیکچرنگ کے شعبے میں تیزی سے توسیع کا ہدف لے کر آگے بڑھ رہا ہے۔ حکومت نے 2030 تک سالانہ پیداوار 500 ارب امریکی ڈالر اور 2047 تک 5.3 سے 8 کھرب امریکی ڈالر تک پہنچانے کا ہدف مقرر کیا ہے، جس سے مینوفیکچرنگ کے شعبے میں وسیع مواقع پیدا ہوں گے۔

انڈو-جرمن چیمبر آف کامرس (IGCC) ڈائیلاگ 2026 سے خطاب کرتے ہوئے بھاٹیہ نے کہا کہ وکست بھارت کے وژن کے تحت 2047 تک ہندوستان کو ایک ترقی یافتہ ملک بنانے کے لیے سماجی اور اقتصادی شعبوں پر مشتمل تفصیلی منصوبے تیار کیے گئے ہیں۔ انہوں نے کہا کہ ان منصوبوں میں 2047 تک حاصل کیے جانے والے اہداف کے ساتھ ساتھ 2030 تک کیے جانے والے اقدامات کا واضح روڈ میپ بھی شامل ہے۔

الیکٹرانکس اور سیمی کنڈکٹر کے شعبے کا ذکر کرتے ہوئے انہوں نے کہا، "ہماری موجودہ سالانہ پیداوار تقریباً 330 ارب امریکی ڈالر ہے، جسے 2030 تک 500 ارب ڈالر اور 2047 تک تقریباً 5.3 سے 8 کھرب امریکی ڈالر تک لے جانے کا ہدف ہے۔ اس سے مینوفیکچرنگ کے شعبے میں بے شمار نئے مواقع پیدا ہوں گے۔"

ہند-جرمن تعلقات پر گفتگو کرتے ہوئے انہوں نے کہا کہ دونوں ممالک کے درمیان 25 برس سے زائد عرصے پر محیط اسٹریٹجک شراکت داری اور 75 سالہ سفارتی تعلقات موجود ہیں، جبکہ تجارتی روابط ایک صدی سے بھی زیادہ پرانے ہیں۔ انہوں نے کہا کہ جرمن کمپنیاں آزادی سے پہلے ہی ہندوستان میں کام کر رہی تھیں۔

انہوں نے کہا کہ ہندوستان دنیا کی تیزی سے ترقی کرنے والی بڑی معیشتوں میں شامل ہے اور گزشتہ ایک دہائی کے دوران اصلاحات اور ان کے مؤثر نفاذ پر حکومت کی توجہ نے، خاص طور پر گزشتہ تین برسوں میں، مزید رفتار حاصل کی ہے۔ بھاٹیہ نے بتایا کہ مرکزی حکومت کی اعلیٰ سطحی کمیٹیاں مختلف شعبوں میں اصلاحات پر کام کر رہی ہیں، جبکہ کابینہ سیکریٹریٹ میں قائم ڈی ریگولیشن سیل ریاستی سطح پر ضوابط کو آسان بنانے کے لیے سرگرم ہے۔

انہوں نے مزید کہا، "ہمارے پاس انڈین چیمبر ہے، جس کے ڈھائی ہزار سے زیادہ ارکان ہیں اور یہ ہند-جرمن صنعت و تجارت کا مشترکہ پلیٹ فارم ہے۔ اب وقت آ گیا ہے کہ دونوں ممالک کے تعلقات مزید مضبوط ہوں۔ گزشتہ چند برسوں میں جرمنی سے متعدد تجارتی وفود ہندوستان آئے ہیں۔"