نئی دہلی: سپریم کورٹ میں دائر ایک عرضی میں نیشنل ٹیسٹنگ ایجنسی (NTA) کی تنظیمِ نو یا اس کے متبادل کے طور پر ایک مضبوط اور خودمختار ادارہ قائم کرنے کی مانگ کی گئی ہے تاکہ نیٹ-یو جی (NEET-UG) امتحان شفاف اور محفوظ طریقے سے منعقد کیا جا سکے۔ درخواست گزار نے بار بار سوالیہ پرچہ لیک ہونے کے واقعات کو 22.7 لاکھ سے زائد طلبہ کے بنیادی حقوق پر “براہ راست حملہ” قرار دیا ہے۔

’فیڈریشن آف آل انڈیا میڈیکل ایسوسی ایشن‘ (FAIMA) نے وکیل تنوی دوبے کے ذریعے دائر درخواست میں کہا ہے کہ جب تک نئے امتحانی ادارے کی تشکیل نہیں ہو جاتی، تب تک ایک اعلیٰ اختیاراتی نگرانی کمیٹی مقرر کی جائے۔ عرضی میں مطالبہ کیا گیا ہے کہ اس کمیٹی کی سربراہی سپریم کورٹ کے کسی ریٹائرڈ جج کو دی جائے، جبکہ اس میں ایک سائبر سیکیورٹی ماہر اور ایک فارنزک سائنسدان کو بھی شامل کیا جائے تاکہ مستقبل میں پرچہ لیک ہونے جیسے واقعات کو روکا جا سکے۔

طبی انڈرگریجویٹ کورسز میں داخلے کے لیے نیشنل ٹیسٹنگ ایجنسی نے 3 مئی کو نیٹ-یو جی امتحان منعقد کیا تھا، لیکن سوالیہ پرچہ لیک ہونے کے الزامات کے بعد 12 مئی کو امتحان منسوخ کر دیا گیا۔ اس معاملے کی تحقیقات اب مرکزی تفتیشی بیورو (CBI) کر رہی ہے۔ FAIMA کی درخواست میں NTA، مرکزی وزارتِ صحت و خاندانی بہبود اور CBI کو فریق بنایا گیا ہے۔

درخواست میں کہا گیا: “یہ عرضی NTA کی جانب سے NEET-UG کے انعقاد میں بار بار، منظم اور تباہ کن ناکامیوں کے خلاف فوری عدالتی مداخلت کے لیے دائر کی گئی ہے۔” عرضی کے مطابق راجستھان پولیس کے اسپیشل آپریشن گروپ (SOG) نے انکشاف کیا کہ واٹس ایپ اور ٹیلیگرام پر گردش کرنے والے “ممکنہ سوالیہ پرچوں” میں 120 ایسے سوالات شامل تھے جو اصل NEET-UG 2026 امتحان کے بایولوجی اور کیمسٹری سیکشنز سے مطابقت رکھتے تھے۔

درخواست میں کہا گیا کہ NTA کی جانب سے 5G جیمرز، GPS ٹریکنگ اور AI نگرانی والے کیمروں جیسے ہائی ٹیک سیکیورٹی اقدامات کے دعوے صرف “کاغذی” ثابت ہوئے۔ عرضی میں مزید کہا گیا: “پہلے کے پرچہ لیک واقعات کے بعد دی گئی سفارشات کے مطابق سوالیہ پرچوں کو ڈیجیٹل طور پر لاک کرنے اور کمپیوٹر بیسڈ ٹیسٹ (CBT) ماڈل نافذ کرنے کی ہدایت دی جائے تاکہ فزیکل سوالیہ پرچوں سے جڑے خطرات ختم کیے جا سکیں۔”